Madeo 18 - UVORO GHWALOLI KWA WANDU WOSE

Alye Korintho

¹ Nao nyuma ya agha Paulo kafuma Athene kaghenda Korintho.

² Alye kakoghana na Myahudi aitogho Akula, avalililo Ponto, naye ondeja kafwani kufuma Italia ngila mojori na mkwake Priskila kwa kukala Kaisari Klaudio oluo awauza Wayahudi wose ni suti wafume Roma. Paulo kaghenda kuonana nawo,

³ na wakakalanya na kudea kazi ngila mojori, kwa kukala Paulo oluo fundi oshona hema sawo wenyi.

⁴ Naye kahelea na wandu kele sinagogi kila ijua lya Sabato, ketima kuwaruta Wayahudi na Wagiriki.

⁵ Nao Silasi na Timotheo wafika kufuma Makedonia, Paulo katumia ngelo yake yose kwa kuchila kewashuhudia Wayahudi kamba Jesu ni Masihi.

⁶ Nawo waghenda walegha ghake na kumtukana kaghughundula nguo zake, kawauza, “Mkahaita ni ighulu yenyu, Imi siwesi ikosa lyingi. Ndamu kufuma indakwenyi nendewaghendela wandu wa mbari nzima.”

⁷ Nao kawasigha, kafuma kaghenda kukala kele nyumba ya mundu aitogho Tito Justo, eluo kemtasa Mlungu, naye nyumba yake yeluo kavui na Sinagogi.

⁸ Krispo, mubwaa wa Sinagogi kamudumusa Bwana, naye na nyumba yake na wandu wamoju wengi wa Korintho wakalyisikila ilagho, wakadumusa na wakabatizo.

⁹ Nao kiro kimoju Paulo kaona iono; Bwana kemuza, “Swadee wogha, ela ghora tu swanyamale;

¹⁰ kwani nio ngila mojori newe, sikwesi mundungi ekudeagha laghelaghe, kwa kukala nio na wandu wangu wengi kele muzi ughu.”

¹¹ Kwa hung'u Paulo kakala alye kwa mwaka ghumojori na mezi mitandatu.

¹² Nao Galio aghenda asaghulo kukala mubwaa wa Akaya, Wayahudi wakakoghana, wakamwata Paulo na kumughenza andu kotaghanya.

¹³ Wakaghora, “Uyu mundu wanawadeagha wandu wamtase Mlungu kinyume cha kisheria.”

¹⁴ Nao ilyi Paulo eluo keshaya kutumbulila, Galio kawauza Wayahudi, “Ngera agha malagho gheluo ni makosa mabwaa ango ni ulaghelaghe ghwadeika kwenyu Wayahudi yekalagha karakara nimusikizile inyo.

¹⁵ Ela kwa kukala ni nganyi za malagho na mazina na sheria yenyu, mwadima kughaboesa inyo wenyi. Imi sikalagha mtaghanyi wa malagho sa agho!”

¹⁶ Naye kawagusa kufuma andu kotaghanya.

¹⁷ Nao wose wakamwata Sosthene, mubwaa wa Sinagogi, wakamkwita hambiri ya andu kotaghanya. Ela Galio satalile ghalye hata kachache.

Kuuya Antiokia

¹⁸ Paulo kakala Korintho na wana wakwetu kwa majua mengi; nao ima kawasigha kaghenda kwa meli ngila mojori na Priskila na Akula hata Siria. Hambiri ya kuuka alye Kenkrea kaika hati, naye kaharo chongo chake.

¹⁹ Nawo waghenda wafika Efeso, Paulo kawasigha Priskila na Akula alye. Kaghenda kele Sinagogi kuhelea na Wayahudi.

²⁰ Nawo wakamlomba akalanye nawo kwa ngelo ndele, ela kaghora siidimikagha.

²¹ Ela iye kawalaga kawauza, “Mlungu kashaya, niuyilagha anyaha.” Nao katamba kwa meli kafuma Efeso.

²² Nao afika Kaisari, kaghenda Jerusalemu karoghowa Ikanisa, nao ima kaghenda Antiokia.

²³ Nao nyuma ya kukala alye kwa ngelo, kauka kaghenda keitila Galatia na Frigia kejuzila kuwakumba ngolo walye wedumuse.

Apolo alye Efeso na Korintho

²⁴ Nao Myahudi mumoju aitogho Apolo evelelelo Alekzandaria kafika Efeso. Oluo ni mundu aweni kuhelea na aweni Mawandiko gha Kuela karakara.

²⁵ Naye ofundiso Ngila ya Bwana na kwa kuwakowako rohoni kaghora na kufundisa karakara malagho gha Jesu. Ela ima oweni tu gha ubatizo ghwa Johana.

²⁶ Naye kadyowa kughora sikweo na wogha kele Sinagogi. Ela Priskila na Akula wamusikila wakamtwala nyumba kwawe na wakamufundisa kirani ngila ya Mlungu.

²⁷ Nao Apolo ashaya kughenda Akaya, walye wana wakwetu wa Efeso wakamkumba ngolo kwa kuwandika barua kwa walye wadumuse wa Akaya, wekewauza wamuhokere. Naye afika kakala na uwaruri mubwaa kwa walye wedumuse kwa undu ghwa mbazi ya Mlungu.

²⁸ Kwani kwa ndighi eluo nazo na kwa nganyi wanduni kawasima Wayahudi, kewaonyeza kufuma kele Mawandiko gha Kuela kamba Jesu ni Masihi.