Madeo 28 - UVORO GHWALOLI KWA WANDU WOSE

Alye Malta

¹ Nao tifika banana kele isanga lyiomile tikamanya kamba chilya kisiwa chanaitogho Malta.

² Wandu wa alye weluo waloli kwetu. Mvula idyowa kunya na kukala na mbeo, wakakoza moto wakatikaribisha tibughawe.

³ Paulo kausa ijilo lya nguni, na ilyi eluo kekumba motoni, nyoka ikafuma kwa undu ghwa mruke ghwa moto, ikakurigharigha kele mkonu ghwake.

⁴ Wandu wa alye waiona nyoka ikejenena mkonuni kwa Paulo wakaghamba, “Uyu mundu ni muulaghi, ela hachi siyimsighagha akale moyo kungi, hata ngera sani wakila kele bahari.”

⁵ Ela Paulo kaighungudula nyoka motoni hata saonile ilagho lyingi.

⁶ Nawo weluo wekedafwa ngera uvimbagha ango ugwighagha afwe. Ela waghenda wadafwa luma na kuona sedeikagha ilagho lyingi, wakakirimuwa, wakaghora. “Ni mlungu.”

⁷ Na kavui na alye koluo na mbuwa ya Publio, mubwaa wa kisiwa. Naye katikaribisha kirani kwa majua matatu sa wagheni wake. Tatie Publio woluo ulilini mkongo wa msuko na kufwaha bighati.

⁸ Paulo kangila kele chumba chake, kalomba na kuikilila mikonu yake ighulu yake, naye kaboa.

⁹ Nao agha ghadeika, wandu wose weluo wakongo alye kele kisiwa, wekeja wakaboeso.

¹⁰ Nawo wakatihawa manosi mengi na ngelo yeuka na meli wakatingizila vilya teshaile kwa charo.

Kufuma Malta hata Roma

¹¹ Nao nyuma ya miezi mitatu tikauka na meli ifumile Alekzandaria iitogho “Milungu ya Mahega” yeluo kele kisiwa chilya na ishika.

¹² Tikafika kele muzi ghwa Sirakusa, tikakala alye kwa majua matatu.

¹³ Kufuma alye tikatamba na meli tikafika muzi ghwa Regio. Nao ilyo ikesho lyake mbeo ikadyowa kupita kufuma kusini, na nyuma ya majua maili tikafika kele muzi ghwa Potioli.

¹⁴ Alye tikadoka wandu wadumuse wakatilomba tikalanye nawo kwa jumwa. Na hung'u tikafika Roma.

¹⁵ Wana wakwetu wa Roma wasikila uvoro ghwetu wakatimarira kele soko ya Apio na Nyumba ndatu za wagheni. Naye Paulo aghenda awaona, kamkasa Mlungu na kupata ngolo.

Paulo Roma

¹⁶ Nao tifika Roma, Paulo kadumusilo kukala mwenyi na askari omulindagha.

¹⁷ Nao nyuma ya majua matatu Paulo kawapang'a vilongozi va Wayahudi wa alye wakughane. Nawo waghenda wakoghana kawauza, “Wana wakwetu, Hata ngera sani sideile ikosa lyingi kwa wandu wa muzetu ango ada tiziirimagha kufuma kwa wana ake, Nanafungilo kufuma Jerusalemu na kungizo kele mikonu ya Waroma.

¹⁸ Waghenda wanikotela makotelo wakashaya kunifungula, kwa kukala siweonile ikosa lyingi kwangu lyenifweni kufwa.

¹⁹ Ela Wayahudi waghenda walegha agha, ikanifwana nilombe rufani kwa Kaisari hata ngera sani seluo na ilagho lyingi ighulu ya wandu wangu.

²⁰ Ni kwa undu ughu neonile nimpang'e muje tionane na tihelee, kwa kukala nio na iyi minyororo kwa undu ghwake uyu ekosereogho ni wandu wa Israeli.”

²¹ Nawo wakamuza, “Sitipatile barua zingi kufuma Judea ighulu yako ango sikwesi mundungi wa wana wakwetu ajile kufuma alye na uvoro ghungi ango kughora ilagho lyingi lyiwase ighulu yako.

²² Ela tanashaile tisikile malagho ghako, kwa kukala tamanya kamba ilagho ilyo lyanaghoro laghelaghe kila andu na uwe nuwe mumoju wawe.”

²³ Nao wakaika ijua lyeonana na Paulo, wengi wawe wekeja lyilya ijua, andu Paulo eluo kekala. Naye kufuma naikesho hata na nahafukeni kawaghorera na kuwamanyisa uvoro ghwa uzuri ghwa Mlungu. Katima selyi edimagha kuwaruta kwa Jesu ketumia ghawandiko kele Sheria ya Musa na Mawandiko gha wana tondolo.

²⁴ Wamoju wawe wakadumusa malagho ghake, ela wamoju wakalegha kudumusa.

²⁵ Nao wakauka kughenda sikwewo na masikilano, nyuma ya Paulo kughora ilagho ilyi imojori, “Roho wa Kuela wanaghorire fulo kwa wana akeo kwa ngila ya tondolo Isaya!

²⁶ Kwani wanaghorire ‘Ghenda ughore na awa wandu: Kusikila mujesikila na simumanyagha; kulola mjelola na simuonagha.

²⁷ Kwa kukala ngolo za awa wandu zanagwaile, wafunga masikilo ghawe, na wafunga meso ghawe. Ango macho meso ghawe ghaona, na masikilo ghawe ghasikila. Na ngolo zawe zamanya, na kunighalukila imi, aghora Mlungu, na macho nawaboesa.’”

²⁸ Naye Paulo kamalila, “Ndamu manyeni kamba uvoro ghwa Mlungu ghwa ukizi ghwaghenzo kwa wandu wa mbari nzima. Nawo wejeghusikila.” [

²⁹ Nao nyuma ya Paulo kughora hung'u Wayahudi wakaghenda wekedeilana nganyi wenyi.]

³⁰ Na kwa miaka mili Paulo oluo kekala nyumba eluo keilipila mwenyi na oluo kekaribisha wandu wose wejile kumwona.

³¹ Kachila gha Uzuri ghwa Mlungu na kufundisa malagho gha Bwana Jesu Kristo, kaghora mwazi mwazi sikweo na wuimo ghungi.