Luka 4 - UVORO GHWALOLI KWA WANDU WOSE

Kutimo kwa Jesu

¹ Nao Jesu kejulo ni Roho wa Kuela, kauya kufuma mweta ghwa Jordani. Kalongozo ni Roho

² kireti majua mirongo mine ketimo ni Shetani. Naye seluo kelya kindu chingi majua ghalye ghose. Nagho ghaghenda ghadua, kashaho ni njala.

³ Shetani kamuza, “Ngera uwe nuwe Mwana wa Mlungu, Uza iwe ilyi lyiuye mkate.”

⁴ Nao Jesu kamuza, “Yanawandiko, ‘Mdamu sekalagha moyo kwa mkate ghwenyi anduangi.’”

⁵ Nao Shetani kamtwala hata andu kwa ighulu na kamwonyeza mauzuri ghose gha urumengu kwa ngelo njache,

⁶ naye kamuza, “Nikuhawagha udimo ighulu ya mauzuri agha ghose na ubwaa ghwake,” kwani “Nanamalile kuhawo, nemi namhawa kila mundu namshaya.

⁷ Kwa hung'u, ilyi wanitasa, ivi vose vijekala vako.”

⁸ Jesu kamtumbulila, “Yanawandiko, ‘Umtase Bwana Mlungu wako na umutumikile iye mwenyi keng'weri!’”

⁹ Nao Shetani kamghenza Jerusalemu, na kamwika kele kijungulila cha hekalu na kamuza, “Ngera nuwe Mwana wa Mlungu, kubudule msangeni kufuma aha;

¹⁰ Kwani yanawandiko, ‘Mlungu utumagha wana malaika wake wakulinde.’

¹¹ Na, ‘kele mikonu yawe wekuwatagha, eri swadaho hata kighulu chako ni iwe.’”

¹² Nao Jesu kamtumbulila, “Yanawandiko, ‘Swamutime Bwana Mlungu wako!’”

¹³ Nao Shetani amalila kumutima kamusigha kwa ngelo.

Jesu kudyowa kazi yake Galilaya

¹⁴ Nao Jesu kauya Galilaya ajulo ni ndighi za Roho wa Kuela. Na uvoro ghwake ghukaera isanga lyilya lyose.

¹⁵ Naye kafundisa kele Sinagogi zawe, kekumo ni wandu wose.

Jesu kulegho Nazareti

¹⁶ Nao Jesu kaghenda Nazareti andu azeguile. Kangila kele Sinagogi selyi yeluo ada yake ijua lya Sabato. Kakala kimusi kushoma.

¹⁷ Kahawo chuo cha tondolo Isaya, kachifungula na kaona andu kuwandiko,

¹⁸ “Roho wa Bwana uwo ighulu yangu, kwa kukala wanisaghula kuchilila wakiwa Ilagho Lyaloli. Wanituma kuwaghorera awa wafungilo kufungulo kwawe, na kuwafungula meso awa siwewonagha, na kuwasighilila awa wesirimagha;

¹⁹ na kueresa mwaka Bwana ekizagha wandu wake.”

²⁰ Nao Jesu kafunga chuo, kamhawa mtumishi, na kakala kitembo; na wandu wose weluo kele Sinagogi wakamkulila meso.

²¹ Naye kawauza, “Lelo Mawandiko agha gha Kuela ghakatiso kwenyu.”

²² Nao wose wakaboelo niye na kushiniso ni malagho ghaloli eluo keghora; Wakaghamba, “Ado uyu si mwana wa Josefu?”

²³ Naye kawauza, “Namanya munihawagha ikataniso ilyi, ‘Mghanga, kuboese uwe mwenyi.’ Malagho agha tisikile ughadeile Kapernaumu ghadee aha kele muzi ghwako.”

²⁴ Naye kawauza, Fulo namuza, tondolo salikogho kele muzi ghwake ghwenyi.

²⁵ “Ela sikizileni, koluo na wake wengi wafwililo ni walume wawe kele isanga lya Israeli majua gha Elija, ilyi mvula yesoweke kwa miaka mitatu na mezi mitandatu, ngelo koluo na njala mbwaa isanga lyose.

²⁶ Elija satumilo kwa ungi wawe sala kwa muke efwililo ni mlume wa Sarepta kele isanga lya Sidoni.

²⁷ Na sena koluo na wandu wa ukoma wengi kele Israeli ngelo ya tondolo Elisha na sikwesi ungi wawe aombocholo sala Naamani mundu wa Siria.”

²⁸ Nawo waghenda wasikila agha malagho, wandu wose weluo kele Sinagogi wakajoko ni hare.

²⁹ Wakauka wakamufunya shighati ya muzi, wakamghenza ighulu ya mghondi ghwa muzi, eri wamubudule ighambeni.

³⁰ Ela iye kaita ghati yawe kaghenda ngila zake.

Mundu eluo na pepo

³¹ Nao Jesu kaghenda Kapernaumu muzi ghumoju ghwa Galilaya, kufundisa wandu ijua lya Sabato.

³² Na wose wakashiniso ni mafundiso ghake, kwani ghore yake yeluo na udimo.

³³ Na kele Sinagogi koluo na mundu mumoju eluo na pepo iwase, kakema na lwaka lubwaa, “Ee Jesu wa Nazareti, udeani nesi? Ondeja kutihaitisaba?

³⁴ Nakumanya kamba nuwe mweli wa Mlungu!”

³⁵ Ela Jesu kamkemela kemuza, “Nyamala, na umufume!” Nao pepo ikamgwisha msangeni alye ghati, ikamfuma siyemushoghonole.

³⁶ Wandu wose weluo alye wakashinika wakaghamba wenyi, “Ni malagho muni agha? Kwa udimo na ndighi waziuza pepo ziwase zifume, nazo zafuma.”

³⁷ Nao, uvoro ughu ghukaera andu kose kele lyilya isanga.

Jesu kuboesa wandu wengi

³⁸ Nao Jesu kafuma kele sinagogi kaghenda kangila nyumba kwa Simoni. Naye mkekulu wa Simoni woluo mkongo wa msuko, nawo wakamlomba Jesu amuboese.

³⁹ Naye kaghenda kakala kimusi avui na ulili ghwake na kughukemela msuko, nagho ghukamusigha; kauka iyo ngelo yenyi kawatumikila.

⁴⁰ Nao ijua lyikemalika, wose weluo na wandu wawe wakongo wa makongo mazimamazima wakawaleta kwake, naye kawaikilila mikonu yake kaboesa wose.

⁴¹ Na pepo nazose zikafuma zikekema, “Nuwe Mwana wa Mlungu,” Ela Jesu kazikemela na sadumusile zighore, kwa kukala zemweni kukala niye Masihi.

Jesu kuchila kele Sinagogi za Judea

⁴² Nao kughenda kuela, Jesu kafuma kaghenda andu kwa chanya. Na wandu wakamhada, na waghenda wamwona wakamlomba sawasighe.

⁴³ Ela iye kawauza, “Ni suti nichile Ilagho Lyaloli lya Uzuri ghwa Mlungu kele mizi mizima nayose, kwani nanatumilo kwa undu ugho.”

⁴⁴ Naye kachila kele sinagogi za Judea.