Luka 22 - UVORO GHWALOLI KWA WANDU WOSE

Njama yemulagha Jesu

¹ Nao karamu ya mikate siyengizilo chachu, iitogho Pasaka yeluo avui.

² Wakohani wabwaa na walimu wa Sheria weluo wekehada ngila yemulagha Jesu; kwani weluo wekeogha wandu.

Juda kudumusa kumfunya Jesu

³ Nao Shetani kamungila Juda Iskariote uyu eluo mumoju wa wairimi ikumi na waili.

⁴ Naye Juda kaghenda kaghoranya na wakohani wabwaa na warindiri, selyi edimagha kumfunya Jesu kwawe.

⁵ Nawo wakabwelo na kudumusila kamba wemuhawagha pesa.

⁶ Juda kadumusa, naye kahada ulalo ghomufumya kwawe ngelo makoghano sigheo.

Jesu kukuboesa kulya chakulya cha Pasaka

⁷ Nao lyifika ijua lya karamu ya mikate siyengizilo chachu, nalyo lyeluo ni ijua lyeshinjo mwana wa ng'onzi wa Pasaka.

⁸ Jesu kawatuma Petro na Johana kewauza. Ghendeni mutiikile kirani chakulya cha Pasaka eri tilye.

⁹ Nawo wakamuza, “Ni hiyo ushaile tiike kirani?”

¹⁰ Kawatumbulila, “Zighaneni ngelo yengila kele muzi mjekoghana na mundu atuka sangu ya meji, muirimeni hata ilya nyumba engilagha,

¹¹ na mumuze mundu wa nyumba, ‘Mwalimu wakukotela, chio hiyo chumba cha wagheni, andu nilyilagha chakulya cha Pasaka na wairimi wangu?’

¹² Naye ujemwonyeza chumba kibwaa cha ighulu chipambilo kirani andu muikagha Pasaka kirani.”

¹³ Nao wakaghenda wakadoka selyi kwenyi awauzile, wakaika kirani chakulya cha Pasaka.

Kilalilo cha Bwana

¹⁴ Nao ngelo ifika, Jesu kakala kitembo mezeni ngila mojori na watumo.

¹⁵ Naye kawauza, “Naririgho kulya chakulya cha Pasaka iyi ngila mojori nenyo hambiri ya kutiriro.

¹⁶ Kwani namuza, Silyighagha sena hata ikatile kele Uzuri ghwa Mlungu.”

¹⁷ Nao Jesu kausa kikombe, naye aghenda afunya asanta kwa Mlungu, kaghora, “Wateni ichi msare inyo wenyi.

¹⁸ Kwani namuza kamba kufuma indakwenyi sinweghagha sena divei ya mzabibu hata ilya ngelo ghujeja Uzuri ghwa Mlungu.”

¹⁹ Nao kausa mkate, naye aghenda afunya asanta, kaghuvunja, kawahawa keghamba, “Ughu ni muli ghwangu, [ ghufunyogho kwa inyo. Deeni hung'u kwa kuniririkanya imi.”

²⁰ Na hung'u kwenyi nyuma ya kilalilo kausa kikombe keghamba, “Kikombe ichi ni Ilagano Iwishi lya Mlungu lya bighati yangu itikagha kwa inyo.]

²¹ “Ela loleni! Mkonu ghwake uyu enifunyagha ghuo mezeni nemi!

²² Mwana wa Mdamu ughendagha kufwa selyi kwenyi iikilo, ela ni bugha kwake uyu mundu emufunyagha!”

²³ Nao wakadyowa kukotelana, nani wawe edeagha hung'u.

Nganyi ighulu ya ubwaa

²⁴ Nao kukakala na nganyi ghati ya wairimi nani ekalagha mubwaa.

²⁵ Nao Jesu kawauza, “Wazuri wa mbari nzima weo na ndighi ighulu ya wandu wawe na walye weo na ndighi wanaitogho walindi wandu.

²⁶ Ela kwenyu siikalagha hung'u kungi, sala uyu ewo mubwaa kwenyu akale sa mchache na kilongozi akale sa mtumishi.

²⁷ Kwani nani ewo mubwaa, uyu ekalagha kitembo mezeni, ango uyu etumikagha? Ni suti akale ulya ewo mezeni. Hata sani, imi nio sa mtumishi kwenyu.

²⁸ “Inyo ninyo wandu mwakalanya nemi kele ngelo zangu za matimo;

²⁹ na ndamu namhawa Uzuri selyi Aba anihawile Uzuri.

³⁰ Kamba mulye na kunwa kele meza yangu ya Uzuri, na kukalila vifumbi vetaghanya mbari ikumi na mbili za Israeli.

Jesu kutondola ighulu ya Petro kumukana

³¹ “Simoni, Simoni, zighana! Shetani wadumusilo amupepete inyo sa ngano;

³² ela nakulombela uwe idumusi lyako silyagotie; na ilyi waniuila, uwamangise wana wakwenyu.”

³³ Nao Petro kamtumbulila, “Nio tayari kughendanya newe kifungoni na kifweni!”

³⁴ Jesu kamuza, “Petro, nendekughorera, jongole siitetagha ichi kiro sonikanile mandu matatu kamba suniweni.”

Jesu kuwaonya wairimi wake

³⁵ Nao Jesu kawauza, “Ngelo nemtumile simwowesi mifuko ya pesa ango vikuchu ango vilatu, mwanasowile kindu chingi?” Nawo wakatumbulila, “Hata.”

³⁶ Naye Jesu kawauza, “Ela ndamu nendemuza kamba uyu ewo na mfuko ghwa pesa atwale na hung'u kwenyi uyu ewo na kikuchu. Na uyu sewesi lufu ataghe nguo yake aghughule.

