Luka 21 - UVORO GHWALOLI KWA WANDU WOSE

Sadaka ya muke afwililo ni mlume

¹ Nao Jesu kazighana selyi wazuri weluo wekepotola manosi ghawe kele isanduku lya sadaka ya Hekalu,

² nao kamwona muke mumoju afwililo ni mulume wake kepotola vibelele vili.

³ Kaghora “Fulo namuza, uyu muke mkiwa afwililo ni mlume wake wapotola vingi kuchumba wose wapotola.

⁴ Kwani wose wafunya kwa ungi ghwawe, ela uyu kwa ukiwa ghwake wafunya vose eluo navo vemwika akale moyo.”

Jesu kuhelea ighulu ya kuombororo Hekalu

⁵ Nao ilyi wandu wamoju weluo wekehelea ighulu ya Hekalu na mawe ghake ghaloli na vilambo vefunyila sadaka, Jesu kaghora,

⁶ “Ivi vindu vose muvionagha, kukujagha ngelo sikosighogho iwe lyingi ighulu ya mumbawe silyeombororogho.”

Masirimi na matiriro

⁷ Nao wakamkotela, “Mwalimu agha ghekalagha nini? Na alama yake ikalagha ni kimuni ya kuja kwake?”

⁸ Jesu kawauza “Kulindeni simwalongozo kisha. Kwani wengi wekujagha kwa izina lyangu, wekeghamba, ‘Imi niye!’ na ‘Ngelo yafika!’ Simwawairime.

⁹ Na ilyi mwasikila uvoro ghwa uta na msukosuko simwaturukie, kwani agha ni suti ghakale jako, ela kudua kwenyi kwanakaile.”

¹⁰ Naye kawauza, “Mbari ijeuka ighulu ya mbari na uzuri ighulu ya uzuri.”

¹¹ Kujekala na misukosuko mibwaa ya isanga na njala na makongo ghehawilana andu kungi na kujekala na vindu veturusa na alama mbwaa kufuma mlunguni.

¹² Ela hambiri ya agha ghose wejemwata na kumtirira, wekemughenza kele sinagogi na kungizo kifungoni, na mjeghenzo kwa wazuri na wabwaa kwa undu ghwa izina lyangu.

¹³ Iyi ijekala ni ngelo yenyu yeshuhudia.

¹⁴ Kwa hung'u mangiseni ngolo zenyu, na simwaririkanye selyi mujetumbulila,

¹⁵ kwani nijemhawa malagho gheghora na akili, hata ungi wa wamaiza wenyu siwedimagha kughasima ango kughaghalula.

¹⁶ Mjefunyo kwa wamaiza ni wavali wenyu, wana wakwenyu, vichuku venyu na wagheni wenyu na wamoju wenyu mujeulagho.

¹⁷ Nenyo mjemenyo ni wandu wose kwa undu ghwa izina lyangu.

¹⁸ Ela hata sisiri ya ungi wenyu chongo siilaghayagha.

¹⁹ Kwa kurumaghia kwenyu mjekukiza.

Jesu kughora ighulu ya kuhakilo Jerusalemu

²⁰ “Ela ilyi mwaona Jerusalemu yamaro ni askari, manyeni kamba kuhakilo kwake kwafika avui.

²¹ Aho walye weo Judea wakimbile mghondini, na walye weo kele muzi wafume; na walye weo shighati mbweni, siwangile kele muzi.

²² Kwani agha ni majua gha makwito kukatisa ghose gha mawandiko gha kuela.

²³ Ni bugha kwawe walye weo na vifu na walye wemamisagha majua agho! Kwani kujekala na wasi mubwaa isangeni, na hare ya Mlungu ighulu ya wandu awa.

²⁴ Wamoju weulaghogho kwa lufu, na wamoju wetwalogho wasunyi kele masanga gha mbari nzima; na Jerusalemu ijelatilo ni mbari nzima, hata ngelo ya mbari nzima ikatile.

Kuja kwa Mwana wa Mdamu

²⁵ “Nao kujekala na alama kele ijua na mwezi na ndonde. Na kele urumengu wandu wa mbari nyingi wejekala na wasi. Siwemanyagha koghaluka kwa kuruma kwa mivomivo na bahari.

²⁶ Wandu wejesheha kwa wogha ghoghelela ghalye ghose ghekujagha urumenguni; kwani ndighi za mlunguni zijesheghesheka.

²⁷ Nao aho niko wejemwona Mwana wa Mdamu keja kele iwengu na ndighi na ubwaa.

²⁸ Nao ilyi mwaona malagho agha ghadyowa kudeika, kaleni kimusi na munule vongo venyu, kwa kukala ukizi ghwenyu ghuo avui.”

Ifundiso kufuma kwa mtini

²⁹ Nao Jesu kawaghorera ikataniso ilyi, “Loleni mtini na miti yose.

³⁰ Mkaiona yadyowa kudyaila, mwamanya kamba vuli yafika avui.

³¹ Ni hung'u kwenyi ilyi mwaona kamba malagho agha ghadyowa kukala, manyeni kamba Uzuri ghwa Mlungu ghwafika avui.

³² Fulo namuza, kivali ichi sichiitagha kungi hata agha ghose ghakala.

³³ Mlunguni na isanga viduwagha, ela malagho ghangu sigheduwagha lyingi.

Yanafweni kulinda

³⁴ “Ela kulindeni, ngolo zenyu sizajulo ni lwafuo na unarui na malagho gha umana ughu; hata mudoko ni lyilya Ijua Ibwaa kisha simomanyagha sa mtegho.

³⁵ Kwani lyiwajilagha wandu wose kele urumengu.

³⁶ Ela lindeni ngelo zose, mkelomba kamba mpate ndighi zeita wasi ghose ghujeja, na kumanga kimusi hambiri ya Mwana wa Mdamu.”

³⁷ Naye Jesu oluo kefundisa wandu Hekaluni kila ijua, ela nakiro kafuma kaghenda kulala kele mghondi ghwa Mizeituni.

³⁸ Na ikesho kiro wandu wose wakamjila Hekaluni kumsikizila.