Luka 9 - UVORO GHWALOLI KWA WANDU WOSE

Jesu kutuma wairimi ikumi na waili

¹ Nao Jesu kawapang'a wairimi ikumi na waili andu kumojori na kuwahawa ndighi na udimo ghogusa pepo zose na kuboesa makongo.

² Naye kawatuma kuchila gha Uzuri ghwa Mlungu na kuboesa wakongo.

³ Kawauza, “Simwatwale kindu chingi mketamba, simwatwale mndata, hata kikuchu, hata chakulya, hata pesa, na simwarware nguo mbili.

⁴ Na nyumba iyo yose mungilagha, mkale alyenyi hata mfume alye.

⁵ Na andu kose simohokero, mkefuma ghulya muzi mughungudule vumbi iwo kele nywayo zenyu ikale ushuhuda kwawe.”

⁶ Nao wakafuma wakaghenda mizi mizi wekechila ilagho lyaloli na kuboesa wakongo.

Herode kutambo ni malagho

⁷ Nao Mzuri Herode kasikila ghose ghadeilo, naye kakirimua, kwa kukala wandu weluo wekeghora kamba Johana Mubatizi wazuka.

⁸ Na wamoju wekeghora Elija waonekana, na wazima kughamba ni mumoju wa wana tondolo azuka.

⁹ Herode kaghora, “Johana nanampasile chongo, ela uyu nisikilagha malagho ghake nani?” Naye kalola ngila yemuona Jesu.

Jesu kulyisa walume elfu sanu

¹⁰ Nao watumo waghenda wauya, wakamghorera Jesu ghose wadeile. Naye kawatwala kaghendanya nawo wenyi hata muzi ghwa Bethsaida.

¹¹ Nao makoghano wamanya wakamwirima. Naye kawahokera na kuwaghorera ilagho lya Mlungu na kuwaboesa walye weshaile kuboeso.

¹² Nao kudyowa kuswa, walye wairimi ikumi na waili wekeja wakamuza, “Wauze makoghano waghende ngila zawe, waghende mizi mizi na mbweni wakupatile chakulya na andu kolala, kwani aha tio ni andu kwa chanya.”

¹³ Ela Jesu kawauza, “Wahaweni chakulya walye.” Nawo wakaghora, “Tio na mikate misanu na makumba maili tu aha, ngera tighende tighule chakulya chekata awa wandu wose.”

¹⁴ (Kwani koluo wandu elfu sanu alye.) Nao Jesu kawauza wairimi wake, “Kaliseni wandu kitembo visungu visungu va wandu mirongo misanu.”

¹⁵ Nao wakadea selyi wauzilo, wakawakalisa wose kitembo,

¹⁶ Nao Jesu kausa mikate misanu na makumba maili, kalola mlunguni, kaibarikia na kuivunja, kawahawa wairimi wake, nawo wakawahawa makoghano.

¹⁷ Nao wose wakalya wakaghuta. Wairimi wakashowa vikapu ikumi na vili va vilya vihangalike.

Petro kumghora Jesu ni Masihi

¹⁸ Nao ijua imoju ilyi Jesu eluo kelomba keng'weri ngelo ekezanye na wairimi wake, kawakotela, “Wandu wanaghoragha imi nimi ani?”

¹⁹ Nawo wakamuza, “Johana Mubatizi, wamoju waghora Elija, na wazima waghora kamba nuwe mumoju wa wana tondolo azuka.”

²⁰ Naye kawauza, “Ela inyo mwaghora imi nimi ani?” Petro katumbulila, “Uwe nuwe Masihi wa Mlungu,”

Jesu kughora ighulu ya kusirima na kufwa kwake

²¹ Nao Jesu kawaonya siwamughorere mundungi malagho agha,

²² kawauza, “Mwana wa Mdamu ni suti atiriro malagho mengi na alegho ni waghosi na wakohani na walimu wa Sheria, aulagho, nao ijua lya katatu azuso.”

²³ Nao kawauza wose, “Ngera mundungi ashaya kuniirima, ni suti akukane mwenyi, atuke msalaba ghwake kila ijua na aniirime.

²⁴ Kwani uwo wose ashaile kukiza umana ghwake ughuhaitisa, na uwo wose ehaitisagha umana ghwake kwa undu ghwangu, ughukizagha.

²⁵ Kwani mundu upatagha faida muni ilyi apata urumengu ghose na alaghaze ango akuhaitise mwenyi.

²⁶ Kwani uwo wose enifwighagha waya imi na malagho ghangu, naese Mwana wa Mdamu ujemufwa waya ngelo ekujagha na ubwaa ghwake na ubwaa ghwa Tatie na ghwa wana malaika wa kuela.

²⁷ Ela Fulo namuza, kuo wamoju weo kimusi aha siwetowagha kifwa hata waona Uzuri ghwa Mlungu.”

Jesu kughaluka fwana

²⁸ Nao majua manane nyuma ya kughora agha, Jesu kawatwala Petro na Johana na Jakobo, kaghendanya nawo mughondini kulomba.

²⁹ Nao ilyi eluo kelomba kaghaluka fwana yake na nguo zake zikakala za munyange see zikang'alang'ala.

³⁰ Nao alyenyi wandu waili wakaonekana wekehelea naye, Musa na Elija.

³¹ Nawo wewoneke na ubwaa na weluo wekehelea ighulu ya kifwa chake ichi cheluo chikatisogho Jerusalemu.

