Luka 8 - UVORO GHWALOLI KWA WANDU WOSE

Wake weluo wekemwirima Jesu

¹ Nao nyuma ya agha, Jesu kaita kele mizi mizi kechila Ilagho lyaloli lya Uzuri ghwa Mlungu. Naye wokezanye na wairimi ikumi na waili,

² na wake wamoju awaboese pepo na manyongi. Mariamu (aitogho Magdalene) afunyilo pepo mfungate

³ na Joana, muke wa Kuza, eluo mtumishi wa Herode, na Susana na wazima wengi, weluo wekewatumikila na mali zawe zenyi.

Ikataniso lya mwandi mbeu

⁴ Nao ilyi makoghano weluo wekemjila kufuma mizi mizi, Jesu kaghora ikataniso ilyi;

⁵ Mwandi oghendile kuwanda mbeu, na ilyi eluo kewanda, zimoju zikapotoka ngileni zikalatilo ni wandu, nazo zikaduo ni nyonyi.

⁶ Zimoju zikapotoka kele lwala, zikafuma na kwa kusowa meji zikaoma.

⁷ Zimoju zikapotoka miyeni na miya ikazeguanya nazo ikazisira.

⁸ Zimoju zikapotoka kele msanga ghwaloli, zikazeguwa, zikavala kila moju ighana, Naye aghenda kughora hung'u, kaghamba, “Uyu ewo na masikilo ghesikila asikile.”

Kutambula chausa cha Ikataniso

⁹ Nao wairimi wakamkotela kutambula kwa ilyi ikataniso,

¹⁰ Naye Jesu kaghora, “Inyo mwanahawilo kumanya ngasu za Uzuri ghwa Mlungu, ela wazima ni kwa makataniso, eri hata wakalola siwaone na wakanasikile siwatambukilo.

Jesu kutambula ikataniso lya mwandi mbeu

¹¹ “Uku niko kutambula kwa ikataniso: Mbeu ni ilagho lya Mlungu.

¹² Zilya zepotoke ngileni, ni wandu wesikilagha ilagho, na Shetani eje alyifunye ilagho ngoloni kwawe, eri siwejedumusa wakile.

¹³ Na zilya zipotoke lwaleni ni walye wesikilagha ilagho na kulyihokera kwa kuboelo, ela siwawesi miriginga, wadumusa kwa ngelo, ela ngelo ya matimo ikeja wasigha idumusi.

¹⁴ Na zilya zepotoke miyeni ni walye wesikilagha ilagho, ela ngelo weghenda ngila yawe wasiro ni malagho na mali na mabwelo gha ughu umana, nawo walemo ni kuvala mavalo.

¹⁵ Na zilya zepotoke kele msanga ghwaloli ni walye wesikilagha ilagho na kulyiwata ngoloni na kulyidea. Nawo wavala mavalo kwa kurumaghia.

Kubula taa ibamba

¹⁶ “Sikwesi mundungi awashagha taa na kuibula ibamba, ango kuika ulilini mwenimweni, ela wanaiikagha ighulu ya andu koika taa, eri wandu wengilagha waone mlangazi.

¹⁷ “Kwani sikwesi kindu chingi chivisilo sicheonekagha, hata chio kivisoni sichemanyogho na kuleto mlangazini.

¹⁸ “Kwa hung'u kulindeni na selyi musikizilagha. Kwani uyu ewo navo ujejuzilo na uyu sewesi hata ichi ewo nacho ujesoko.”

Mee Jesu na wana wakwawe

¹⁹ Nao mee Jesu na wana wakwawe wekeja kwake, ela siwadimile kumfikila kwa undu ghwa makoghano.

²⁰ Naye kaghorero, “Meo na wana wakwenyu weo kimusi shighati, nawo wanashaile kukuona.”

²¹ Ela Jesu kawauza, “Mawe na wana wakwetu ni walye wesikilagha ilagho lya Mlungu na kulyidea.”

Jesu kunyamaza mbeo mbwaa

²² Nao ijua imoju Jesu kajoka kele mashua ngila mojori na wairimi wake, naye kawauza, “Tiwambuke chambuko cha bahari.” Nao wakadyowa kuwambuka.

²³ Nao ilyi weluo wekeghenda baharini, Jesu kawato ni haring'a. Nao kukeja mbeo mbwaa baharini, na mashua ikadyowa kungilo ni meji hata wakakala ndengweni.

²⁴ Nawo wakaghenda wakamunula, wekemuza, “Bwana Bwana tendehaita!” Nao kauka na kuikemela mbeo na mivomivo ya meji, nayo ikanyamala na kukanyamala chwi.

²⁵ Naye kawauza, “Lyio hiyo idumusi lyenyu?” Nawo kwa kungilo ni wogha na kushinika wakauzana wenyi, “Nani uyu ado, hata eghoranyagha na mbeo na meji navo vimusikile?”

Jesu kuboesa mundu wa pepo

²⁶ Nao wakafika pwani ya isanga lya Wagerasi, yeluo chambuko cha Galilaya.

