Luka 6 - UVORO GHWALOLI KWA WANDU WOSE

Ikotelo ighulu ya Sabato

¹ Nao ijua imoju lya Sabato ilyi Jesu eluo keita kele mbuwa za ngano, wairimi wake wakatema vanga va ngano wakasusa wakalya.

² Ela Wafarisayo wamoju wakawauza, “Kudani mudeagha malagho gharighidogho ijua lya Sabato?”

³ Jesu kawatumbulila, “Ado simushomile selyi Daudi adeile ilyi iye na wale wekezanye weshahilo ni njala?

⁴ Ongilile kele nyumba ya Mlungu, kausa mikate iikilo kwa Mlungu, kalya, na sena kawahawa walye wekezanye naye. Ela yanarighidogho kulyigho ni mundungi sala wakohani wenyi.”

⁵ Naye kawauza, “Mwana wa Mdamu niye Bwana wa Sabato.”

Mundu eluo na mkonu ghopooza

⁶ Nao Sabato nzima, aghenda angila kele sinagogi kufundisa, koluo na mundu alye eluo na mkonu ghwa kijo ghopooza.

⁷ Nawo walimu wa Sheria na Wafarisayo wakamlolila ngera umuboesagha ijua lya Sabato eri wapate chausa chemshitaki.

⁸ Ela Jesu kemanya maririkanyo ghawe, kamuza ulya mundu wa mkonu ghopooza, “Njuu ukale kimusi aha.” Naye kauka kakala kimusi alye.

⁹ Nao Jesu kawauza, “Nendemkotela, Ije kwanarighidogho kudea ghaloli ango ghawase ijua lya Sabato, kukiza ango kuhaitisa?”

¹⁰ Nao kawazighana wose, nama kamuza ulya mundu, “Ghorora mkonu ghwako.” Naye kaghughorora ghukabowa.

¹¹ Ela wakawasilo na ndighi; wakadea njama ya selyi wemdeagha Jesu.

Jesu kusaghula Watumo ikumi na waili

¹² Nao ngelo ilya Jesu kajoka mghondini kulomba, naye kalomba Mlungu kiro chee.

¹³ Nao kuela, kawapang'a wairimi wake, kusaghula ikumi na waili, kawaita watumo;

¹⁴ Simoni (kamwita Petro) na Andrea wakwawe, Jakobo na Johana, Filipo na Bartholomayo,

¹⁵ Matayo na Thoma, Jakobo mwana wa Alfayo, na Simoni eluo keito Zelote,

¹⁶ Juda mwana wa Jakobo na Juda Iskariote, uyu amufunyile.

Jesu kufundisa na kuboesa

¹⁷ Nao Jesu aghenda ajika kufuma mghondini, kakala kimusi kirindini ngila mojori na makoghano gha wairimi wake na wandu wengi kufuma Jerusalemu na Judea, na kufuma mizi ya pwani ya Tiro na Sidoni, wejile wamsikizile na waboeso makongo ghawe.

¹⁸ Na walye weluo wekesirimiso ni pepo wakaboeso.

¹⁹ Na wandu wose weshaile kumwata, kwani ndighi zeluo zikemfuma na kuwaboesa wose.

Maboelo na furuse

²⁰ Nao Jesu kawaghalukila wairimi wake, kaghora, “Baha inyo muo wakiwa ndamu, Kwani Uzuri ghwa Mlungu ni ghwenyu.”

²¹ Baha inyo muo na njala ndamu, kwani mjeghutiso. Baha inyo mlilagha ndamu, kwani mjeseka.

²² “Baha inyo mumenyogho ni wandu na kulegho, wekemsholela na kumghora laghelaghe kwa undu ghwa Mwana wa Mdamu.

²³ Boeloni ngelo iyo muvine kwa kuboelo, kwani muwo na inosi ibwaa mlunguni, kwa kukala niko kwenyi wana akee wawadeilile wana tondolo.”

²⁴ “Ela ni bugha kwenyu inyo wazuri, kwani mwapata usaruso ghwenyu.

²⁵ Ni bugha kwenyu inyo mughutagha, kwani mujeona njala. Ni bugha kwenyu inyo musekagha ndamu, kwani mujelila na kushighira.”

²⁶ “Ni bugha kwenyu inyo mulikogho ni wandu wose, kwani niko kwenyi wana akee wedeile kwa wana tondolo wa ndimi.