³² Naye Petro na walye wekezanye weluo na haring'a nyingi, nawo waghenda wauka wakaona ubwaa ghwake na ghwa walye wandu waili wekalanye kimusi.

³³ Nao ilyi walye wandu waili weluo wekemsigha waghende, Petro kamuza Jesu, “Bwana, Ni kirani isi tio aha, tiwaghale vianda vitatu, kimoju chako, kimoju cha Musa na kimoju cha Elija.” Kwani semanyile lyeghora.

³⁴ Naye Petro ilyi eluo keghora hung'u iwengu lyikeja lyikawafinika na kiju chake, nao wairimi wakangilo ni wogha wabulo ni kiju cha iwengu.

³⁵ Nao lwaka lukafuma iwenguni lukeghamba, “Uyu ni Mwanwangu msaghulo wangu, musikileni.”

³⁶ Nao lwaka lumalila kughora, Jesu kasigho mwenyi. Nao wakanyamala hata siwaghorere mundungi ilya ngelo agha waonile.

Jesu kumuboesa mwanake eluo na pepo

³⁷ Nao ilyo ikesho lyake, waghenda waselela kufuma mghondini ikoghano ibwaa, wakamumarira Jesu.

³⁸ Nao mundu mumoju kele makoghano kakema keghamba, “Mwalimu, nakulomba umulole mwanwangu, kwani ni mumojori!

³⁹ Naye ngelo pepo yamruha, iyo ngelo yenyi yamkemeza na kugwa vigwa na kufunya mafulo na mlomu, nayo siyimsighagha shoshoa.

⁴⁰ Nemi newalombile wairimi wako waifunye, ela wakalemo.”

⁴¹ Jesu katumbulila, “Inyo simodumusagha na kivali chisikiriwe, nikalanyagha nenyo hata nini nikerumaghia? Mlete mwana wako aha.”

⁴² Nao ilyi ulya mwanake eluo keja kwake, pepo ikamugwisha na kumuruha. Ela Jesu kaikemela pepo na kumuboesa ulya mwanake, na kumuuja kwa tatie.

⁴³ Nawo wandu wose wakashiniso ni udimo ghwa Mlungu. Nao ilyi weluo wekeshiniso ni ghalye ghose adeile, Jesu kawauza wairimi wake,

Jesu kughora sena ighulu ya kifwa chake

⁴⁴ “Sikileni agha nighoragha ndamu; Mwana wa Mdamu ungizogho kele mikonu ya wandu.”

⁴⁵ Ela wo siwatambukilo ni ghalye eluo keghora, kwani ghevisike kwawe na siwadimile kutambula. Nawo wakawogha kumkotela chilya eluo keghora.

Nani mubwaa?

⁴⁶ Nao kukakala na nganyi ghati ya wairimi kamba nani wawe ewo mubwaa.

⁴⁷ Naye Jesu aghenda amanya maririkanyo ghawe, kamwata mwanake, kamwika kavui naye,

⁴⁸ kawauza, “Uyu wose emuhokeragha mwanake uyu, wanihokera imi, na uwo wose enihokeragha imi, wamuhokera uyu anitumile. Kwani uyu ewo mchache kwenyu inyose niye ewo mubwaa.”

Uwo seo mumaiza ni mgheni wenyu

⁴⁹ Nao Johana katumbulila, “Bwana tanamwonile mundu kegusa pepo kwa izina lyako, tikamwima, kwa kukala sairimanagha nesi.”

⁵⁰ Ela Jesu kamuza, “Simwamwime, kwani uyu seo kinyume chenyu uwo gasi yenyu.”

Muzi ghwa Samaria kulegha kumuhokera Jesu

⁵¹ Nao ngelo ifika avui ya Jesu kujoka mlunguni, kadyowa kughenda Jerusalemu.

⁵² Naye katuma wandu hambiri yake kele muzi ghumoju ghwa Samaria wamwikile kila kindu kirani.

⁵³ Ela wandu wakalegha kumuhokera, kwa kukala woluo keita kughenda Jerusalemu.

⁵⁴ Nao wairimi wake Jakobo na Johana waona agha, wakamuza, “Bwana, wanashaile tilombe moto kufuma mlunguni ghuwaishe, selyi Elija edeile?”

⁵⁵ Ela iye kawaghalukila kawakemela kewauza, “Simumanyagha ni roho muni muo nayo, kwani Mwana wa Mdamu sajile kuhaitisa wandu, ela kukiza.”

⁵⁶ Nao wakafuma wakaghenda muzi muzima.

Washaile kukala wairimi wa Jesu

⁵⁷ Nao ilyi weluo wekeghenda ngila yawe, mundu mumoju kamuza, “Nikuirimagha kila andu ughendagha.”

⁵⁸ Jesu kamuza, “Kwehe zio na mirumo yawe na nyonyi vichunguri, ela Mwana wa Mdamu sawesi andu kotungura na kuzumua.”

⁵⁹ Nao kamuza mundu mumoju, “Niirime” Ela kamuza, “Bwana, sigha nighende nimuzike aba.”

⁶⁰ Ela Jesu kamuza, “Sigha wafwa wazike wafwa wawe, ela uwe ghenda na uerese Uzuri ghwa Mlungu.”

⁶¹ Mundu mumoju kamuza “Bwana nikuirimagha, ela jako nisighe niwalage wandu wa nyumba kwangu.”

⁶² Jesu kamuza, “Sikwesi mundungi edyowagha kulima na azighane nanyuma efwanagha kwa Uzuri ghwa Mlungu.”