Luka 2 - UVORO GHWALOLI KWA WANDU WOSE

Kuvalo kwa Jesu Kristo

¹ Nao ghalye majua uvoro ghwa kizuri ghukafuma kwa Kaisari Augusto kamba wandu wose wa uzuri ghwake wawandiko.

² Uko koluo ni kutalo kwa hambiri ngelo Kurenio eluo mubwaa wa isanga lya Siria.

³ Nawo wose wakaghenda kuwandiko, kila mumoju kele muzi ghwake ghwenyi.

⁴ Naye Josefu kaghenda kufuma muzi ghwa Nazareti ya Galilaya, hata muzi ghwa Bethlehemu ya Judea andu avelelo mzuri Daudi, kwa kukala oluo wa nyumba na mbari ya Daudi,

⁵ eri awandiko ngila mojori na Mariamu, uyu eluo kemusa, naye woluo na kifu.

⁶ Nao ilyi weluo alye ngelo yake yekufungula ikafika.

⁷ Naye kavala mwana wake wa hambiri wa kiwalume, kamubula vitambaa va mirafu na kamtunguza kele hero andu nyamandu zeluo zikelyila, kwa kukala sikowesi ulalo kele nyumba za wagheni.

Walisa na wana malaika

⁸ Nao kele isanga lyilya koluo na walisa shighati wekelinda uranu ghwawe na kiro.

⁹ Nao malaika wa Bwana kawafumila na ubwaa ghwa Bwana ghukawalangazila gasi zose, nawo wakangilo ni wogha mubwaa.

¹⁰ Nao malaika kawauza, “Simwadee wogha, kwani namletela uvoro ghwaloli ghumuboela na ndighi ghujekala kwa wandu wose.

¹¹ Kwani lelo kele muzi ghwa Daudi wavalo kwa undu ghwenyu Mkizi, naye ni Kristo Bwana.

¹² Na iyi ijekala alama kwenyu: mujemwona mwana abulilo vitambaa va mirafu na atungure kele hero andu nyamandu zilyilagha.”

¹³ Nao iyo ngelo yenyi wakaoneka ngila mojori na ulya malaika, bonjo ya mlunguni, ikemlika Mlungu ikeghamba,

¹⁴ “Ubwaa kwa Mlungu wa Ighulu na Sere aha msangeni kwa wandu eboelanyogho nawo.”

¹⁵ Nao malaika waghenda kuuya mlunguni; walisa wakauzana wenyi, “Tighendeni Bethlehemu tione malagho agha ghadeika Bwana atighorera.”

¹⁶ Nawo wakaghenda shoshoa wakamdoka Mariamu na Josefu, na mwana atungure kele hero andu nyamandu zilyilagha.

¹⁷ Nawo walisa waghenda wamwona wakawaghorera selyi malaika aghorire ighulu ya ulya mwana.

¹⁸ Na wose wasikile wakashiniso ni ghalye ghaghoriro ni walisa.

¹⁹ Ela Mariamu kaghaika malagho agha ghose ngoloni kwake keghaerekeza.

²⁰ Nao walisa wakauya mnzawe wekemlika na kumkasa Mlungu kwa ghose wasikile na kuona selyi waghorero ni malaika.

Jesu kuhawo izina

²¹ Nao nyuma ya majua manane kachwigho na kaito Jesu, izina ehawilo ni malaika hambiri mee sengizile kifu.

Jesu kughenzo Hekaluni

²² Nao ngelo yawe ifika yeombocholo, kuirimana na Sheria ya Musa, wakamghenza mwana Jerusalemu eri wamwike kwa Bwana.

²³ Selyi kwenyi iwandiko kele Sheria ya Bwana, “Kila mwana wa kiwalume efungulagha kifu cha mee ukalagha wa kuela kwa Bwana,”

²⁴ na kufunyogho sadaka kuirima selyi Sheria ya Bwana ighoragha: Maringo gha kishalai maili ango maringo gha omu maili makoo.

²⁵ Nao alye Jerusalemu koluo na mundu mumoju aitogho Simeoni. Naye woluo mundu wa hachi na amuhawagha Mlungu ishima, woluo kelolila kukizo kwa Waisraeli, na woluo na Roho wa Kuela.

