Luka 3 - UVORO GHWALOLI KWA WANDU WOSE

Machilo gha Johana Mubatizi

¹ Nao kele mwaka ghwa ikumi na sanu ghwa kutawala kwa Kaisari Tiberia, Pontio Pilato woluo ketawala Judea, naye Herode woluo mzuri wa Galilaya na Filipo wakwawe oluo mzuri wa Iturea na Trakoniti, na Lusanio woluo ketawala Abilene,

² ngelo Anasi na Kayafa weluo wakohani wabwaa. Ilagho lya Mlungu lyikamujila Johana mwana wa Zakaria kireti;

³ naye kaghenda isanga lyose lyeluo mbalimbali ya mweta ghwa Jordani, kechila kamba ni suti wandu warihe kaung'a na kubatizo eri Mlungu awafwile waya.

⁴ Selyi iwandiko kele chuo cha tondolo Isaya: “Lwaka lwa mundu mumoju ekemagha kireti: ‘Boeseni ngila kwa undu ghwa Bwana; ghororeni ngila kwa undu ghwake.

⁵ Kila shambi ijejuzo, na kila lughongo na mghondi ghujekataniso, na ngila igomeke ijeghororo, na ngila ziwase zijetendereso.

⁶ Na wandu wose wejeona ukizi ghwa Mlungu!’”

⁷ Makoghano gha wandu ghakamjila Johana awabatize, naye kawauza, “Inyo kivali cha nyoka! Nani amuonyile, kamba mwadima kukimbila hare ikujagha?

⁸ Onyezeni kwa madeo kuriha kwenyu, na simwaghambe ngoloni, ‘Tio na aba Abrahamu’ kwani namuza, Mlungu wadima kele agha mawe kumupatila Abrahamu wana.

⁹ Hata; indakwenyi isoka lyaiko kele kirimba cha mwiti; eri mwiti ugho ghose sighovalagha mavalo ghutemo na kukumbo motoni.”

¹⁰ Nao makoghano wakamkotela, “Ndamu tideagha ije?”

¹¹ Naye kawatumbulila, “Uyu ewo na nguo mbili amusarire uyu sewesi na uyu ewo na chakulya naese adee ukwenyi.”

¹² Nao watozi kodi nawose wekeja kubatizo, nawo wakamkotela, “Mwalimu, isi tideagha ije?”

¹³ Naye kawauza, “Simwatoze kuisa chilya kipimo chiikilo.”

¹⁴ Na askari nawose wakamkotela, “Na isi tideagha ije?” Naye kawauza, “Simwamwiwile mundungi kwa ndighi ango kwa kuzighirira, na mukato ni mafungu ghenyu.”

¹⁵ Na kwa kukala wandu weluo wekekoserea na wekeririkanya ngoloni kwawe kamba Johana niye Masihi.

¹⁶ Johana kawauza wose, “Imi namubatiza kwa meji, ela ukujagha mumoju mubwaa kuniisa imi, hata sifweni kufungula vilatu vake. Iye ujemubatiza kwa Roho wa Kuela na moto.

¹⁷ Naye uwo na kindu chekwita viro kele mkonu, kukwita viro vake, na ukoghanyagha ngano yake kele kitundu, ela visusi uviishagha na moto sighozimikagha.”

¹⁸ Kwa ngila iyi na kwa malagho mazima mengi, kawachilila wandu Ilagho Lyaloli.

¹⁹ Ela mzuri Herode uyu eonyilo ni Johana kwa kumusa Herodia muke wa wakwawe na kwa malagho mazima ghawase eluo kedea,

²⁰ kajuzila ughu ulaghelaghe ghose kwa kumungiza Johana kifungoni.

Kubatizo kwa Jesu

²¹ Nao wandu wose waghenda wabatizo, Jesu naese kabatizo. Naye ilyi eluo kelomba, mlunguni kukafunguka,

²² na Roho wa Kuela kamselelela ewo na muli sa iringo lya kishalai, na lwaka lukafuma mlunguni, “Uwe ni mwanwangu nikushaile, Niboelo nuwe.”

Kivali cha Jesu Kristo

²³ Naye Jesu kedyowa kazi yake oluo na miaka mirongo mitatu, wandu weluo wekeririkanya kamba ni mwana wa Josefu, mwana wa Heli,

²⁴ mwana wa Mathati, mwana wa Lawi, mwana wa Melki, mwana wa Janai, mwana wa Josefu,

²⁵ mwana wa Matathia, mwana wa Amosi, mwana wa Nahumu, mwana wa Hesli, mwana wa Nagai,

²⁶ mwana wa Maathi, mwana wa Matathia, mwana wa Shemeni, mwana wa Josefu, mwana wa Juda,

²⁷ mwana wa Johanani, mwana wa Resa, mwana wa Zerubabeli, mwana wa Shealtieli, mwana wa Neri,

²⁸ mwana wa Melki, mwana wa Adi, mwana wa Kosamu, mwana wa Elmodamu, mwana wa Eri,

²⁹ mwana wa Joshua, mwana wa Eliezeri, mwana wa Jorimu, mwana wa Mathati, mwana wa Lawi,

³⁰ mwana wa Simeoni, mwana wa Juda, mwana wa Josefu, mwana wa Jonamu, mwana wa Eliakimu,

³¹ mwana wa Melea, mwana wa Mena, mwana wa Matatha, mwana wa Nathani, mwana wa Daudi,

³² Mwana wa Jese, mwana wa Obedi, mwana wa Boazi, mwana wa Shela, mwana wa Nashoni,

³³ mwana wa Aminadabu, mwana wa Adimini, mwana wa Arni, mwana wa Hezroni, mwana wa Perezi, mwana wa Juda,

³⁴ mwana wa Jakobo, mwana wa Isaki, mwana wa Abrahamu, mwana wa Tera, mwana wa Nahori,

³⁵ mwana wa Serugi, mwana wa Reu, mwana wa Pelegi, mwana wa Eberi, mwana wa Shela,

³⁶ mwana wa Kainani, mwana wa Arfoksadi, mwana wa Shemu, mwana wa Noa, mwana wa Lameki,

³⁷ mwana wa Mathushela, mwana wa Enoko, mwana wa Jaredi, mwana wa Mahalaleli, mwana wa Kainani,

³⁸ mwana wa Enosi, mwana wa Sethi, mwana wa Adamu, mwana wa Mlungu.