Luka 19 - UVORO GHWALOLI KWA WANDU WOSE

Jesu na Zakayo

¹ Nao Jesu kangila Jeriko, naye ilyi eluo keita,

² alyenyi koluo na mundu mumoju aitogho Zakayo, Naye woluo ni mubwaa wa wafunyi kodi, na oluo mzuri.

³ Naye oshaile kumwona Jesu nani, ela sadimile, kwa undu ghwa makoghano kwa kukala oluo mvui.

⁴ Kwa hung'u kakimbila hambiri, kajoka kele mkuyu eri amwone, kwani oluo uitilagha ilya ngila.

⁵ Nao Jesu afika andu alye, kalola noko ighulu na kamuza, “Zakayo, jika shoshoa, kwani lelo ni suti nikale kele nyumba yako.”

⁶ Zakayo kajika shoshoa, kamhokera kwa kuboelo.

⁷ Nao wandu wose waghenda waona wakazughunuka wekeghamba, “Waghenda kukala mugheni wa mundu wa kaung'a.”

⁸ Nao Zakayo kakala kimusi kamuza Jesu, “Bwana, zighana nusu ya mali yangu naihawa wakiwa, na ngera nimkalilile mundungi na kindu chingi nimuujilagha mandu mane.”

⁹ Nao Jesu kamuza, “Ukizi ghwaijila nyumba iyi lelo, kwani uyu naese ni mwana wa Abrahamu.

¹⁰ Kwani Mwana wa Mdamu wojile kuhada na kukiza ichi chilaghaye.”

Ikataniso lya pesa

¹¹ Nao ilyi weluo wekesikizila ghore izi. Jesu kajuzila kuwaghorera ikataniso, (kwa kukala oluo kavui na Jerusalemu na wandu weluo wekeririkanya kamba Uzuri ghwa Mlungu ghuoneka shoshoa ng'ori.)

¹² Kwa hung'u kawauza, “Mundu mumoju mubwaa otambile isanga lya kulele kupata uzuri ghotawala nao ima auye.

¹³ Ela hambiri seghendile, kawapang'a watumishi wake ikumi, kawahawa kila mumoju ifungu lya pesa na kawauza, chumeni nazo ngelo niseo aha.

¹⁴ Ela wandu wa isanga wemumenyile, nawo wakatuma wanguchi nyuma yake kughamba, ‘Sitishaile uyu mundu akale mzuri wetu.’

¹⁵ “Nao aghenda auya apata uzuri, kaghamba walye watumishi awahawile pesa wapang'o, eri amanye nini wapatile kele kudea biashara.

¹⁶ Ulya wa hambiri keja, kamuza, ‘Bwana, ifungu lya pesa zako lyanapatile faida mandu ikumi.’

¹⁷ Naye kamuza, ‘Ni kirani uwe mtumishi waloli, kwa kukala oluo mudumusiliki kwa machache, ukalagha mubwaa wa mizi ikumi.’

¹⁸ Na wa kaili keja kamuza, ‘Bwana, ifungu lya pesa zako lyanapatile faida mandu masanu.’

¹⁹ Naye kamuza, ‘Nawe ukalagha ighulu ya mizi misanu.’

²⁰ “Nao keja mzima kamuza, ‘Bwana, ifungu lya pesa yako silyi; nelyivisile kele kitambaa,

²¹ kwani nanakuoghile, kwa kukala wanabile, wanausagha ichi soikile, na wanakwashagha ichi sowandile.’

²² Nao kamuza, ‘Nikutaghanyagha kwa mlomu ghwako ghwenyi, uwe mtumishi wa laghelaghe! Wanamanyile kamba imi nimi mundu abile, nanausagha icho seikile na nanakwashagha icho sewandile?

²³ Kudani ndamu soikile pesa yangu benki, na ngelo neja niipate ngila mojori na faida yake.’

