Madeo 3 - UVORO GHWALOLI KWA WANDU WOSE

Mshoghori kuboeso

¹ Nao ijua imoju Petro na Johana weghendile Hekaluni saa kenda kulomba.

² Na alye kuitogho “Mjango Ghwaloli” koluo na mundu avelo sedima kughenda. Kila ijua otukilo kaleto kele mjango, eri alombe pesa kwa wandu wengilagha Hekaluni.

³ Naye aghenda awaona wana Petro na Johana wekengila, kawalomba wamhawe kindu chingi.

⁴ Nao Petro kamukulila meso ngila mojori na Johana, kamuza, “Tizighane isi”

⁵ Kwa hung'u kawazighana kekoserea kupata kindu chingi kufuma kwawe.

⁶ Petro kamuza, “Imi siwesi pesa ango zahabu, ela nikuhawagha ichi nio nacho; kwa Izina lya Jesu Kristo wa Nazareti, nakuza uka na ughende.”

⁷ Nao kamwata na mkonu ghwake ghwa kijo kamunula. Nao ngelo iyo yenyi maghulu na ngokoro za ulya mundu zikapata ndighi.

⁸ Naye kachumba, kakala kimusi na kughenda. Nao kangila Hekaluni ngila mojori nawo, keghenda na kuchumba chumba kemkasa Mlungu.

⁹ Wandu wose wakamwona keghenda na kemkasa Mlungu,

¹⁰ nawo waghenda wamumanya kamba ni ulya mundu eluo kitembo kelomba kele “Mjango Ghwaloli” ghwa Hekalu, wakakirimua na kushinika kwa ghalye ghadeike kwake.

Maheleo gha Petro Hekaluni

¹¹ Nao ilyi ulya mundu eluo keirimana na Petro na Johana, wandu wose wakashinika, wakawairima andu kuitogho Baraza ya Solomoni.

¹² Naye Petro aghenda awaona wandu, kawauza “Wandu wa Israeli, Kudani mutishinikila na kutikulila meso? Ado muririkanyagha ni kwa ndighi na ueli ghwetu tamudea uyu mundu kughenda?

¹³ Mlungu wa Abrahamu, wa Isaki na wa Jakobo, Mlungu wa wana Ake, niye amhawile nguma mtumishi wake Jesu, uyu mumufunyile kwa wabwaa wenyu na kumkana hambiri ya Pilato, ngelo iye eshaile kumufungula.

¹⁴ Iye oluo wa kuela na waloli, ela mkamlegha mkamlomba Pilato amufungulile muulaghi.

¹⁵ Mukamulagha uyu ehawagha wandu umana. Ela Mlungu kamuzukisa kufuma wafwa, nesi nisi washahidi wa agha.

¹⁶ Na ni kwa udimo ghwa izina lyake, uyu mundu seghendagha apata ndighi. Ichi mwaona na mwamanya chadeika kwa idumusi kele izina lyake. Na ni idumusi kwa Jesu lyamuboesa uyu mundu, selyi mumuonagha.

¹⁷ “Na ndamu wana wakwetu, namanya kamba inyo na wabwaa wenyu, mwanadeile hung'u kwa kulemo ni kumanya.

¹⁸ Ela Mlungu ondekatisa agha aghorire kwa ngila yana tondolo wose ko kale, kamba Masihi ni suti asirime, naye kakatisa.

¹⁹ Kwa hung'u, riheni na kumghalukila Mlungu, eri aogheshe kaung'a zenyu zose.

²⁰ Kamba ngelo za ndighi za roho zije kufuma kwa Bwana, na kumuletela Jesu ewo Masihi asaghulo kwa undu ghwenyi.

²¹ Iye ukalagha mlunguni hata ngelo ikate yedea vindu vose vikale viishi, kuirima selyi Mlungu aghorire kwa ngila ya wana tondolo wake wa kuela wa ko kale.

²² Kwani Musa oghorire, ‘Bwana Mlungu wenyu ujemtuma tondolo selyi anitumile imi, naye ujekala mumoju wenyu msikileni kwa ghose.

²³ Uwo wose sesikilagha selyi uyo tondolo eghoragha usaghulo mbali kwa wandu wa Mlungu na kuhaitiso.’

²⁴ Nawo wana tondolo wose kufuma Samweli na awa wamwirimire wanaghorire malagho ghedeikagha majua agha.

²⁵ Malagano gha Mlungu kuitila kwa wana tondolo ni ghenyu, nenyo muwo wandu wa ilagano lya Mlungu adeile na wana akeo. Selyi aghorire na Abrahamu; ‘Kwa kivali chako nijewabarikia wandu wose urumenguni!’

²⁶ Kwa hung'u Mlungu aghenda amuzusa mtumishi wake Jesu, kamtuma kwenyu jako, eri amubarikie kwa kumudea inyose mughaluke kufuma kele ngila zenyu za laghelaghe.”