Madeo 24 - UVORO GHWALOLI KWA WANDU WOSE

Paulo kushitakio ni Wayahudi

¹ Nao nyuma ya majua masanu, Mkohani Mubwaa Anania, kaghenda Kaisari ngila mojori na waghosi na wakili aitogho Tertulo. Wakakala hambiri ya Mubwaa Filikisi na wakamshitakia Paulo.

² Nao Paulo kapang'o, naye Tertulo kadyowa kumushitakia Paulo hung'u: “Uwe uhawogho ishima Filikisi! Ulongozi ghwako ghwatiletela ngelo ndele ya sere na malagho mengi ghaghaluka ghakala ghaloli kele isanga lyetu.

³ Nesi tahokera agha kila andu na ngelo zose na takufunyila asanta mbwaa.

⁴ Sishaile kungi kuusa ngelo yako ndele, elaima nakulomba ukale na ngolo yesikizila malagho ghetu machache.

⁵ Tanamwonile mundu uyu kukala ni wa ndengwa na ni mudyoi zuhe ghati ya Wayahudi urumengu ghose naye ni Kilongozi wa chama cha Wanazareti.

⁶ Hata wanatimile kuluwisa Hekalu, ela tikamwata. [Teshaile kumutaghanya kwa Sheria yetu,

⁷ ela mubwaa wa askari Lisia keja kwa ndighi kamusa kufuma kwetu.

⁸ Nao Lisia kaghora awa weo na ilagho lyemshitaki weje hambiri yako.] Nawe ilyi wamkotela uyu mundu, uwe mwenyi umanyagha agha ghose timshitaki nagho.”

⁹ Wayahudi nawose wakadumusilana na mashitaki agha, wakaghamba ni gha fulo.

Paulo kukutetela hambiri ya Filikisi

¹⁰ Nao ulya mubwaa kamukunyiria Paulo eri aghore. Naye kaghora, “Namanya wakala mtaghanyi wa mbari iyi kwa miaka mingi na kwa hung'u nio na maboelo kukutetela imi mwenyi hambiri yako.

¹¹ Selyi umanyagha sighaketi majua gheitagha ikumi na maili kufuma naghenda Jerusalemu kutasa.

¹² Hata Wayahudi siwanidokile nikeheleanya na mundungi Hekaluni ango siwanidokile nikekumba sheshe wandu kele sinagogi ango andu kungi kele muzi.

¹³ Hata siwedimagha kughora karakara agha malagho wenishitaki nagho.

¹⁴ Ela nadumusa kamba nanamtasagha Mlungu wa wana ake, kwa kuirima ngila iyo weghoragha ni ya ndimi na sheshe. Sena nadumusa malagho ghose ghawandiko kele Sheria ya Musa na kele vuo va wana tondolo.

¹⁵ Nio na ikosereo kwa Mlungu ilyo lyenyi weo nalyo, kamba wandu wose waloli na wawase wezukagha kufuma kwa wafwa.

¹⁶ Kwa hung'u natima kila ngelo kuelesa ngolo yangu hambiri ya Mlungu na wandu.

¹⁷ “Nyuma ya kukala kulele na Jerusalemu, kwa miaka mingi, neghendile alye nikewatwalila wandu uwaruri na kufunya sadaka.

¹⁸ Ni ngelo neluo nikedea hung'u wanidokile Hekaluni, namalila putu kufunya sadaka yekukuelesa. Hata sekezanye na ikoghano ango zuhe ingi.

¹⁹ Ela Wayahudi wa kufuma Asia weluo awenyi, na awa macho nio weo hambiri yako kughora ulaghelaghe ghwangu ngera weo na ilagho lyingi nemi.

²⁰ Ango awa wandu waghore ikosa waonile kwangu ngelo neluo hambiri ya Baraza.

²¹ Sala kindu kimojori nighorire hambiri yawe: ‘Nendetaghanyo lelo kwa kudumusa kamba wafwa wejezuka!’”

²² Nao Filikisi, kwa kukala oweni malagho gha ilya Ngila kafunga mlandu, kawauza, “Nijetaghanya malagho agha ilyi mubwaa wa jeshi Lusia eja.”

²³ Naye kamuza ulya askari eluo kemlinda Paulo amulinde kirani, ela amuhawe ulalo na kuwadumusila wagheni wake wamuhawe vindu eshayagha.

Paulo hambiri ya Filikisi na Drusila

²⁴ Nao nyuma ya majua machache Filikisi keja na mkwake Drusila eluo Myahudi. Naye katumana Paulo aleto na wamusikizile kehelea malagho gha idumusi lya Kristo Jesu.

²⁵ Ela ilyi Paulo eluo kehelea ighulu ya uhachi, kukumanzira, na ighulu ya kuja ijua lya kutaghanyo, Filikisi kangilo ni wogha, kamuza, “Wadima kughenda ndamu, Nikupang'agha sena ilyi napata ulalo.”

²⁶ Naye oluo kekoserea kamba Paulo umuhawagha pesa, kwa hung'u kampang'a mandu mengi kahelea naye.

²⁷ Nao miaka mili idua Parkio Festo kausa ulalo ghwa Filikisi ghwa ubwaa. Naye Filikisi kwa kushaya kushayo ni Wayahudi kamusigha Paulo kifungoni.