Madeo 2 - UVORO GHWALOLI KWA WANDU WOSE

Kuja kwa Roho wa Kuela

¹ Nao ifika ijua lya Pentekosto, awa wose wedumuse wekoghane andu kumojori.

² Nao shwa ng'ori, lukasikilika lwaka kufuma mlunguni; loluo sa mbeo mbwaa, lukaijuza nyumba yose wekalile kitembo.

³ Nao wakaona nyumi sa nyumili za moto, zikasarikana na kumkalila kila mumoju wawe.

⁴ Nawo wose wakajulo ni Roho wa kuela na kudyowa kughora kwa viteto vizima selyi Roho awadimise kughora.

⁵ Nao koluo alye Jerusalemu Wayahudi, wandu wa dini, wejile kufuma kila isanga urumenguni.

⁶ Nao waghenda wasikila ulo lwaka, wakakoghanyika wandu wengi, wakashinika kwa kukala kila mumoju wa walye wedumuse, weluo wekeghora kwa kiteto chake chenyi.

⁷ Nawo kwa mashiniko mabwaa wakaghora, “Ado awa wandu wose weghoragha si Wagalilaya?

⁸ Ndamu yakalaije isi isose kusikila wekeghora kwa kiteto cha kimunzawe.

⁹ Waparthi, Wamedi na Waelami, wandu wafumile Mesopotamia, Judea na Kapadokia, Wafumile Ponto na Asia,

¹⁰ Wafumile Frigia na Pamfulia, wafumile Misri na gasi ya Libya kavui na Kurene; wamoju ni wagheni kufuma Roma,

¹¹ Wayahudi na wandu waghaluke dini ya Wayahudi, na wamoju wafuma Krete na Arabia. Nesi isose tawasikila wekeghora kwa viteto vetu venyi, malagho mabwaa Mlungu adeile.”

¹² Na kwa kushinika wose wakakotelana, “Agha ni gheo?”

¹³ Ela wamoju wakawaghora laghelaghe kwa kughamba, “Wandu awa wanarua!”

Machilo gha Petro

¹⁴ Nao Petro kauka kimusi ngila mojori na walye watumo ikumi na moju; kaghora nawo na lwaka lubwaa, “Wana wakwetu Wayahudi, na inyose mkalagha Jerusalemu, sikizileni nimughorere kutambula kwake ichi nini.

¹⁵ Simwaririkanye kamba awa wandu wendenarua, kwani indakwenyi ni saa ndatu za ikesho kiro.

¹⁶ Kwani agha nigho ghaghoriro ni tondolo Joeli:

¹⁷ ‘Kele majua gha kudua, aghamba Bwana, Nijetila Roho wangu kwa wandu wose. Wana wenyu wa kialume na wa kiwake wejetondola, watawana wenyu wejeona maono. Na waghosi wejelota maloteso.

¹⁸ Nao watumishi wangu wa walume na wa wake Nijewangiza Roho wangu majua ghalye, nawo wejetondola.

¹⁹ Nemi nijeonyeza mashiniko uko ighulu mlunguni, Na alama msangeni na isi; Kujekala na Bighati na moto na mosi mubwaa.

²⁰ Ijua lyijeghaluka kiza, na mwezi ghujekusuwa sa bighati, Hambiri ya kuja lyilya Ijua Ibwaa lya Bwana.

²¹ Na aho ijekala uwo wose elombagha kwa izina lya Bwana ujekizo.’

²² “Ee Waisraeli, Nisikizileni! Jesu wa Nazareti oluo ni mundu musaghulilo ni Mlungu na ehawilo udimo kudea mwakilimbita na alama ghati yenyu, nenyo mwamanya agha, kwani ghanadeike ghati yenyu.

²³ Naye Mlungu kwa kushaya mwenyi, omanyile kamba Jesu ufunyogho kwenyu; na mwanamulaghe kwa kuwasigha wandu wa kaung'a wamwambe msalabeni na misumari.

²⁴ Ela Mlungu kamuzusa kufuma kwa wafwa, kamfungula kufuma usungu ghwa kifwa, kwani siyedimike afungo ni kifwa.

