Luka 7 - UVORO GHWALOLI KWA WANDU WOSE

Jesu kuboesa mtumishi wa ofisa wa Roma

¹ Nao Jesu aghenda amalila kuhelea na wandu, kaghenda Kapernaumu.

² Nao ofisa mumoju alye, woluo na mtumishi wake amushaile eluo mkongo avui na kufwa.

³ Naye aghenda kusikila uvoro ghwa Jesu, katuma waghosi wa Kiyahudi kumlomba eje amuboese mtumishi wake.

⁴ Nawo weja kwa Jesu wakamungolongola wekeghamba, “Yanafweni fulo umudeile hung'u.

⁵ Kwani wanashaile mbari yetu na niye atiwaghalile sinagogi yetu.”

⁶ Kwa hung'u Jesu kaghendanya nawo. Nao afika kavui na nyumba, ulya ofisa katumana wagheni wake, kumuza, “Bwana, swakusirimise, kwani imi sifweni uwe ungile nyumba kwangu.

⁷ Kwa hung'u neonile sifweni kuja imi mwenyi kwako. Ela ghora ghore tu na mtumishi wangu ubowagha.

⁸ Kwani namose nio na nguma ighulu ya askari isi yangu, nemi namuza uyu, ‘Ghenda!’ Naye waghenda na mumoju, ‘Njuu,’ naye weja, na kwa mtumishi wangu, ‘Dea hung'u,’ naye wadea.”

⁹ Nao Jesu aghenda asikila agha kashinika, kaghaluka na kuwauza makoghano weluo wekemwirima, “Fulo namuza, na lyingi sionile idumusi selyi kele Israeli.”

¹⁰ Nao walye wetumilo wauya nyumba, wakamdoka ulya mtumishi abowa.

Jesu kuzusa mwana wa muke afwililo ni mlume

¹¹ Nao nyuma ya agha, Jesu kaghenda muzi ghumoju ghuitogho Naini keirimana na wairimi wake na ikoghano ibwaa.

¹² Naye aghenda afika mjango ghwa muzi, kakoghana na wandu watuka mundu afwile, eluo mwana mumojori wa mee, afwililo ni mlume wake na wandu wengi wa muzi weluwanyo naye.

¹³ Nao Bwana aghenda amwona kamfwila waya, kamuza, “Swalile.”

¹⁴ Naye kaghenda kawata isanduku lyemtukile na walye wandu welyitukile wakamanga. Jesu kaghora, “Mtawana nakuza uuke!”

¹⁵ Nao ulya mundu efwile kauka kadyowa kughora. Naye Jesu kamhawa mee.

¹⁶ Nao wose wakangilo ni wogha na kumlika Mlungu wekeghamba, “Tondolo mubwaa watifumila na Mlungu weja kukiza wandu wake!”

¹⁷ Nao uvoro ghwake ghukaera kele isanga lyose lya Judea na avui yake.

Watumo kufuma kwa Johana Mubatizi

¹⁸ Nao wairimi wa Johana wakamghorera Johana malagho agha ghose.

¹⁹ Naye Johana kapang'a wairimi wake waili kawatuma kwa Bwana kumkotela, “Uwe nuwe uyu ekujagha ango timdafwe mzima?”

²⁰ Nawo walye wandu waghenda weja kwa Jesu wakamuza, Johana Mubatizi watituma kwako kukotela, “Ado nuwe ulya ekujagha ango tidafurire mzima?”

²¹ Nao alyenyi Jesu kaboesa wengi weluo na makongo na marazi na pepo na wengi weluo vifondo kawadea waone.

²² Nao kawatumbulila, “Ghendeni mumughorere Johana agha mwaona na kusikila. Vifondo waona, wakelemele waghenda, weo na ukongo ghwa ukoma waombochoka, awa siwesikilagha wasikila, wafwile wazuso na wakiwa wachililo Ilagho Lyaloli.

²³ Na uwo baha uyu mundu sekwalo kwa undu ghwangu.”

²⁴ Nao walye watumilo ni Johana waghenda, Jesu kadyowa kughora na makoghano ighulu ya Johana, “Nini moghendile kulola kireti? Lunyasi lukesheghesho ni mbeo?

²⁵ Nini ndamu mughendile kulola? Mundu arwere nguo zaloli? Loleni awa warwara nguo zaloli na walyighagha kirani wanakalagha kele nyumba za wazuri.

