Luka 20 - UVORO GHWALOLI KWA WANDU WOSE

Ikotelo ighulu ya ndighi za Jesu

¹ Nao ijua imoju ilyi Jesu eluo kefundisa wandu hekaluni na kuwachilila Ilagho Lyaloli, wakohani wabwaa na walimu wa Sheria ngila mojori na waghosi wakamjila,

² na kumuza, “Tighorere ni kwa ndighi muni udeagha agha malagho ango ni ani akuhawile ndighi izi?”

³ Jesu kawatumbulila, “Namose nimukotelagha ikotelo,

⁴ Nighorereni, ubatizo ghwa Johana ghwanafumile kwa Mlungu ango kwa wandu?”

⁵ Nao wakadyowa kuhelea wenyi wekeghamba, “Tikaghora, ‘kufuma kwa Mlungu,’ ughoragha, ‘Kudani simomudumuse?’

⁶ Ela tikaghora; ‘Kwa wandu,’ wandu wose wejetilasa na mawe. Kwani wanadumuse kamba Johana woluo tondolo.”

⁷ Nao wakaghamba, siwamanyile andu ghufumile.

⁸ Nao Jesu kawauza, “Hata imi simughoreragha ni kwa ndighi muni nideagha izi ghore.”

Ikataniso lya walimi wa mbuwa ya mizabibu

⁹ Nao Jesu kadyowa kuwaghorera wandu ikataniso ilyi: “Mundu mumoju owandile mizabibu mbweni, kawahawa walimi; katamba isanga lya kulele kwa majua mengi.

¹⁰ Nao ngelo ifika ya mavalo, katuma mtumishi kwa walimi, eri wamuhawe ifungu lya mavalo gha mbuwa ya mizabibu. Ela walye walimi wakamkwita na wakamugalisa mikonu mituu.

¹¹ Nao katuma mtumishi muzima, naye wakamkwita na kumufwisha waya na kumugalisa mikonu mituu.

¹² Nao katuma mtumishi wa katatu, naye wakamushoghonola na kumkumba shighati.

¹³ Nao ulya mundu wa mbuwa ya mizabibu kaghora, ‘Ndamu nideagha ije? Nimutumagha mwanwangu nimshaile, ngera wemuhawagha ishima.’

¹⁴ Ela walye walimi waghenda wamwona, wakaghora wenyi, ‘Uyu niye mundu wa ufwa, ndokoni timulaghe eri ufwa ghukale ghwetu.’

¹⁵ Nawo wakamufunya shighati ya mbuwa ya mizabibu, wakamuulagha.” Jesu kawakotela, “Ndamu ulya mundu wa mbuwa ya mizabibu uwadeagha ije walye walimi?

¹⁶ “Ujeja na kuwaulagha walye walimi na kuwahawa walimi wazima mbuwa ya mizabibu.” Nawo waghenda kusikila hung'u wakaghamba, “Agho ghakale kulele.”

¹⁷ Ela Jesu kawazighana na kawauza, “Ndamu nini kutambula kwa Iwandiko ilyi lya Kuela? ‘Iwe lyeleghilo ni wawaghali, lyakala iwe ibwaa lya msingi.’

¹⁸ “Mundu uwo wose egwilagha ilyo iwe ujechukachuka, ela lyikamgwila mundungi ujekindihiso.”

Ikotelo ighulu ya kulipa kodi

¹⁹ Walimu wa Sheria na wakohani wabwaa wakatima kumwata ilya ngelo yenyi, kwani wemanyile kamba ikataniso lyilya lyeghoriro ighulu yawe, ela wakawaogha wandu.

²⁰ Kwa hung'o wakamlolila. Wakatuma wanguchi wakudeile wenyi kukala wandu wa hachi wamwate kwa ghore zake, nao ima wamungize kele mikonu ya wabwaa na mubwaa wa serikali.

²¹ Walye wanguchi wakamkotela, “Mwalimu, tamanya kamba wanaghoragha na kufundisa kwa hachi hata susaghulagha mundungi, ela wafundisa ngila ya Mlungu kwa fulo.