²⁵ Kwani Daudi waghora hung'u ighulu yake, ‘Nanamwonile Bwana hambiri yangu majua ghose; Kwani uwo kele mkonu ghwangu ghwa kijo, eri sanyavurike.

²⁶ Kwa hung'u ngolo yangu ikabwelo; na nikakwita lukalaghala kwa maboelo na imi mundu wa muli munyonge nikalagha kele ikosereo lyaloli.

²⁷ Kwani susighagha roho yangu urumengu ghwa kifwa; Hata sumusighagha mtumishi wako avunde kungi.

²⁸ Uwe wanionyeza ngila ya umana, na kwa kukalanya newe nijulogho ni maboelo.’

²⁹ “Wana wakwetu sigheni nimughorere mwazi mwazi ighulu ya Ake Daudi. Iye wanafwile, kaziko na mbira yake tio nayo hata lelo.

³⁰ Daudi oluo tondolo, kwani omanyile kamba Mlungu omughemelele kukala mumoju wa Kivali chake ukalagha mzuri kibalo chake.

³¹ Daudi owonile selyi Mlungu ejedea na kwa hung'u kahelea ighulu ya kuzuka kwake Masihi keghamba, ‘Naye sasighilo kele urumengu ghwa kifwa Muli ghwake sighuvundile.’

³² Mlungu wanamzusile uyu Jesu kufuma kwa wafwa. Nesi isose nisi washahidi wa iyi fulo.

³³ Naye aghenda anulo hata mkonu ghwa kijo ghwa Mlungu na kupata kwake Roho wa Kuela selyi Tatie elaghize, katitilila inosi ilyi muonagha na kusikila.

³⁴ Kwani Daudi mwenyi, sajokile mlunguni, ela waghora, ‘Bwana wanamuzile Bwana wangu, kala aha kele mkonu ghwangu ghwa kijo.

³⁵ Hata niwaike wamaiza wako wakale kifumbi, cheika maghulu ghako!’

³⁶ “Kwa hung'u Waisraeli wose wamanye fulo kamba uyu Jesu, mumuwambile, Mlungu wanamdeile kukala Bwana na Masihi!”

³⁷ Nao wandu waghenda wasikila hung'u, wakangilongilo ngoloni, wakamuza Petro na watumo wambawe, “Tidee ije wana wakwetu?”

³⁸ Petro kawauza, “Riheni na kila mumoju wenyu abatizo kwa izina lya Jesu Kristo eri mufwilo waya kaung'a zenyu na mpate inosi lya Mlungu lya Roho wa Kuela.

³⁹ Kwani ilagano lya Mlungu lyanadeilo kwa undu ghwenyu na kwa wana wenyu na kwa wose weo kulele, na wose Bwana Mlungu wetu ejewaita kwake.”

⁴⁰ Petro kawavoya kwa malagho mengi, kaghamba, “Kukizeni inyo wenyi na kutaghanyo kujilagha wandu awa wa laghelaghe.”

⁴¹ Wengi wakadumusa malagho ghake na wakabatizo, na ijua lyilya wakajuzilika wandu elfu ndatu.

⁴² Nawo wakatumia ngelo zawe kukufundisa kufuma kwa watumo, wekekala ngila mojori, wekevunja mkate na kulomba.

Selyi wandu wadumuse weluo wekekala

⁴³ Wana mwakilimbita na mashiniko ghakadeika kwa mikonu ya watumo, na kila mundu kangilo ni wogha.

⁴⁴ Wose wedumuse wakaendelea kukala na umojori, wakatumia mali na vindu vawe ngaro.

⁴⁵ Kwa hung'u wakatagha mali na vindu vawe, na pesa wakasara kuirimana na selyi kila mumoju efweni apate.

⁴⁶ Na kila ijua, weluo wekekughana ngila mojori Hekaluni; na kuvunja mkate nyumba kwawe, wekelya chakulya kwa kuboelo na kwa ngolo ya ishima.

⁴⁷ Wakamlika Mlungu, na wandu wose wakaboelanyo nawo. Na kila ijua Bwana kajuzila wandu awa weluo wekekila.