Madeo 8 - UVORO GHWALOLI KWA WANDU WOSE

¹ Na Saulo oonile ni kirani aulagho. Nao lyilya ijua lyenyi ikanisa lya Jerusalemu lyikadyowa kutiriro. Wandu wose wedumuse, sala watumo wakasaghasagha kele isanga lya Judea na Samaria.

Saulo kutirira ikanisa

² Wandu wamshaile Mlungu wakamzika Stefano, wekemlilila na ndighi.

³ Ela Saulo katima kusirimisa ikanisa, keghenda nyumba kwa nyumba na kuwakurughusa awa wadumuse, walume kwa wake, na kuwangiza kifungoni.

Ilagho Lyaloli kuchilo Samaria

⁴ Nao walye wadumuse wakasaghasagha na kughenda kila andu, wekechila ilagho.

⁵ Filipo kaghenda kele muzi ghwa Samaria kamuchila Masihi kwa wandu wa alye.

⁶ Nawo wandu kwa ngolo mojori wakasikila selyi Filipo eluo keghora na kuona wana mwakilimbita eluo keidea.

⁷ Pepo zeluo zikefuma wandu kwa kukema, awa wekelemele na weluo wekeshoghora wakaboeso.

⁸ Kwa hung'u kukakala na maboelo kele ghulya muzi.

⁹ Nao kele ghulya muzi koluo na mundu mumoju aitogho Simoni, naye ko hambiri oluo msai na kwa usai ghwake kadea malagho ghawashinise Wasamaria, kekudea kukala mundu mubwaa,

¹⁰ na wandu wose wa muzi, wabwaa na wachache wakamusikizila, wakeghamba, “Iye ni ndighi za Mlungu ziitogho, ‘Ndighi Mbwaa.’”

¹¹ Kawashinisa na usai ghwake ngelo ndele na kwa hung'u wakamsikizila.

¹² Ela waghenda wadumusa malagho gha Filipo ighulu ya Ilagho Lyaloli lya Uzuri ghwa Mlungu na izina lya Jesu Kristo, wakabatizo, walume kwa wake.

¹³ Hata Simoni naese kadumusa; naye aghenda abatizo, kakalanya na Filipo; kashiniso ni alama na wana mwakilimbita weluo wekedeo.

¹⁴ Nao watumo weluo Jerusalemu wasikila kamba Wasamaria wawata ilagho lya Mlungu, wakawatuma Petro na Johana kwawe.

¹⁵ Nawo waghenda wafika wakawalombela awa wadumuse eri wapate Roho wa Kuela.

¹⁶ Kwani Roho wa Kuela okaile kuselela kwa wengi wawe; ela weluo wabatizo tu kwa izina lya Bwana Jesu.

¹⁷ Nao Petro na Johana wakawaikilila mikonu, nawo wakapata Roho wa Kuela.

¹⁸ Nao Simoni aghenda aona kamba wandu wapata Roho wa Kuela kwa kuikililo mikonu ni watumo, kashaya kuwahawa pesa Petro na Johana,

¹⁹ keghamba, “Nihaweni izi ndighi namose, eri kila mundu nimwikililagha mkonu apate Roho wa Kuela.”

²⁰ Ela Petro kamtumbulila, “Fwa noko na pesa zako, kwa kukala waririkanya wadima kughula inosi lya Mlungu na pesa.

²¹ Suwesi ifungu lyingi hata hachi kele ilagho ilyi kwa kukala ngolo yako siyaloli ingi hambiri ya Mlungu.

²² Kwa hung'u riha ughu ulaghelaghe ghwako na umulombe Bwana akufwile waya kele maririkanyo sa agha.

²³ Kwani naona wanajule iziso, sa usungu ghwa nyongo na nuwe mfungo wa kaung'a.”

²⁴ Simoni kamuza Petro na Johana, “Namvoya munilombele kwa Bwana, kamba ilagho lyingi selyi mwaghora silyanipate.”

²⁵ Nao waghenda wawashuhudia na kuwaghorera ilagho lya Mlungu, Petro na Johana wakauya Jerusalemu. Nawo wekeuya wakachila ilagho lyaloli kele mizi ya Samaria.

Filipo na ofisa wa Ethiopia

²⁶ Nao malaika wa Bwana kamuza Filipo, “kubambanye ughende kusini kele barabara ifumagha Jerusalemu kughenda Gaza.” (Iyi ni barabara ya kireti).

²⁷ Nao Filipo kakubambanya kaghenda. Naye kamwona Muethiopia mumoju koloi kegala. Uyu mundu oluo mubwaa wa pesa zose za kandake ango malikia wa Ethiopia. Naye oghendile Jerusalemu kutasa Mlungu, naye oluo kegala ewo ighulu ya igari lyake lyeruto.

²⁸ Ilyi eluo kitembo igarini, oluo keshoma chuo cha tondolo Isaya.

²⁹ Nao Roho wa Kuela kamuza Filipo, “Sughuta avui na ilyo igari ughendanye nalyo.”

³⁰ Filipo kalyikimbilila lyilya igari kamusikila ulya mundu keshoma chuo cha tondolo Isaya, kamukotela, “Ado, watambukilo ni agho ushomagha?”

³¹ Nao ulya mundu katumbulila, “Nitambukilogho ije ikakala mundungi senimanyise?” Nao kamlomba Filipo ajoke akalanye naye alye igarini.

³² Na Mawandiko gha Kuela eluo keshoma ni agha: “Sa ng'onzi ighenzogho kuulagho, sa ng'onzi siyebeyagha ngelo ipasogho makushu. Saghorire ilagho lyingi.

³³ Kasholelo na kuimo hachi yake, Sikwesi mundungi echimanyagha kivali chake, Kwani umana ghwake msangeni ghwadua.”

³⁴ Nao ulya mundu kamuza Filipo, “Nighorere, ni gha ani agha tondolo eghoragha? Ondeghora ghake ghenyi ango gha mundu mzima?”

³⁵ Nao Filipo kadyowa kuhelea naye kwa kutumia agha Mawandiko gha Kuela, kamghorera Ilagho Lyaloli lya Jesu.

³⁶ Nawo ilyi weluo wekeghenda kele barabara, wakafika andu koluo na meji, naye ulya mundu kaghora, “Meji sagha, Ndamu nini chiniimagha kubatizo?” [

³⁷ Filipo kamuza, “Wadima kubatizo ilyi wadumusa kwa ngolo yako yose.” Naye katumbulila, “Nadumusa kamba Jesu Kristo ni Mwana wa Mlungu.”]

³⁸ Nao ulya mundu kaghora igari lyimangiso, na wose waili Filipo na ulya mundu wakajika mejini, naye Filipo kamubatiza.

³⁹ Nao waghenda wafuma mejini, Roho wa Bwana kamudea Filipo auke alye. Naye ulya Muethiopia sadimile kumona sena, kaghenda ngila yake keboelo na ndighi.

⁴⁰ Filipo kaonekana Azoto, naye kaita kechila Ilagho Lyaloli mizi yose hata kafika Kaisari.