Madeo 17 - UVORO GHWALOLI KWA WANDU WOSE

Alye Thesalonike

¹ Nao Paulo na Silasi wakatamba kuitila Amfipoli na Apolonia, wakafika Thesalonike andu koluo na sinagogi ya Wayahudi.

² Na Selyi yeluo mailiso ghake, Paulo kaghenda kele sinagogi. Na kwa Sabato ndatu kahelea na wandu ighulu ya Mawandiko gha Kuela.

³ Kawaghorera na kuwaonyeza selyi Masihi eluo ni suti atiririke, na azuke kufuma kwa wafwa. Kawauza, “Jesu uyu nimughoreragha malagho ghake niye Masihi.”

⁴ Nao wamoju wawe wakadumusa, wakawatana na Paulo na Silasi na hung'u kwenyi Wagiriki wengi weluo wekemtasa Mlungu wakadumusa, ngila mojori na wake waenga weluo vilongozi.

⁵ Ela Wayahudi wakaona iziso, nawo wakakoghanya wandu wa laghelaghe kufuma sokoni na kuwaika kigojo. Nao wakazuha muzi ghose, wakaghenda nyumba kwa Jasoni, wakawahada Paulo na Silasi eri wawaghenze wanduni.

⁶ Ela waghenda wawasowa wakawakurughusa Jasoni na wana wakwetu wamoju hata kwa wabwaa wa muzi wekekema, “Wandu awa wahakila urumengu ghose. Nawo ndamu sawa weja kele muzi ghwetu.

⁷ Naye Jasoni wawakaribisha nyumba kwake, nawo wavunja sheria za Kaisari kwa kughora kwana mzuri mzima aitogho Jesu.”

⁸ Wasikila malagho agha makoghano na Wabwaa wa muzi wakakambo ni chongo.

⁹ Nao wabwaa wa muzi wakamdea Jasoni na wambawe walipe mafungu ghesighililo, nao ima wakawasighilila.

Alye Berea

¹⁰ Nao kughenda kuswa ukwenyi wana wakwetu wakawaghenza Paulo na Silasi Berea. Waghenda wafika wakangila kele sinagogi ya Wayahudi.

¹¹ Wandu wa alye weluo watambukilo kuchumba walye wa Thesalonike. Kwani wesikizile ilagho kwa kuboelo na kila ijua weluo wekekufundisa Mawandiko gha Kuela eri waone ngera ghalye gheluo ghekeghoro ni Paulo ni gha fulo,

¹² Wengi wawe wakadumusa na wake wengi wa Kigiriki wabwaa na walume wakadumusa.

¹³ Ela Wayahudi wa Thesalonike waghenda wasikila kamba Paulo wachila ilagho lya Mlungu Berea nakose, wekeja wakadyowa kukumba sheshe na kushoterea wandu.

¹⁴ Na iyo ngelo yenyi wana wakwetu wakamfumira Paulo hata pwani; ela Silasi na Timotheo wakasigho alye Berea.

¹⁵ Na walye wandu wamufumire Paulo wakaghendanya naye hata Athene. Nao ima wakauya Berea na uvoro ghwa Paulo kamba Silasi na Timotheo wamwirime shashowa selyi idimikagha.

Alye Athene

¹⁶ Nao Paulo ilyi eluo kewadafwa Silasi na Timotheo alye Athene, kahariso ni ngolo kwa kuona selyi ghulya muzi ghojule milungu.

¹⁷ Kwa hung'u kahelea na Wayahudi na wandu wa mbari nzima weluo wekemtasa Mlungu kele sinagogi, na kila ijua kahelea na wandu eluo kekoghana nawo sokoni.

¹⁸ Nao walimu wamoju wa mafundiso gha Epikuro na Stoiki wakadea nganyi naye. Wamoju wakaghora, “Ni kimuni ichi uyu muzimu eghoragha?” Wazima wakaghora, “Ondeoneka sa mundu eghoragha malagho gha milungu ya kigheni?” Weghorire hung'u kwa kukala Paulo oluo kechila malagho gha Jesu na kuzuka.

¹⁹ Kwa hung'u wakamwata Paulo wakamghenza hambiri ya ikoghano lya Areopago na kumuza, “Tanashaile kumanya mafundiso agha maishi ughaghoragha.

²⁰ Kwani malagho ghamoju tisikilagha koghora ni gha kigheni kwetu, nesi tanashaile timanye kutambula kwake”

²¹ Kwa kukala wandu wose wa Athene na wagheni weluo wekekala alye, weluo wekemalila ngelo yawe yose wekehelea na kusikizila malagho maishi.

²² Nao Paulo kakala kimusi hambiri ya Areopago kaghora, “Inyo wandu wa Athene! Naona kamba kwa ngila zose ninyo wandu wemtasa Mlungu.

²³ Kwani ngelo neluo nikesela kele muzi ghwenyu kulola andu mtasilagha, nikaona mazabahu iwandiko, ‘kwa Mlungu semanyikanagha.’ Kwa hung'u uyu mumutasagha simomumanyagha niye mwenyi nimuchililagha malagho ghake.

²⁴ Mlungu uyu aumbile urumengu na kila kindu chio amweni, ni Bwana wa mlunguni na isanga, naye sakalagha kele Hekalu ziwaghalo na mikonu ya wadamu.

²⁵ Hata satumikilogho ni mikonu ya wadamu sa kughamba wanashaile kindu chingi, kwani niye mwenyi ahawagha wadamu umana na muruke na kila kindu.

²⁶ Kufuma kwa mundu mumojori kaumba mbari zose za wandu na kazidea zikale kele urumengu ghose. Naye mwenyi kaika ngelo na maka ya andu wekalagha.

²⁷ Naye odeile hung'u eri wamuhade, na ikadimika wamwone hata ngera ni kwa kuwatawata. Ela kwa fulo yenyi Mlungu sewo kulele na kila mumoju wetu kungi.

²⁸ Ni Selyi mundu mumoju aghora ‘Kwake tio moyo na taghenda na kukala’ Ni selyi mumoju wa wawandiki wenyu aghorire ‘Isi natose nisi wana wake.’”

²⁹ “Na kwa kukala nisi wana wa Mlungu, sitaririkanye kamba tadima kumfwananisa na kindu chingi chideilo ni mdamu, cha zahabu ango cha feza ango cha iwe.

³⁰ Mlungu satalile kungi ngelo zilya wandu weluo siweweni, ela ndamu waghora ni suti wandu wose andu kose warihe.

³¹ Kwani wamalila kuika ijua ejetaghanya urumengu ghose kwa hachi kwa ngila ya mundu amusaghule. Naye kaonyeza mwazi kwa wandu wose kwa kumuzusa uyo mundu kele wafwa.”

³² Nao waghenda kusikila Paulo keghora gha kuzuka kufuma kwa wafwa, wamoju wakaseka; ela wamoju wakaghamba, “Tanashaile tikusikile sena ighulu ya malagho agha.”

³³ Nao Paulo kafuma kele ikoghano.

³⁴ Wandu wamoju wakawatana naye nawo wakadumusa, nawo wamoju wawe weluo ni Dionisio eluo wa Areopago na muke aitogho Damari na wamoju wazima.