²⁶ Nini ndamu mughendile kulola? Ni tondolo-ba? Ee, niko kwenyi na aisile tondolo.

²⁷ Uyu niye awandikilo, ‘Loleni namtuma mtumo wangu hambiri yangu, uyu eboesagha ngila zenyu.’

²⁸ Nemi namuza, sikuwesi mundungi avelo ni muke ewo mubwaa kumwisa Johana, sala uyu ewo mchache kele Uzuri ghwa Mlungu niye ewo mubwaa kumwisa iye.”

²⁹ Nawo wandu wose wasikila agha ngila mojori na wafunyi kodi, wakamkasa Mlungu, kwa kukala webatizo na ubatizo ghwa Johana.

³⁰ Ela Wafarisayo na walimu wa Sheria weleghile mashayo gha Mlungu kwa kulegha kubatizo ni Johana.

³¹ Jesu kaghora, “Ndamu niwafwananisagha na kimuni wandu wa kivali ichi? Wanafweni ije?

³² Wendekala sa wanake weo kitembo sokoni na wepang'anagha, ‘Tanamkwitilile ngoma mkalegha kuvina, Tanashighire mkalegha kulila.’

³³ Kwani Johana Mubatizi wojile selyighagha mkate hata kunwa divei nenyo mkaghamba, ‘Uwo na pepo.’

³⁴ Mwana wa Mdamu weja kelya na kunwa, nenyo mwaghamba, ‘Loleni mundu wa lwafuo na mnaruwi, mgheni wa watozi kodi na wa wakaung'a.’

³⁵ Nayo suku ya Mlungu yakatiso fulo ni wose waihokera.”

Jesu nyumba kwa Simoni Mfarisayo

³⁶ Nao Mfarisayo mumoju kamkaribisha Jesu kulya; naye kaghenda kangila nyumba kwa ulya Mfarisayo, kakala kitembo mezeni kulya.

³⁷ Nao muke mumoju wa ghulya muzi eluo mkaung'a, asikila kamba Jesu ondelya kele nyumba ya ulya Mfarisayo kaleta chupa ya alabasta ijule marashi.

³⁸ Naye kakala kimusi nanyuma ya maghulu gha Jesu kalila, mbori zake zikafurisa maghulu gha Jesu, kaghawaghila na sisiri zake, kaghasusuga na kughanyinyila marashi.

³⁹ Nao ulya Mfarisayo emukaribishe aghenda aona, kaghora ngoloni kwake, “Ngera uyu mundu eluo tondolo fulo, macha amumanya uyu muke emwatagha uwo ije, kwani ni mkaung'a.”

⁴⁰ Nao Jesu kaghora, “Simoni, nio na ilagho lyekughorera.” Naye kamtumbulila, “Mwalimu, nighorere,”

⁴¹ “Koluo na wandu waili wemkopile mundu mumojori; mumoju okopesho pesa ziitogho dinari maghana masanu na mzima mirongo misanu

⁴² Nawo wasowa chemlipa kawafwila waya wose. Ndamu nani emushayagha na ndighi?”

⁴³ Simoni kamtumbulila, “Namanya ni ulya amufwilile waya nyingi.” Nao Jesu kamuza, “Waghora fulo.”

⁴⁴ Nao kamghalukila ulya muke na kumuza Simoni, “Umwonagha uyu muke? Ningila nyumba kwako, sunihawile meji gheoghesha maghulu ghangu, ela iye wanioghesha maghulu ghangu na mbori zake na kuniwaghila na sisiri zake.

⁴⁵ Uwe sunisusuge, ela iye kufuma nangila sasighile kunisusuga maghulu ghangu.

⁴⁶ Uwe sunivilile mavuta chongo changu, ela iye wanivila marashi maghulu ghangu.

⁴⁷ Na kwa hung'u nakuza, Kaung'a zake zio nyingi, zafwilo waya. Kwani uyu efwilogho waya kachache washaya kuchache.”

⁴⁸ Nao Jesu kamuza ulya muke, “Kaung'a zako zafwilo waya.”

⁴⁹ Nao walye wekezanye naye kitembo mezeni wakadyowa kughora wenyi. “Nani uyu hata edimagha kufwila waya mundu kaung'a?”

⁵⁰ Nao Jesu kamuza ulya muke, “Ghenda na sere, idumusi lyako lyakukiza.”