²⁷ Naye ilyi eluo keselela pwani, kakoghana na mundu wa pepo kufuma kele muzi. Naye kwa ngelo ndele seluo kerwara nguo ingi, na seluo kekala nyumba, ela oluo kekala mbireni.

²⁸ Naye aghenda amwona Jesu, kakema na kumugwila hambiri, keghora na lwaka lubwaa, “Nini udeagha nemi, Jesu Mwana wa Mlungu wa Ighulu? Nakulomba swanitirire.”

²⁹ Kwani woluo aiuza pepo imufume ulya mundu. Kwani ngelo nyingi yemwatile, na kwa kumulinda, wakamfunga na minyororo na vigogo, ela kaivunja kakimbizo ni pepo kireti.

³⁰ Nao Jesu kamukotela, “Izina lyako nuwe ani?” Naye kaghora, “Legioni” kwani wongililo ni pepo nyingi.

³¹ Nao pepo zikamlomba sazighenze andu kuwase.

³² Nao anyalye lughongoni koluo na uranu ghwa nguluwe ghukelisa. Nazo zikamlomba azidumusile zighende zizingile. Naye kazidumusila.

³³ Nao zilya pepo zikamufuma ulya mundu zikangila kele nguluwe, na uranu ghose ghukadoromoka lughongoni lukangila kele bahari, zikafwa mejini.

³⁴ Nao walisa waghenda waona agha, wakakimbila, wakaghenda kuwaghorera wandu wa muzi na lyilya isanga.

³⁵ Nao wandu wekeja eri waone ghalye ghadeika, nawo wakamjila Jesu, na kumwona ulya mundu afumo ni pepo ewo kitembo avui na Jesu, arwara nguo na ewo na akili zake, nawo wakangilo ni wogha.

³⁶ Nao walye waonile wakawaghorera selyi ulya mundu wa pepo aboeso.

³⁷ Nao wandu wose wa isanga lya Gerasi wakamlomba afume mzawe, kwani wengililo ni wogha mubwaa. Kwa hung'o Jesu kajoka mashua kauya.

³⁸ Ulya mundu eluo na pepo kamlomba waghendanye, ela Jesu kamuuja kemuza,

³⁹ “Gala kaya na uwaghorere wandu agha Mlungu akudeila.” Nao kaghenda keeresa uvoro kele muzi ghose gha ghalye Jesu amdeilile.

Mchana wa Jairo na muke awatile nguo ya Jesu

⁴⁰ Nao Jesu aghenda auya, makoghano wakamuhokera kirani, kwani weluo wekemdafwa.

⁴¹ Nao keja mundu mumoju aitogho Jairo, eluo mubwaa wa sinagogi, kagwa maghuluni kwa Jesu, kamlomba aghende nyumba kwake,

⁴² woluo na mwana wake mumojori, eluo na miaka ikumi na mili, naye woluo avui na kufwa. Nao ilyi eluo keghenda wandu wakamtindirira.

⁴³ Na koluo na muke mumoju eluo kefumo ni bighati kwa miaka ikumi na mili, naye katumia mali yake yose kwa waghanga na hata sikwesi ungi wawe adimile kumuboesa.

⁴⁴ Nao keja nanyuma ya Jesu, kapeta hemu ya nguo yake, na iyo ngelo yenyi bighati yake ikaoma.

⁴⁵ Nao Jesu kakotela, “Nani aniwata?” Nao wandu wose waghenda wakana, Petro na walye wekezanye wakamuza, “Bwana, makoghano wakumara na kukutindirira!”

⁴⁶ Ela Jesu kaghora, “Kuo na mundu anipeta, kwani namanyiso ni ndighi kunifuma.”

⁴⁷ Nao ulya muke aghenda aona wamanyo, keja kesukosuko, kagwa hambiri ya Jesu, kamghorera ghose hambiri ya wandu wose ni kudani amwata na selyi aboa iyo ngelo yenyi.

⁴⁸ Naye Jesu kamuza, “Mwanwangu, Idumusi lyako lyakuboesa, ghenda na sere.”

⁴⁹ Nao ilyi Jesu eluo keghora, mundu mumoju kufuma nyumba kwa Jairo keja kamuza, “Mwana wako wafwa, swamusirimise Mwalimu.”

⁵⁰ Ela Jesu aghenda kusikila katumbulila, “Swawoghe; uwe dumusa tu, na ubowagha.”

⁵¹ Nao aghenda afika nyumba, semudumusile mundungi kungilanya naye, sala Petro, Johana na Jakobo na mee na tatie ulya mwanake.

⁵² Nawo wandu wose weluo wekelila na kushighira. Ela Jesu kawauza, “Simwalile, kwani mwana safwile kungi, ondetungura.”

⁵³ Ela wakamseka, kwani wemanyile wafwa.

⁵⁴ Ela Jesu kamwata mkonu, kamupang'a, “Mwanwangu, uka.”

⁵⁵ Nao roho yake ikamuila, kauka iyo ngelo yenyi, naye Jesu kaghora ahawo kindu chelya.

⁵⁶ Wavali wake wakashinika, ela Jesu kawauza “Siwamghorere mundungi ghalye ghadeika.”