²⁴ “Nao kawauza awa wekezanye kimusi naye, ‘Msokeni ifungu lya pesa ewo nazo na mumuhawe ewo na mafungu gha pesa ikumi.’

²⁵ Nawo wakamuza, ‘Bwana uwo na mafungu gha pesa ikumi.’

²⁶ Naye kawauza, ‘Uyu mundu ewo nacho ujejuzilo, ela uyu mundu sewesi, ujesoko hata ichi ewo nacho.

²⁷ Ela walye wamaiza wangu walye weluo siweshaile niwatawale, waleteni aha muwaulaghe hambiri yangu!’”

Jesu kungila Jerusalemu na izumo

²⁸ Nao Jesu aghenda aghora hung'u, kawakayaila hambiri kughenda Jerusalemu.

²⁹ Naye aghenda afika kavui na Bethfage na Bethania, kele mghondi ghwa Mizeituni, katuma wairimi wake waili,

³⁰ kewauza, “Ghendeni hata muzi ghuo hambiri, na mukengila mjeona mwana wa punda afungilo, lyingi sejokilo ni mundungi; mfunguleni muniletele.

³¹ Ilyi mundungi amukotela, ‘Kudani mumufungulagha?’ Muuzeni, ‘Bwana wanamushaile.’”

³² Nao walye wetumilo wakaghenda na wakamdoka selyi kwenyi awauzile.

³³ Nao ilyi weluo wekemufungula mwana punda, mundu wa punda kawauza, “Kudani mumufungulagha mwana wa punda?”

³⁴ Nawo wakamuza “Bwana wanamshaile.”

³⁵ Nao wakamleta mwana punda kwa Jesu. Nao wakawala nguo zawe ighulu ya mwana wa punda na kumjosa Jesu ighulu yake.

³⁶ Nao ilyi Jesu eluo keghenda ighulu ya punda wandu wakawala nguo zawe ngileni.

³⁷ Nao aghenda afika avui na Jerusalemu kele lughongo lwa Mizeituni, makoghano ghose gha wairimi wakadyowa kuboelo na kumkasa Mlungu kwa lwaka lubwaa kwa undu ghwa malagho ghose mabwaa waghaonile.

³⁸ Wekeghamba, “Wabarikio Mzuri ekujagha kwa izina lya Bwana. Sere mlunguni na ubwaa kwa Mlungu!”

³⁹ Nao wamoju wa Wafarisayo weluo kele makoghano wakamuza, “Mwalimu, wanyamaze wairimi wako.”

⁴⁰ Jesu kawatumbulila, “Fulo nendemuza, ilyi awa wanyamala, mawe gheghoragha na lwaka lubwaa.”

Jesu kulilila Jerusalemu

⁴¹ Nao Jesu aghenda afika avui na kughuona muzi, kaghulilila

⁴² keghamba, “Baha ngera omanyile ijua lya lelo malagho ghaletagha sere! Ela ndamu ghaviso mesoni kwako.

⁴³ Kwani majua ghekujagha, wamaiza wako wekurighagha na kukumara gasi zose.

⁴⁴ Na wekuhaitisagha ngila mojori na wana wako weo amweni, nawo siwesighagha iwe lyingi ighulu ya mumbawe, kwa kukala sumanyile ngelo Mlungu ejile kukukiza.”

Jesu kughenda Hekaluni

⁴⁵ Nao Jesu kangila Hekaluni, kadyowa kuwafunya shighati walye weluo wekedea biashara,

⁴⁶ kewauza, “Yanawandiko, ‘Nyumba yangu ikalagha nyumba yelomba,’ ela mwaidea kukala mbanga ya wavekuri.”

⁴⁷ Naye kila ijua oluo kefundisa Hekaluni. Nawo wakohani wabwaa na walimu wa Sheria na vilongozi va wandu wakahada ngila yemuulagha.

⁴⁸ Ela siwapatile ngila ingi yedea, kwani wandu wose weluo wekemusikizila.