Luka 23 - UVORO GHWALOLI KWA WANDU WOSE

Jesu kughenzo hambiri ya Pilato

¹ Nao ikoghano lyose lyikauka, lyikamghenza kwa Pilato.

² Nawo wakadyowa kumushitaki wekeghamba, “Tanamdokile uyu mundu keghalula wandu wa mbari yetu, na kutiima sitafunye kodi kwa Kaisari na keghora kamba iye ni Masihi Mzuri.”

³ Nao Pilato kamkotela, “Uwe nuwe Mzuri wa Wayahudi?” Naye katumbulila, “Uwe waghamba.”

⁴ Nao Pilato kawauza wakohani wabwaa na makoghano, “Imi sionagha ikosa lyingi kwa uyu mundu.”

⁵ Ela wakashoterea wekeghamba, “Wanakumbagha wandu sheshe kwa mafundiso ghake Judea yose; kedyowela Galilaya, hata andu aha.”

Jesu hambiri ya Herode

⁶ Nao Pilato aghenda kusikila hung'u, kakotela ngera woluo Mgalilaya.

⁷ Naye aghenda kumanya kamba oluo wa isanga lya Herode, kamghenza kwa Herode. Kwani ilya ngelo naese oluo Jerusalemu.

⁸ Nao Herode amwona Jesu, kabwelo na ndighi, kwani kengi oshaile kumwona, kwa kukala osikile uvoro ghwake, naye kakoserea kuona mwakilimbita Jesu azideagha.

⁹ Kwa hung'u kamkotela makotelo mengi, ela Jesu samutumbulile.

¹⁰ Wakohani wabwaa na walimu wa Sheria wakamanga kimusi wakamshitaki mengi.

¹¹ Nao Herode na askari wake wakamsholela na kumufwisha waya; nao wakamrwarisa nguo ya kizuri na kumuja kwa Pilato.

¹² Na lyilya ijua Herode na Pilato wakawatana ugheni. Kwani weluo siwesikilane.

Jesu kutaghanyo Kifwa

¹³ Nao Pilato kawapang'a wakohani wabwaa na wabwaa na wandu,

¹⁴ na kuwauza, “Mwanamletile uyu mundu mukaghora wanakumba wandu sheshe, nemi nazighana malagho ghake hambiri yenyu, na sionile ulaghelaghe ghungi kwa agha mwamshitaki.

¹⁵ Hata Herode naese, kwani wamuja kwetu. Naona sadeile ikosa lyingi lyimufweni kufwa.

¹⁶ Kwa hung'u nijemchapa nimfungule.” [

¹⁷ Nao kele Pasaka yeluo ni suti Pilato awafungulile mfungo mumojori.]

¹⁸ Ela wakakema wose, “Mufunye uyu, na utifungulile Baraba.”

¹⁹ (Baraba oluo ni mundu angizilo kifungoni kwa sheshe adeile kele muzi na kwa kuulagha.)

²⁰ Pilato kaghoranya na wandu sena, keshaya kumufungula Jesu.

²¹ Ela wakaghora na lwaka lubwaa, “Mwambe! Mwambe!”

²² Nao Pilato kawauza indu lya katatu, “Kudani, Ni ulaghelaghe muni adea? Imi sionile ikosa lyingi kwake lyimufweni afwe, kwa hung'u nijemchapa na nimufungule.”

²³ Ela wakajuzila kukema na lwaka lubwaa, kamba ni suti Jesu awambo. Na lwaka lwawe lukasima.

²⁴ Kwa hung'u Pilato kapasa agha washaile ghakatiso.

²⁵ Kamfungula ulya mundu eluo kifungoni kwa sheshe na kuulagha wemlombile, na kumfunya Jesu kwawe selyi weshaile.

Jesu kuwambo

²⁶ Nao ilyi weluo wekemghenza, wakamwata mundu mumoju aitogho Simoni Mkurene, eluo keja kufuma mbweni, wakamtukisa msalaba ghwake, naye kaghutuka nyuma ya Jesu.

²⁷ Na makoghano mengi gha wandu wakamwirima, wamoju wawe weluo ni wake weluo wekemlilila na kushighira.

²⁸ Jesu kawaghalukila na kuwauza, “Wake wa Jerusalemu, simwanililile imi, kulilileni inyo wenyi na wana wenyu.