Kuwashaya wamaiza

²⁷ “Ela namuza inyo munisikizilagha: Washaeni wamaiza wenyu; wadeileni kirani awa wemumenyagha.

²⁸ Wabarikieni awa wamwanyizagha, walombeleni awa wemutukanagha.

²⁹ Ngera mundungi akubahala idumbu, mghalulile lyilya idumbu imoju na lyose. Naye mundu kakusoka ikoti lyako, muhawe shati yako nayose.

³⁰ Mhawe kila mundu ekulombagha na uyo wose eusagha vindu vako swalombe akuujile sena.

³¹ Wadeileni wandu wazima selyi mushaile wamudeile inyo.

³² “Na ilyi mwawashaya awa wamushaile, mwapata kimuni? Hata wakaung'a wanashaya walye wawashaile.

³³ Na ilyi mwadea kirani kwa walye wamudeilagha kirani mpatagha kimuni? Hata wakaung'a wanadeagha ukwenyi.

³⁴ Na ilyi mwakopesha walye muririkanyagha wemulipagha, mwapata kimuni? Hata wakaung'a wakopesha wakaung'a eri waujisilo zose.

³⁵ Ela washaeni wamaiza wenyu, na muwadeile kirani, kopesheni na simwakoseree kuujisilo, nenyo mjepata manosi mabwaa mlunguni, na mujekala wana wa Mlungu wa Ighulu. Kwani ni waloli kwa awa siweo na asanta na walaghelaghe.

³⁶ Kaleni na mbazi selyi Tatio wenyu ewo na mbazi.

Kutaghanya wazima

³⁷ “Simwataghanye wambenyu, nenyo simwejetaghanyo, simwamenyese, nenyo simojemenyeso, fwileni waya, nenyo mujefwilo waya.

³⁸ Wahaweni wandu, nenyo mujehawo, kipimo chaloli chisindililo, chishegheshogho na chitikatikagha mbali, mjehawo mikonuni kwenyu. Kwani kipimo mupimagha nicho chenyi mujepimilo.”

³⁹ Nao Jesu kawaghorera ikataniso ilyi, “Mundu kifondo wadima kumlongoza mumbawe kifondo? Wose waili siwengilagha kele kina?

⁴⁰ Uyu efundiso sedimagha kukatana na mwalimu wake; ela ilyi amalila mafundiso, ukatanagha na mwalimu wake.

⁴¹ Kudani ulolagha kilaghulu chio kele iziso lya wakwenyu, ela somanyagha gha kigogo chio kele iziso lyako?

⁴² Umuza ije wakwenyu, ‘Dea nikufunye kilaghulu chio kele iziso lyako,’ nawe mwenyi uwo na kigogo kele iziso lyako? Mundu wa ngolo mbili uwe, funya jako kigogo chio kele iziso lyako, nao uone kirani kufunya kilaghulu chio kele iziso lya wakwenyu.

Mwiti na mavalo ghake

⁴³ “Mwiti ghwaloli sighudimagha kuvala mavalo ghawase, hata mwiti ghuwase sighudimagha kuvala mavalo ghaloli.

⁴⁴ Kwani kila mwiti ghwanamanyikanagha kwa mavalo ghake; simudimagha kuwaha tini kele miya hata zabibu kele mundalendale.

⁴⁵ Mundu waloli kele uloli ghwake wafunya ghaloli gheo ngoloni kwake, na mundu wa laghelaghe kwa ulaghelaghe ghwake wafunya ulaghelaghe ghujule ngoloni kwake. Kwani mulomu ghwaghora agha gheo ngoloni kwake.

Wawaghali waili

⁴⁶ “Kudani muniitagha, ‘Bwana, Bwana’ na simodeagha selyi nighoragha?

⁴⁷ Uwo wose ekujagha kwangu na kusikila malagho ghangu na kughadea, nimwonyezagha selyi ewo.

⁴⁸ Ni karakara na mundu ewaghalagha nyumba, akotile mweni na kuwaghala msingi kele lwala. Nao mweta ghuruka, ghukaikwita ilya nyumba hata siinyavurike, kwa kukala yewaghalo lwaleni.

⁴⁹ Ela uyu sesikilagha na kughadea ufwanana na mundu awaghale nyumba yake msangeni siyewesi msingi. Nao mweta ghuruka, ghukaikwita ikagwa, na kugwa kwake koluo kubwaa!”