²⁶ Naye wofunukulilo ni Roho wa Kuela kamba sefwighagha hambiri semonile Masihi wa Bwana.

²⁷ Naye kelongozo ni Roho wa Kuela, keja Hekaluni, nawo wavali waghenda wamleta mwana Jesu, eri adeilo selyi ada ya Sheria yeluo.

²⁸ Kamwata mikonuni kwake na kamkasa Mlungu keghamba.

²⁹ “Bwana ndamu wamuhawa mtumishi wako rusa, aghende na sere selyi umulagile.

³⁰ Kwani meso ghangu ghaona ukizi ghwako,

³¹ ughu ughuikile kirani kwa wandu wose:

³² Mlangazi ghowalangazila wandu wa mbari nzima, na ubwaa kwa wandu wako wa Israeli.”

³³ Nao tatie na mee mwana wakashinika kwa agha ghaghoriro ighulu yake.

³⁴ Na Simeoni kawabarikia na kamuza Mariamu mee, “Uyu mwana wasaghulo ni Mlungu kwa undu ghwa kuhaita na kukila kwa wengi kele Israeli na kukala alama ighorogho laghelaghe,

³⁵ na lufu ludyayagha roho yake eri maririkanyo gha ngolo nyingi ghamanyikane.”

³⁶ Nao koluo na tondolo muke aitogho Ana, mchana wa Fanueli, wa mbari ya Asheri, woluo mkekulu wa miaka mingi, owusilo ni mlume na wakakalanya miaka mfungate, kufuma auso,

³⁷ naye woluo muke afwililo ni mlume hata ilya ngelo, na oluo na miaka mirongo minane na ine. Naye seluo kefuma Hekaluni, kiro na msenya woluo kemtasa Mlungu, kefunga na kulomba.

³⁸ Naye aghenda afika alye ilya ngelo, kamkasa Mlungu, kaghora malagho gha mwana kwa wose weluo wekekoserea kukombolo kwa Jerusalemu.

Kuuya Nazareti

³⁹ Nao Josefu na Mariamu wamalila kudea ghose ghewafweni kuirimana na Sheria ya Bwana, Wakauya Galilaya kele muzi ghwawe ghwa Nazareti.

⁴⁰ Naye ulya mwana kazegua, kapata ndighi, kajulo ni suku, na mbazi ya Mlungu yeluo naye.

Mwanake Jesu Hekaluni

⁴¹ Nawo wavali wake weluo wekeghenda Jerusalemu kila mwaka kwa karamu ya Pasaka.

⁴² Nao ilyi Jesu eluo na miaka ikumi na mili, wakaghenda Jerusalemu selyi yeluo ada yawe.

⁴³ Nao karamu ighenda idua, wakadyowa kuuya kaya, mwanake Jesu kasighika na nyuma Jerusalemu, wavali wake siwemanyile.

⁴⁴ Ela weluo wekeririkanya kamba wanakezanye na wandu wa charo, wakatamba ijua ilanzi, nao ima wakamhada kwa mbari zawe na wagheni wawe.

⁴⁵ Nawo waghenda wamusowa wakauya Jerusalemu wekemhada.

⁴⁶ Nao nyuma ya majua matatu wakamwona Hekaluni, kekala kitembo na walimu, kewasikizila na kuwakotela makotelo.

⁴⁷ Na wose wamusikizile wakashiniso ni kutambukilo kwake na matumbulilo ghake.

⁴⁸ Nawo wavali wake waghenda wamwona wakashinika: Mee kamuza, “Mwanwangu kudani watidea hung'u? Tatio nemi takuhada kwa wasi.”

⁴⁹ Naye kawauza, “Kudani mwanihada? Simweni kamba yananifweni nikale kele nyumba ya Aba?”

⁵⁰ Ela wavali wake siwatambukilo ni selyi eluo keghora nawo.

⁵¹ Nao Jesu kauyanya nawo hata Nazareti, naye woluo kewasikila. Mee kaika izi ghore zose ngoloni kwake.

⁵² Na Jesu kajuzila kazegua kele suku na kimo, keshayo ni Mlungu na wandu.