Biblia Todo Logo
Bìoball air-loidhne

- Sanasan -

Madeo 25 - UVORO GHWALOLI KWA WANDU WOSE


Paulo kulomba rufani kwa Kaisari

1 Nao majua matatu nyuma ya Festo kufika isanga lyake kaghenda Jerusalemu kufuma Kaisari.

2 Nao wakohani wabwaa na vilongozi va Wayahudi vikamshitaki Paulo, wakamlomba Festo

3 amulete Paulo Jerusalemu kwa kukala wedeile njama yemuulagha ngileni.

4 Festo kawatumbulila, “Paulo wanafungilo alye Kaisari, na imi mwenyi niwuyagha alye kafwani.

5 Sigheni vilongozi venyu vighendanye nemi Kaisari wamushitaki ngera adeile makosa.”

6 Nao nyuma ya Festo kukala nawo majua manane ango ikumi, kawuya Kaisari. Nao ilyo ikesho lyake kakala kitembo kele kifumbi cha kutaghanya, naye kaghora Paulo aleto.

7 Nao Paulo aghenda afika, Wayahudi wafumile Jerusalemu wakauka kimusi wekemumara, wakadyowa kumushitaki kwa malagho mengi siwedimile kughadea kukala gha fulo.

8 Ela Paulo kakutetela keghamba, “Imi sideile ikosa lyingi kele Sheria ya Wayahudi, ango Hekalu ango Kaisari.”

9 Ela Festo keshaya kuwaboela Wayahudi, kamkotela Paulo, “Wanashaile kughenda Jerusalemu eri utaghanyo alye kwa mashitaki agha hambiri yangu?”

10 Paulo kaghora, “Imi nio kimusi hambiri ya kifumbi cha Kaisari chetaghanya andu nifweni nitaghanyo. Sideile ikosa lyingi kwa Wayahudi selyi uwe mwenyi umanyagha.

11 Nako ngera navunja Sheria ingi na nadea kindu chingi chifweni niulagho, sileghile, Ela ngera sikowesi fulo ingi ya agha malagho weghorogho ighulu yangu, sikwesi mundungi edimagha kunifunya kwawe. Nalomba rufani kwa Kaisari.”

12 Nao Festo aghenda ahelea na wanjame wake, kamtumbulila, “Washaya rufani kwa Kaisari, kwa hung'u ughendagha kwa Kaisari.”


Paulo hambiri ya Agripa na Bernike

13 Nao konyuma Mzuri Agripa na Bernike wekeja Kaisari kumuroghowa Festo kwa kazi yake mbishi.

14 Nawo waghenda wakala alye kwa majua ghaenga, Festo kamughorera Mzuri malagho gha Paulo. “Kuwo na mundu aha asighilo kifungoni ni Filikisi;

15 na nighenda Jerusalemu, Wakohani wabwaa wa Wayahudi na waghosi wakaleta mashitaki ghawe kwangu wekenilomba nimtaghanye.

16 Ela imi nikawauza kamba Waroma siwafunyagha mundungi ashitakio kukosa hambiri ulya mundu seonane na walye wamshitakia na kuhawo ulalo ghokutetela kwa agho mashitakio.

17 Nawo waghenda weja aha, simukile luma, ela ilyo ikesho lyake nekalile kele kifumbi chetaghanya na nikaghora uyo mundu aleto.

18 Walye weluo wekemshitakia wakauka kimusi, ela siwamshitakie kungi kwa makosa ghengi ghawase selyi neluo nikeririkanya kamba wemshitakiagha.

19 Malagho weluo nagho gheluo gha nganyi ighulu ya dini yawe na gha mundu aitogho Jesu afwile, ela Paulo iye ughoragha kamba uwo moyo.

20 Semanyile lyedea ighulu ya malagho agha, kwa hung'u nikamkotela Paulo ngera wanashaile aghende Jerusalemu na ataghanyo kele mashitaki agha.

21 Ela Paulo kalomba rufani na kaghora aiko kifungoni hata adafwe malagho ghake ghapaso ni Kaisari. Kwa hung'u nikaghora alindo hata ngelo nijemghenza kwa Kaisari.”

22 Agripa kamuza Festo, “Nanashaile nimusikile mundu uyu namose.” Festo kamutumbulila, “Umusikilagha ikesho.”

23 Nao ilyo ikesho Agripa na Bernike wekeja kwa izumo lya kiuzuri wakangila kele chumba kibwaa chekoghana wandu ngila mojori na majemadari na vilongozi va muzi. Festo kaghora Paulo aleto.

24 Festo kaghora, “Mzuri Agripa na inyose muwo aha nesi. Uyu mundu mumwonagha niye Wayahudi wose aha na Jerusalemu waleta manung'uniko ighulu yake kwangu. Nawo weghoragha kamba siifweni akale moyo.

25 Ela imi sidimile kuona kindu chingi chemdea aulagho, na kwa kukala iye mwenyi walomba rufani kwa Kaisari, Naona nimughenze.

26 Ela imi siwesi kindu chingi chemwandikila Bwana wangu ighulu yake. Kwa hung'u namuleta hambiri yenyu na kuchumba hambiri yako uwe Mzuri Agripa, eri ilyi wamalila kuzighana malagho ghake nipate kindu chewandika.

27 Kwani siionekagha ni kirani kwangu imi kumghenza mfungo seonyezagha agha makosa eshitakiogho nagho.”

(C) The Bible Society of Kenya, 1993

Bible Society of Kenya
Lean sinn:



Sanasan