Luka 5 - UVORO GHWALOLI KWA WANDU WOSE

Jesu kupang'a wairimi wake wa hambiri wamwirime

¹ Nao ijua imoju ilyi Jesu eluo kimusi mbalimbali ya bahari ya Genesareti, na wandu wekemtindirira kusikizila ilagho lya Mlungu.

² Kaona mashua mbili baharini na wawati makumba wafuma wendeoghesha nyavu zawe.

³ Jesu kangila kele mashua moju, yeluo ya Simoni, kamulomba aisughuse mbali kuchache na isanga. Naye kakala kitembo na kufundisa wandu kufuma kele mashua.

⁴ Naye amalila kughora, kamuza Simoni, “Sughusa mashua andu kumalike na museleze nyavu zenyu muwate makumba.”

⁵ Naye Simoni kamutumbulila, “Bwana tanadeile kazi kiro chee na sitiwatile kindu chingi. Ela kwa ghore yako niselezagha nyavu.”

⁶ Nao waghenda wadea hung'o, wakawata makumba mengi hata nyavu zawe zikashaya kuzaika.

⁷ Wakawakunyira wambawe weluo kele mashua ilya moju weje wawawarure. Nawo wekeja wakajuza mashua zose mbili, hata zikadyowa kumalika.

⁸ Nao Simoni Petro aghenda aona agha, kadyaya ngokoro kwa Jesu keghamba “Uka kwangu, Ee Bwana, kwani imi ni mundu wa kaung'a.”

⁹ Kwani iye na walye wose wekezanye weshiniso ni ungi ghwa makumba wawatile.

¹⁰ Na yeluo hung'u kwenyi kwa Jakobo na Johana wana wa Zebedayo, awa weluo wa ngaro na Simoni. Nao Jesu kamuza Simoni, “Swadee wogha, kwani kufuma indakwenyi ujekala muwati wandu.”

¹¹ Nawo waghenda waleta mashua zawe kele isanga, wakasigha vindu vose wakamwirima.

Jesu kuboesa mundu wa ukoma

¹² Nao ilyi Jesu eluo kele muzi ghumoju, kajilo ni mundu eluo na ukongo ghwa ukoma. Naye aghenda amwona Jesu kamugwila hubu, kemulomba, “Bwana kwashaya, wadima kuniombochola.”

¹³ Naye Jesu kaghorora mkonu ghwake kamwata, keghamba, “Nashaya uombochoke.” Nao iyo ngelo yenyi ukoma ghukamusigha.

¹⁴ Naye Jesu kamuza, “Swamghorere mundungi; ela ghenda ukuonyeza uwe mwenyi kwa mkohani na ufunye sadaka ya kuombocholo kwako selyi Musa aghorire, eri wandu wamanye waboa.”

¹⁵ Ela uvoro ghwa Jesu ghukaera andu kose na makoghano gha wandu wakamjila kumsikizila na kuboeso manyongi ghawe.

¹⁶ Ela iye kaghenda andu kwa chanya kulomba.

Jesu kuboesa mundu wa kupooza

¹⁷ Nao ijua imoju ilyi Jesu eluo kefundisa, Wafarisayo na walimu wa Sheria weluo kitembo, nawo wefumile kele kila muzi ghwa Galilaya na Judea na Jerusalemu. Na ndighi za Bwana zeluo na Jesu kuboesa wakongo.

¹⁸ Nao wekeja wandu wekemtuka mundu mkongo wa kupooza kele ulili, nawo wakatima kumungiza eri wamwike hambiri ya Jesu.

¹⁹ Ela wasowa ngila yemungiza kwa undu ghwa makoghano, wakamujosa ighulu ya nyumba wakafuchula vigae, na wakamuseleza na ulili ghwake kwa ilanga hata hambiri ya Jesu.

²⁰ Nao Jesu aghenda aona idumusi lyawe, kamuza ulya mundu, “Ee mundu wa wandu, kaung'a zako zafwilo waya.”

²¹ Nao walimu wa Sheria na Wafarisayo wakadyowa kuuzana, “Ni mundu muni uyu emutukanagha Mlungu? Nani edimagha kufwila waya kaung'a sala Mlungu?”

²² Ela Jesu kamanya maririkanyo ghawe, kawatumbulila, “Kudani mwaririkanya hung'o ngoloni kwenyu?

²³ Ni lyio lyiwanguwe, kughora, ‘kaung'a zako zafwilo waya;’ ango kughora, ‘Uka ughende?’

²⁴ Ela eri mumanye kamba Mwana wa Mdamu uwo na ndighi urumenguni kusigha kaung'a,” kamuza mundu wa ukongo ghwa kupooza, “Nakuza uka utuke ulili ghwako ughende nyumba kwako.”

²⁵ Nao iyo ngelo yenyi ulya mundu kauka hambiri yawe katuka ulili ghwake etungurire kaghenda nyumba kwake kemkasa Mlungu.

²⁶ Nao wose wakashinika na kumkasa Mlungu; kwa kungilo ni kiture, wakaghora, “Taona malagho gha mashiniko lelo.”

Jesu kumpang'a Lawi amwirime

²⁷ Nao nyuma ya agha Jesu kafuma, na kamwona mtozi kodi aitogho Lawi kitembo kele foroza; naye Jesu kamuza, “Niirime.”

²⁸ Naye kasigha ghose, kauka na kumwirima.

²⁹ Nao Lawi kamdeila Jesu karamu kele nyumba yake, na alye koluo na watozi kodi wengi na wandu wazima.

³⁰ Nawo Wafarisayo na walimu wa Sheria wakawanung'unikila wairimi wake wekeghamba, “Kudani mlyighagha na kunwa ngila mojori na watozi kodi na wakaung'a?”

³¹ Nao Jesu kawatumbulila, “Awo weo banana siwashayagha mghanga, sala awo weo wakongo.

³² Sijile kuwapang'a wahachi kungi sala wakaung'a eri warihe.”

Ikotelo ighulu ya kufunga kulya

³³ Nao wakamuza Jesu, “Wairimi wa Johana wanafungagha kulya na walombe, na niko kwenyi wadeagha wairimi wa Wafarisayo, ela wairimi wako walya na kunwa.”

³⁴ Nao Jesu kawatumbulila, “Ado mwadima kuwadea wagheni wawaliko kele harusi kufunga kulya ngelo wewo na bwana harusi?

³⁵ Majua ghekujagha, ngelo bwana harusi afunyo kwawe, aho niko wejefunga kulya.”

³⁶ Nao Jesu kawaghorera ikataniso, “Sikwesi mundungi azayagha kiraka kele nguo mbishi na kuchingiza kele nguo ya kale; na ngera adea hung'u, uzayagha nguo mbishi, na kiraka cha nguo mbishi sichifwanane na nguo ya kale.

³⁷ Hata mundungi sangizagha divei mbishi kele viriba va kale, ilyi adea hung'u divei mbishi ipayagha viriba, na divei itike na viriba vihakilike.

³⁸ Kwa hung'u divei mbishi yangizo kele viriba viishi.

³⁹ Sikwesi mundungi anweghagha divei ya kale ashaye mbishi, kwani ughoragha, ya kale ni yaloli.”