Madeo 1 - UVORO GHWALOLI KWA WANDU WOSE

¹ Kwa Theofilo, Kele chuo cha hambiri newandike ighulu ya malagho ghose Jesu adeile na kufundisa kufuma kudyowa kazi yake,

² hata lyilya ijua ajosilo mlunguni. Hambiri sejosilo mlunguni kawahawa malaghizo kwa ngila ya Roho wa Kuela walye Watumo ewasaghule.

³ Kwa majua mirongo mine nyuma ya kifwa chake kakuonyeza kwawe kengi eri awamanyise kamba fulo uwo moyo. Wakamwona na kuhelea nawo gha Uzuri ghwa Mlungu.

⁴ Nao ilyi weluo ngila mojori kawauza, “Simwafume Jerusalemu, ela mudafurire inosi mulagilo ni Aba ilyi nimughorere.

⁵ Kwani Johana wanabatize kwa meji, ela inyo mujebatiza kwa Roho wa Kuela nyuma ya majua machache.”

Jesu kujoka mlunguni

⁶ Nao Watumo waghenda wakoghana na Jesu wakamkotela, “Bwana, ado iyi ngelo niyo uwaujilagha Waisraeli uzuri?”

⁷ Jesu kawauza, “Ngelo na vilimo vio isi ya udimo ghwa Aba, na si ighulu yenyu kungi kumanya ghejekala nini.

⁸ Ela ilyi Roho wa Kuela amjila mjepata ndighi zekala washahidi wangu Jerusalemu na Judea yose na Samaria na urumengu ghose.”

⁹ Nao aghenda kughora hung'u, katwalo noko mlunguni wekelolila; iwengu lyikamvisa siwamwone sena.

¹⁰ Nao ilyi weluo wekelola mlunguni ngelo eluo keghenda, kukeja wandu waili warwere nguo za mnyange wakakala ghati yawe.

¹¹ Wakawauza, “Inyo wandu wa Galilaya, kudani mwakala kimusi mukezighana mlunguni? Uyu Jesu mwamona keghenda mlunguni kufuma kwenyu, mjemwona sena keja kufuma mlunguni selyi kwenyi mwamona keghenda.”

Mathiasi kusaghulo kuuse ulalo ghwa Juda

¹² Nao Watumo wakauya Jerusalemu kufuma mghondi ghwa Mizeituni ghuo kavui na Jerusalemu sa charo cha kilomita mojori hung'u.

¹³ Nawo waghenda wafika, wakaghenda kele chumba cha gorofeni ichi weluo wekekala; Petro, Johana, Jakobo na Andrea, Filipo na Thoma, Bartholomayo na Matayo, Jakobo mwana wa Alfayo, Simoni Zelote na Juda mwana wa Jakobo.

¹⁴ Nawo wose, kwa ngolo mojori, wakakoghana kulomba ngila mojori na wake, na Mariamu mee Jesu na wana wakwawe.

¹⁵ Nao ghalye majua Petro kauka kimusi kele ikoghano lya walye wedumuse, sa wandu ighana na mirongo mili, kawauza,

¹⁶ “Wana wakwetu, yeluo ni suti Mawandiko gha Kuela ghakatile, ghaghoriro ni Roho wa Kuela, kwa ngila ya Daudi, ighulu ya Juda uyu awalongoze awa wamwatile Jesu.

¹⁷ Kwani Juda oluo mumoju wetu asaghulo kwa utumishi ghwetu.”

¹⁸ (Naye Juda kwa pesa azipatile kwa ngila ya ulaghelaghe ghwake kaghula mbuwa, nao kabuduka kapaika na matumbo ghake ghakafuma.

¹⁹ Nawo wandu wose weluo Jerusalemu wakamanya uvoro ughu na kuiita ilya mbuwa Akeldama kimunzawe, kutambula kwake “Mbuwa ya Bighati.”)

²⁰ “Kwani yanawandiko kele chuo cha Zaburi; ‘Nyumba yake ikale nduu; na mundungi sakale aho mweni.’ Sena yanawandiko: ‘Mundu mzima ause ulalo ghwake ghwa utumishi.’

²¹ Kwa hung'o mumoju wa wandu eluwanyo nesi ngelo Bwana Jesu eluo ngila mojori nesi,

²² kufuma kudyowa ubatizi ghwa Johana hata ijua Jesu ausilo kufuma kwetu, yamfweni akale mushahidi wa kuzuka kwake.”

²³ Nao wakasaghula wandu waili: Josefu eluo keito Barsaba ango Justo, na Mathiasi.

²⁴ Nao wakalomba wekeghamba, “Bwana uwe wanaweni ngolo za wandu wose, kwa hung'u tionyeze ni uwo kele awa wandu waili wamusaghula,

²⁵ eri awate utumishi sa mtumo ulalo ghwa Juda uyu aghusighile kaghenda ngila zake mwenyi.”

²⁶ Nao wakakwita kura ikampata Mathiasi, naye kajuzilo kwa walye watumo ikumi na mumoju.