²⁹ Kwani majua ghendeja ngelo wejeghamba, ‘Wabarikio wana koloi na siwevele wana na maele lyingi sighemamilo.’

³⁰ Niko wejedyowa kuuza mighondi, ‘Tigwileni’ na nyughongo ‘Tibuleni.’

³¹ Kwani ikakala wadea hung'u kwa mwiti ghuo mwishi, ikalagha ije kwa ghuomile?”

³² Wakatwalo wandu waili weluo walaghelaghe waulagho ngila mojori naye.

³³ Nawo waghenda wafika andu kuitogho “Ngomeni,” wakamwamba na walye walaghelaghe, mumoju mkonu ghwa kijo na mumoju mkonu ghwa kimosho.

³⁴ Nao Jesu kaghora, “Aba wafwile waya, kwani siwamanyile agha wedeagha.” Nao wakasara nguo zake kwa kukwita kura.

³⁵ Nawo wandu wekalile kimusi wekezighana, ela vilongozi wawe wakamsholela wekeghamba, “Wanawakizile wandu wazima, sakukize iye mwenyi, ngera iye ni Masihi Msaghulo wa Mlungu.”

³⁶ Askari na wose wakamsholela, wakamghendela wakamhawa siki,

³⁷ wakamuza, “Ngera uwe nuwe Mzuri wa Wayahudi kukize uwe mwenyi.”

³⁸ Koluo na mawandiko na ighulu ya chongo chake, “UYU NIYE MZURI WA WAYAHUDI.”

³⁹ Mumoju wa walye walaghelaghe ewambanyo naye kamuza, “Ado suwe Masihi? Kukize uwe mwenyi nesi!”

⁴⁰ Ela ulya mumbawe kamukanya kemuza, “Ado sumwoghagha Mlungu uwe? Kwani naose uwo kele kutaghanyo uko kwenyi.

⁴¹ Isi tataghanyo hachi, kwani tapata ghalye ghatifweni, ela uyu mundu sadeile ikosa lyingi.”

⁴² Nao kamuza, “Ee Jesu unikumbuke ngelo ukujagha kwa uzuri ghwako!”

⁴³ Nao Jesu kamuza, “Fulo nakuza, lelo kwenyi ujekala nemi andu kwaloli wazimuni.”

Kifwa cha Jesu

⁴⁴ Nao ifika saa ndandatu za msenya, kukakala na kiza isanga lyose hata saa kenda, ijua lyikawuya kiza,

⁴⁵ na Pazia ya Hekalu ikazaika ghati.

⁴⁶ Nao Jesu kakema na lwaka lubwaa kaghamba, “Aba, kele mikonu yako naiika Roho yangu!” Naye aghenda kughora hung'u, kafunya roho.

⁴⁷ Nao mubwaa wa askari aghenda aona ghalye ghadeike, kamlika Mlungu keghora, “Fulo uyu oluo mundu wa hachi.”

⁴⁸ Na wandu wose weluo alye waona ghalye ghadeike, wakauya kaya wekedaha lagaya.

⁴⁹ Nao wagheni wake wose na walye wake wamwirime kufuma Galilaya, wekalile kimusi kakulele, wakaona malagho agha ghose.

Kuziko kwa Jesu

⁵⁰ Nao koluo na mundu mumoju aitogho Josefu: Woluo mundu wa muzi ghwa Wayahudi ghuitogho Arimathaya. Iye woluo mundu wa Baraza, naye woluo mundu waloli na wa hachi.

⁵¹ Iye sedumusilane na njama yawe na ghalye waghadeile, woluo kelolila kuja kwa Uzuri ghwa Mlungu.

⁵² Uyu mundu kamghendela Pilato na kumlomba muli ghwa Jesu.

⁵³ Nao kaghuseleza ghulya muli kele msalaba, kaghufunga sanda, kaghuzika kele kaburi yekotilo iweni andu sikozikilo mundungi.

⁵⁴ Nako koluo ni ijua lya kukuboesa na Sabato yeluo ikedyowa.

⁵⁵ Nawo walye wake wejanye na Jesu kufuma Galilaya wakamwirima Josefu, wakaona kaburi andu muli ghwake ghuzikilo.

⁵⁶ Nao wakauya kaya wakaboesa marashi na mavuta. Na ijua lya Sabato wakazumua selyi iikilo.