Madeo 11 - UVORO GHWALOLI KWA WANDU WOSE

Maelezo gha Petro kwa ikanisa lya Jerusalemu

¹ Nao watumo na wana wakwetu weluo Judea wakasikila kamba wandu wa mbari nzima nawose wawata ilagho lya Mlungu.

² Kwa hung'u, Petro aghenda auya Jerusalemu, walye weluo wekeshaya wandu na mbari nzima wachigho wakamunung'unikila,

³ wekeghamba, “Uwe wanangilile kele nyumba za wandu wa mbari nzima siwechilo na kwalyanya nawo.”

⁴ Nao Petro kawaghorera mwazi mwazi ghose ghadeike kufuma kudyowa.

⁵ “Neluo nikelomba kele muzi ghwa Jopa, nao nikaona iono. Kele iono ilyi, neonile kindu chikeselela kufuma mlunguni sa nguo mbwaa iwo na mbembe ine, ikamanga kavui nemi.

⁶ Nikazighana awo mweni kwake, nikaona nyamandu zifugogho na nyamandu za isakeni na nyamandu zisogagha na nyonyi za isakeni.

⁷ Nao nikasikila lwaka lukeniuza, ‘Petro uka, ushinje na ulye.’

⁸ Ela nikaghora, ‘Hata Bwana, kwani lyingi silyile kindu chingi chiwase ango chiluwe.’

⁹ Nao lwaka lukeja sena kufuma mlunguni lukeghamba, ‘Swachidee kindu chieleso ni Mlungu kukala chiluwe.’

¹⁰ Agha ghanadeike mandu matatu na kudua chilya kilambo chikauya noko ighulu mlunguni.

¹¹ Nao iyo ngelo yenyi wandu watatu wekeja hata kele ilya nyumba neluo nikekala watumo kufuma Kaisarea.

¹² Nao Roho kanuza nighendanye nawo samuke. Wana wakwetu awa watandatu tikairimana kufuma Jopa hata Kaisarea, tikangila kele nyumba ya Kornelio.

¹³ Naye katighorera selyi amwonile malaika nyumba kwake kemuza, ‘Tuma mundu Jopa akupang'ile mundu aitogho Simoni Petro.

¹⁴ Naye ujekughorera malagho ghekudea uwe na nyumba yako yose mukile.’

¹⁵ Nao nidyowa kughora ukwenyi, Roho wa Kuela kawaselela selyi kwenyi atiselelele isi.

¹⁶ Niko nikakumbuka selyi Bwana eghorire, ‘Johana obatize na meji, ela inyo mjebatizo na Roho wa Kuela.’

¹⁷ Ndamu ikakala Mlungu wanawahawile wandu wa mbari nzima inosi lyilya lyenyi atihawile isi tighenda timudumusa Bwana Jesu Kristo. Imi nimi ani hata niisane na Mlungu?”

¹⁸ Nao waghenda wasikila agha wakanyamala, wakamlika Mlungu wekeghamba, “Mlungu wawahawa wandu wa mbari nzima nawose ulalo ghoriha na kukala mana.”

Ikanisa lya Antiokia

¹⁹ Nao walye wesaghilesaghile kwa undu ghwa matiriro ghajileja nyuma ya kuulagho kwa Stefano. Wamoju wawe wakaghenda hata wakafika Foinike, Kupro na Antiokia wekechila Ilagho yaloli kwa Wayahudi tu.

²⁰ Ela wamoju wa walye wadumuse, wandu wa Kupro na Kurene, wakaghenda Antiokia wakaeresa uvoro kwa Wagiriki, wakawachilila Ilagho lyaloli lya Bwana Jesu.

²¹ Nao kwa kukala weluo na ndighi za Bwana, wakadea wandu wengi wadumuse na kumughalukila Bwana.

²² Nao uvoro ughu ghukafikila ikanisa lya Jerusalemu; kwa hung'u wakamtuma Baranaba Antiokia.

²³ Nao afika na kuona selyi Mlungu awabarikia wandu, kaboelo, kawakumba ngolo, wakale wadumusiliki na wafulo kwa Bwana sikwewesi kuuya nanyuma.

²⁴ Baranaba oluo mundu waloli, ajule Roho wa Kuela na idumusi. Na wandu wengi wakamghalukila Bwana.

²⁵ Nao Baranaba kaghenda Tarso kumuhada Saulo.

²⁶ Naye aghenda amwona, kejanya naye Antiokia. Na kwa mwaka mlanzi wose waili wakakoghana na wandu wa ikanisa na kufundisa wandu wengi. Nako alye Antiokia niko wairimi wadyowile kuito Wakristo.

²⁷ Nao ngelo ilya wekeja wana tondolo Antiokia kufuma, Jerusalemu.

²⁸ Mumoju wawe aitogho Agabo kakala kimusi kwa ndighi za Roho katondola kamba njala mbwaa iwo kavui kuja kele isanga lyose. (Agha ghekeja ngelo Klaudio eluo kewatala).

²⁹ Nawo walye wairimi wakadumusilana kamba kila mumoju wawe afunye selyi edimagha utari ghowaghenzela wana wakwetu awo weluo wekekala Judea.

³⁰ Nawo wakadea hung'u, wakatumana pesa kwa waghosi wa ikanisa kwa mikonu ya Baranaba na Saulo.