³⁷ Kwani nendemuza kamba, ni suti ilyi Iwandiko lya Kuela lyiwandiko ighulu yangu lyikatile: ‘Wanatalilo ngila mojori na wakosi.’ Kwa kukala agha ghawandiko ighulu yangu gheo na kukatila kwake.”

³⁸ Nawo wakamuza, “Lola Bwana aha kuo na nyufu mbili!” Naye kawauza “Izo zakata.”

Jesu kulomba kele mghondi ghwa Mizeituni

³⁹ Nao Jesu kafuma kaghenda kele mghondi ghwa Mizeituni selyi yeluo mailiso ghake, na wairimi wake wakamwirima.

⁴⁰ Naye aghenda afika alye kawauza, “Lombeni eri simwangile matimoni.”

⁴¹ Nao kawasigha, kaghenda sa ukulele ghwa mundu kukumba iwe, kadyaya ngokoro kalomba.

⁴² “Aba, ngera ni mashayo ghako, nifunyile ichi kikombe cha matiriro, ela ima si selyi nishaile imi, ela selyi ushaile ghadeike.” [

⁴³ Nao alyenyi kaoneka malaika kufuma mlunguni, kamukumba ngolo.

⁴⁴ Naye kwa kusirima kubwaa kajuzila kulomba, na rughudi yake yeluo sa matonyi gha bighati ghetikagha msangeni.]

⁴⁵ Naye aghenda auka kufuma kulomba, kawaghendela wairimi wake, kawadoka watungura kwa undu ghwa furuse.

⁴⁶ Nao kawauza, “Kudani mwatungura? Ukeni mlombe eri simwangile matimoni.”

Kuwato kwa Jesu

⁴⁷ Nao ilyi eluo keghoranya nawo, ikoghano lya wandu lyikafika lyikelongozo ni Juda, uyu eluo mumoju wa wairimi ikumi na waili. Kamughendela Jesu kamususuga.

⁴⁸ Ela Jesu kamuza, “Juda, ondemfunya Mwana wa Mdamu kwa wamaiza kwa kumususuga?”

⁴⁹ Nao wairimi wake waghenda waona ghalye wakamuza, “Bwana, tiwateme na nyufu?”

⁵⁰ Nao mumoju wawe kamtema msunyi wa Mkohani Mubwaa na lufu kampasa kisikilo cha kijo.

⁵¹ Ela Jesu kaghora, “Hata! Sigheni ghakata!” Naye kawata kisikilo cha ulya mundu kachiboesa.

⁵² Nao Jesu kawauza Wakohani wabwaa na warindiri wa Hekalu na waghosi walye wejile alye kumwata, “Mweja kuniwata na nyufu na rungu selyi wavekuri wawatogho?

⁵³ Ngelo neluo nenyo Hekaluni kila ijua simudimile kuniwata. Ela iyi ni ngelo yenyu na ya ndighi za kiza.”

Petro kumkana Jesu

⁵⁴ Nao wakamwata Jesu wakamghenza kele nyumba ya Mkohani Mubwaa. Petro kamwirima ewo kakulele.

⁵⁵ Nawo wekozile moto ghati na ghati ya baraza ya shighati, wakakala kitembo ngila mojori, Petro naese wokalile kitembo ngila mojori nawo.

⁵⁶ Nao mtumishi mumoju wa kiwake, amwona akala kitembo kele mlangazi kamuzighana kaghora, “Uyu mundu wokezanye na Jesu naese!”

⁵⁷ Ela Petro kakana, “Mundu muke, simweni!”

⁵⁸ Na kumukamuka, mundu mumoju kamwona, kamuza, “Nawose nuwe mumoju wawe.” Ela Petro kaghamba “Ee mundu simungi!”

⁵⁹ Nao nyuma ya saa kudua mundu mumoju kaghora, “Fulo uyu mundu wokezanye naye, kwani naese ni Mgalilaya!”

⁶⁰ Ela Petro kaghora, “Ee mundu, simanyagha agho ughoragha!” Nao iyo ngelo yenyi eghoragha jongole ikateta.

⁶¹ Nao Bwana Jesu kaghaluka kamzighana Petro, naye Petro kakumbuka malagho gha Bwana agha amughorere, “Hambiri ya kuteta jongole ichi kiro unikanagha mandu matatu.”

⁶² Nao Petro kafuma shighati kalila.

Jesu kusholelo na kukwito

⁶³ Nao walye wandu wemwatile Jesu wakamusholela na kumukwita.

⁶⁴ Hung'u kwenyi wakamfunga meso na kumukotela, “Tondola! Nani akukwita?”

⁶⁵ Nawo wakaghora malagho mengi ighulu yake wekemtukana.

Jesu hambiri ya Baraza

⁶⁶ Nao kuela ikoghano lyose lya waghosi wa wandu lyikakoghanika andu kumojori na wakohani wabwaa na walimu wa Sheria, nao wakamghenza Jesu kele Baraza yawe,

⁶⁷ Wakamuza, “Tighorere, ngera uwe nuwe Masihi?” Ela iye kawatumbulila, “Nikamghorera simudumusagha;

⁶⁸ na nikamkotela simunitumbulilagha.

⁶⁹ Ela kufuma indakwenyi, Mwana wa Mdamu ujekala kitembo kele mkonu ghwa kijo ghwa Mlungu.”

⁷⁰ Nao wakaghora wose, “Nuwe Mwana wa Mlungu-ba?” Naye kawauza, “Inyo mwaghora.”

⁷¹ Nao wakaghora, “Ni ushuhuda muni tihadagha sena? Tasikila isi wenyi selyi aghora na mlomu ghwake.”