Madeo 14 - UVORO GHWALOLI KWA WANDU WOSE

Paulo na Baranaba alye Ikonio

¹ Nao alye Ikonio malagho ghakakala ukwenyi. Paulo na Baranaba wakaghenda kele sinagogi ya Wayahudi, wakahelea hata Wayahudi na Wagiriki wengi wakadumusa.

² Ela Wayahudi walye siwedumuse wakashoterea wandu wa mbari nzima na kughalula ngolo zawe ighulu ya walye wana wakwetu.

³ Nawo watumo wakakala alye luma. Wakaghora gha Bwana siwewesi wogha ghungi. Naye kaghudea uvoro ghwake ghwa mbazi kukala ghwa fulo kwa kuwahawa ndighi yedea wana mwakilimbita na mashiniko.

⁴ Nao wandu wa muzi wakasarikana wamoju kwa Wayahudi na wamoju kwa watumo.

⁵ Nao wandu wa mbari nzima na Wayahudi ngila mojori na vilongozi vawe, wakashaya kuwatirira watumo, kwa kuwalasa na mawe.

⁶ Nao watumo waghenda wamanya wakakimbila Listra na Derbe, mizi ya Lukaonia na isanga lyeimarire.

⁷ Nawo wakachila Ilagho Lyaloli alye.

Paulo na Baranaba alye Listra na Derbe

⁸ Nao alye Listra koluo na mundu mumoju akelemele maghulu hata seluo kedima kughenda kufuma unake ghwake.

⁹ Uyu mundu okalile kitembo kemusikizila Paulo selyi eluo keghora. Paulo amuzighana ushu, kaona wadumusa kamba wadima kubowa.

¹⁰ Kamuza na lwaka lubwaa, “Uka kimusi kwa maghulu ghako.” Naye ulya mundu kauka kimusi kadyowa kughenda.

¹¹ Nao makoghano waona ghalye ghadeilo ni Paulo, wakadyowa kukema kele kiteto cha Kilukonia. “Milungu yaselela na kutijila sa wadamu”

¹² Wakamwita Baranaba Zeu na Paulo wakamwita Hermes, kwa kukala niye eluo mughori mubwaa.

¹³ Nao mkohani wa Zeu uyu Hekalu yawe yeluo shighati ya muzi, kaleta njau na maluwa kele mbengele. Naye ngila mojori na makoghano weshaile kuwafunyila watumo sadaka.

¹⁴ Ela Baranaba na Paulo waghenda wasikila selyi weshaile kudea, wakarashura nguo zawe, wakakimbila kwa makoghano wekekema,

¹⁵ “Kudani mudeagha hung'u? Natose nisi wadamu senyo, Tendemuletela Ilagho lyemughalusa kufuma ivi vindu sivefweni hata kwa Mlungu ewo moyo, uyu aumbile mlunguni na isanga na bahari na vose vio aomweni.

¹⁶ Naye kokale osighile wandu wose waghende kikwawe.

¹⁷ Ela lyingi sasighile kukuonyeza kwa kudea ghaloli, niye amunyesela mvula kufuma mlunguni na viro kele vilimo vake; wanamuhawagha chakulya na kujuza ngolo zenyu maboelo.”

¹⁸ Na kwa malagho agha, kwa wasi, watumo wakawadea makoghano siwawafunyile sadaka.

¹⁹ Nao Wayahudi wamoju wekeja kufuma Antiokia ya Pisidia na kufuma Ikonio, Wakawaghalula makoghano gasi yawe, wakamlasa Paulo na mawe na kumukurughusa hata shighati ya muzi, wekeghelela wafwa.

²⁰ Ela wairimi wakamumara girigo, naye auka kauya kele muzi ghulya. Nao ilyo ikesho, iye na Baranaba wakaghenda Derbe.

Kuwuya Antiokia ya Siria

²¹ Paulo na Baranaba wakachila Ilagho Lyaloli Derbe, na wakadea wengi kukala wairimi. Nao ima wakauya Listra na Ikonio, nama wakaghenda Antiokia ya Pisidia.

²² Nawo weluo wekewafungisa ndighi wairimi na kuwakumba ngolo yekala wa fulo kele idumusi. Wakawauza, “Ni suti tiitile kele masirimo mengi eri tingile kele Uzuri ghwa Mlungu.”

²³ Nawo kele kila ikanisa wakasaghula waghosi; na kwa kulomba na kufunga wakawaika mikonuni kwa Bwana uyu wamudumuse.

²⁴ Nao nyuma ya kuita isanga lya Pisidia, wakafika Pamfulia.

²⁵ Wakachila Ilagho Lyaloli Perga ima wakaghenda Atalia,

²⁶ na kufuma aho wakajoka melini wakauya Antiokia andu weikilo kele mikonu ya Mlungu kwa kazi iyo waikatisa.

²⁷ Nao waghenda wafika Antiokia wakawakoghanya wandu wa ikanisa ngila mojori na kuwaghorera ghose Mlungu adeile kwawe na selyi afungule mjango ghodumusa kwa mbari nzima.

²⁸ Nawo wakakalanya na walye wadumuse kwa ngelo ndele.