²² Ndamu tighorere, ngera ni hachi kulipa kodi kwa Kaisari ango ije?”

²³ Ela Jesu kemanya mtegho ghwawe, kawauza.

²⁴ “Nionyezeni pesa iitogho dinari. Sura na mawandiko agha ni ghani?” Nawo wakamtumbulila, “Ni va Kaisari.”

²⁵ Nao Jesu kawauza, “Mhaweni Kaisari, vindu va Kaisari na Mlungu vindu va Mlungu.”

²⁶ Nawo siwadimile kumwata hambiri ya wandu kwa maghori ghake, ela wakakirimuwa kwa matumbulilo ghake, wakanyamala.

Ikotelo ighulu ya kuzuka kufuma kwa wafwa

²⁷ Nao Wasadukayo wamoju awa waghambagha sikwesi kuzuka, wakamjila Jesu, wekeghamba,

²⁸ “Mwalimu, Musa wanatiwandikile ketiuza kamba ngera mundu afwa kasigha muke sewesi wana, wakwawe amuse ulya muke ampatile wakwawe wana.

²⁹ Nao koluo na wana wa mundu mumoju mfungate, wa hambiri kamusa muke, kafwa sesighile wana.

³⁰ Nao Wa kaili kumusa kafwa,

³¹ na wa katatu naese kamusa; na hung'u kwenyi walye wose mfungate wakafwa siwesighile wana.

³² Nao ko nyuma ulya muke naese kafwa.

³³ Ndamu kele kuzuka kwa wafwa ulya muke ukalagha wa ani? Kwani wose mfungate wemuusile?”

³⁴ Jesu kawatumbulila, “Wana wa urumengu ughu walola na kuuso,

³⁵ ela awa wetalogho kamba wanafweni kuzuka kufuma kwa wafwa na kukala na ngaro kele urumengu ghukujagha, siwausogho na siwalolagha.

³⁶ Kwani siwefwighagha lyingi kwa kukala wendefwanana na wana malaika na ni wana wa Mlungu, kwa kukala wazuso kufuma kwa wafwa.

³⁷ Ela kamba wafwa wazuka, hata Musa wanaonyeze kele mawandiko gha songa, andu omupang'ile Bwana, Mlungu wa Abrahamu, Mlungu wa Isaki na Mlungu wa Jakobo.

³⁸ Kwani iye si Mlungu wa awa wafwile, ela wa awa weo moyo. Kwani kwake wose wanakalagha moyo.”

³⁹ Nao wamoju wa walimu wa Sheria wakatumbulila, “Mwalimu, watumbulila kirani.”

⁴⁰ Kwani sikowesi mundungi adimile kumkotela makotelo ghengi sena.

Ikotelo ighulu ya Masihi

⁴¹ Ela Jesu kawakotela, “Kudani waghoragha kamba Masihi ni Mwana wa Daudi?

⁴² Kwani Daudi mwenyi kele chuo cha Zaburi waghamba: ‘Bwana omuzile Bwana wangu: Kala kitembo kele mkonu ghwangu ghwa kijo,

⁴³ hata niwadee wamaiza wako kukala andu koikilila maghulu ghako.’

⁴⁴ Kwa hung'u Daudi wampang'a Bwana, ndamu udimagha ije kukala mwana wake?”

Jesu kuonya ighulu ya walimu wa Sheria

⁴⁵ Na wandu wose wekesikila, Jesu kawauza wairimi wake,

⁴⁶ “Kulindeni na walimu wa Sheria waboelogho ni kughenda warwara nguo ndele na washayagha kuroghoo ni wandu sokoni, na kukala vifumbi va hambiri kele sinagogi na andu kwa ishima kele karamu.

⁴⁷ Wanalyighagha na kuusa vindu va wake wafwililo ni walume wawe na walomba malombi malele dali. Nawo makwito ghawe ghejekala mabwaa.”