Madeo 12 - UVORO GHWALOLI KWA WANDU WOSE

Kutiriro kwa ikanisa kujuzilika

¹ Nao ngelo iyi Mzuri Herode kadyowa kutirira wandu wamoju wa ikanisa.

² Kamuulagha Jakobo wakwawe Johana kwa lufu.

³ Naye aghenda aona kamba ilyi lyawaboela Wayahudi, Kamwata Petro. (Agha ghedeike ngelo ya karamu ya mikate siyengizilo chachu).

⁴ Nao nyuma ya kumwata Petro, wakamungiza kifungoni, kaiko mikonuni kwa warindiri weluo mafungu mane gha askari wane wane, eri wamlinde. Herode oshaile amtaghanye hambiri ya wandu nyuma ya Pasaka.

⁵ Kwa hung'u, Petro kaiko kifungoni, ela ikanisa lyikamlombela Mlungu na ndighi.

Petro kufungulo kifungoni

⁶ Nao kiro chilya cheluo hambiri ya Herode kumufunya shighati kwa wandu, Petro oluo atungure ghati ya warindiri waili. Naye oluo afungilo na minyororo mili, na warindiri wamoju weluo aho shighati ya mjango ghwa kifungoni wekelinda.

⁷ Nao iyo shwa ng'weri malaika wa Bwana kakala kimusi na mlangazi ghukalangaza chilya chumba. Naye malaika kamunyavura kamunula, keghamba, “Uka shashowa.” Nao minyororo ikapotoka kufuma kele mikonu yake.

⁸ Nao Malaika kamuza, “Funga mkowa ghwako na vilatu vako.” Petro kadea ukwenyi, nama malaika kamuza, “Rwara ikoti lyako uniirime.”

⁹ Petro kamwirima shighati ya kifungoni. Naye samanyile kukala agha malaika edeagha ni gha fulo, karirikanya kamba ondeona maono.

¹⁰ Wakaita kwa warindiri wa hambiri, na wa kaili, ima wekeja kele mjango ghwa chuma ghungilagha kele muzi. Mjango ghukarughuka ghwenyi wakafuma. Nao wakawata kughenda na barabara, nao malaika kamusigha Petro.

¹¹ Nao Petro katambukilo ni ghalye ghadeike, kaghora, “Ndamu namanya ni fulo! Bwana wamutuma malaika wake kunivuvula kufuma kele mikonu ya Herode na kufuma ghalye ghose Wayahudi weluo wekekoserea kudea.”

¹² Nao atambukilo, kaghenda kele nyumba ya Mariamu mee Johana Marko. Wandu wengi wekughane alye wekelomba.

¹³ Petro kadaha mjango ghwa shighati, na mtumishi mumoju mchana aitogho Roda keja kutika.

¹⁴ Naye kamanya lwaka lwa Petro, kaboelo hata kalemo ni kurughura mjango, kauya kughorera wandu kamba Petro niye ewo shighati.

¹⁵ Nawo wakamuza, “Uwo na mutu!” Ela iye kajuzila kughora ni fulo. Nawo wakamtumbulila, “Ni malaika wake.”

¹⁶ Ela Petro kajuzila kudaha mjango. Nawo warughura mjango na kumwona wakashinika.

¹⁷ Naye kawakumbila mkonu wanyamale, kawaheleela selyi Bwana amufunyile kifungoni. Nao kawauza, “Mghorereni Jakobo malagho agha ngila mojori na wana wakwetu wose.” Nao kafuma kaghenda andu kuzima.

¹⁸ Nao kuela, warindiri wakangilo ni wogha mubwaa Petro wadeika ije?

¹⁹ Herode kaghora ahado, ela siwedimile kumwona. Kwa hung'u kaghora warindiri wakotelo na kaghora waulagho. Nao nyuma ya agha Herode kafuma Judea kaghenda kakala Kaisarea kwa ngelo.

Kifwa cha Herode

²⁰ Naye Herode owasililo na ndighi ni wandu wa Tiro na Sidoni, kwa hung'u wanguchi wakaghenda kumwona. Hambiri wakasikilana na Blasto, uyu eluo mubwaa wa nyumba ya mzuri awatarie; wakaghenda kwa Herode kulomba sere, kwa kukala isanga lyawe lyeluo lyikepata chakulya kufuma isanga lya mzuri.

²¹ Nao kele ijua lyesaghulo, Herode karwara nguo zake za kiuzuri, kakala kitembo kele kifumbi cha uzuri, kahelea na walye wandu.

²² Nawo wandu wakaghora na lwaka lubwaa, “Ni lwaka lwa mlungu si lwa mdamu ungi.”

²³ Nao iyo ngelo yenyi malaika wa Bwana kamukwita Herode, kamgwisha kwa kulegha kumuhawa Mlungu ishima, kalumo ni mvunyu, kafwa.

²⁴ Nao ilagho lya Mlungu lyikajuzila kuera na kuzeguwa.

²⁵ Nao Baranaba na Saulo waghenda wamalila kazi yawe wakauya kufuma Jerusalemu ngila mojori na Johana Marko.