Luka 18 - UVORO GHWALOLI KWA WANDU WOSE

Ikataniso lya mke afwililo na mtaghanyi

¹ Nao Jesu kawaghorera wairimi wake ikataniso lyewaonyeza kamba yanawafweni kulomba kila ngelo na siwafwe ngolo.

² Kawauza, “Kele muzi ghumoju koluo na mtaghanyi semwoghagha Mlungu hata semuhawa mundungi ishima,

³ na alyenyi kele ghulya muzi, koluo na muke mumoju afwililo ni mlume wake, eluo kemghendela kemlomba amtaghanye na ulya eluo kemsirimisa.

⁴ Naye kwa ngelo nyingi ulya mtaghanyi kalegha kumwarura; ela kudua kaghora ngoloni kwake, ‘Hata ngera sani simwoghagha Mlungu hata simtalagha mundungi,

⁵ kwa kukala uyu muke afwililo ni mlume wanisirimisa, nijemtaghanya eri sejenisilisa ndighi kwa kunijila.’”

⁶ Nao Bwana kawauza, “Sikileni selyi mtaghanyi wa laghelaghe eghoragha.

⁷ Ndamu Mlungu sedimagha kuwatetela wasaghulo wake awa wemlililagha kiro na msenya? Ado umukamukagha kuwawarura?

⁸ Nemi namuza, ujewatetela shoshoa ng'weri. Ije ngelo Mwana wa Mdamu ekujagha, ujedoka idumusi kele urumengu?”

Ikataniso lya Mfarisayo na mfunyi kodi

⁹ Nao Jesu kawaghorera ikataniso ilyi nalyose walye wekudumuse wenyi kamba ni wahachi wekewamenya wazima.

¹⁰ “Wandu waili weghendile Hekaluni kulomba, mumoju oluo Mfarisayo na mumoju oluo mfunyi kodi.

¹¹ Ulya Mfarisayo kakala kimusi mwenyi kalomba hung'u, ‘Ee Mlungu nakufunyila asanta kwa kukala imi sifwanane na wandu wazima: wavekuri, wandu siweo wahachi, wazingi na hata sa uyu mfunyi kodi.

¹² Nanafungagha kulya mandu maili kwa jumwa na nanafunyagha ifungu imojori lya ikumi lya mali yangu yose.’

¹³ Ela mfunyi kodi kakala kimusi kulele kwenyi, hata sadimile kunula meso ghake noko mlunguni, ela kakukwita lagaya yake, keghamba, ‘Ee Mlungu nifwile waya nimi ne mkaung'a.’

¹⁴ Nemi namuza, uyu mundu wanagalile nyumba kwake ahawo hachi kumwisa ulya mumoju; kwani kila mundu ekujosagha ujisogho, ela uyu ekuselezagha ujosogho.”

Jesu kuwabarikia wanake wachache

¹⁵ Nawo weluo wekemletela Jesu hata wanake wachache eri awaikilile mikonu, Wairimi waghenda waona wakawakemela.

¹⁶ Ela Jesu kawapang'a kwake keghamba, “Sigheni wanake weje kwangu, simwawaime, kwani Uzuri ghwa Mlungu ni kwa wandu sawa.

¹⁷ Nemi namuza kamba, uwo wose sewatagha Uzuri ghwa Mlungu sa mwanake sengilagha awenyi.”

Mundu mzuri

¹⁸ Nao kilongozi mumoju kamkotela Jesu, “Mwalimu waloli, nideagha ije nipate umana ghwa kale na kale?”

¹⁹ Jesu kamtumbulila, “Kudani uniitagha waloli? Sikwesi mundungi waloli sala Mlungu.

²⁰ Wanaiweni milomu: ‘Swazinge, swaulaghe, swaiwe, swamzighirire mumbenyu ndimi na umuhawe ishima tatio na meo?’”

²¹ Naye katumbulila, “Agha ghose naghawata kufuma unake ghwangu.”

²² Naye Jesu aghenda asikila hung'u kamuza, “Wasowekelo ni kindu kimojori. Tagha vindu vose uwo navo uwasarire wakiwa, nawe ujekala na mali mlunguni, na ima uje uniirime.”

²³ Ela aghenda asikila agha kawasilo, kwani oluo na mali nyingi.

²⁴ Nao Jesu aona selyi afurusa, kaghora, “Kwanakulile sani kwa awa weo na mali kungila Uzuri ghwa Mlungu.

²⁵ Kwani kwanawanguwe kwa ngamila kungila kele ilanga lya sinzano kuchumba kwa mzuri kungila kele Uzuri ghwa Mlungu.”

²⁶ Nao walye wandu wamsikile wakaghora, “Ndamu nani edimagha kukila?”

²⁷ Jesu kawauza, “Agha sighedimikagha kwa mdamu, kwa Mlungu ghadimika.”

²⁸ Nao Petro kamuza, “Zighana! Tanasighile nyumba zetu tikakuirima.”

²⁹ Jesu kawauza, “Fulo namuza, sikwesi mundungi esighagha nyumba, ango mkwake, ango wana wakwawe wa walume ango wavali wake ango wana kwa undu ghwa Uzuri ghwa Mlungu,

³⁰ sepatagha mengi ngelo iyi, na kele urumengu ghukujagha umana ghwa kale na kale.”

Jesu kughora indu lya katatu ighulu ya kifwa chake

³¹ Jesu kawafunya wairimi ikumi na waili mbali, kawauza, “Zighaneni tendeghenda Jerusalemu, na malagho ghose ghawandikilo Mwana wa Mdamu ni wana tondolo ghejekatiso.

³² Kwani ujefunyo kwa mbari nzima, naye ujesholelo na kufwisho waya na kuchilo mate.

³³ Nawo wejemchapa na kumulagha. Na ijua lya katatu ujezuka.”

³⁴ Ela wairimi wake siwatambukilo ni agha eluo keghora; kwani ghevisilo kwawe, na siwamanyile agha eluo keghora.

Jesu kuboesa kifondo eluo kelomba

³⁵ Nao Jesu afika avui na Jeriko, kadoka mundu mumoju kifondo akala kitembo mbalimbali ya ngila kelomba.

³⁶ Naye asikila makoghano ghekeita kakotela, “Kuo na kimuni?”

³⁷ Wakamuza, “Ni Jesu wa Nazareti eitagha.”

³⁸ Nao kaghora na lwaka lubwaa keghamba, “Jesu Mwana wa Daudi, unifwile waya!”

³⁹ Nao wandu wekayaye wakamkemela, wakamuza anyamale. Ela iye kakema na lwaka lubwaa, “Mwana wa Daudi unifwile waya!”

⁴⁰ Nao Jesu kamanga kaghora aleto kwake. Naye aghenda eja avui, Jesu kamkotela.

⁴¹ “Wanashaile nikudeileni?” Naye katumbulila, “Bwana, nanashaile nipate kuona sena.”

⁴² Nao Jesu kamuza, “Haya ona! Idumusi lyako lyakuboesa.”

⁴³ Nao iyo ngelo yenyi kapata kuona na kumwirima, kemlika Mlungu. Nawo wandu wose waghenda waona, wakamlika Mlungu.