Luka 15 - UVORO GHWALOLI KWA WANDU WOSE

Ikataniso lya ng'onzi ilaghaye

¹ Nao wafunyi kodi na wakaung'a wose ilyi weluo wekemtindirira Jesu wamsikizile,

² Wafarisayo na walimu wa Sheria wakanung'unika, wekeghamba, “Uyu mundu wanawahokeragha wakaung'a na kulyanya nawo!”

³ Na Jesu kawaghorera ikataniso ilyi:

⁴ “Ni mundu muni kwenyu ewo na ng'onzi ighana, ilyi alaghaza mojori, sesighagha zilya mirongo kenda na kenda kireti na aghende kuhada ilya ilaghaye hata aione?

⁵ Naye ilyi aiona, uitukagha iwegha kwa kuboelo,

⁶ naye ilyi auya kaya, uwapang'agha wagheni wake na wambawe awauze, ‘Boeloni ngila mojori nemi, kwani naiona ng'onzi yangu yelaghaye!’

⁷ Hung'u kwenyi namuza, kujekala na kuboelo kubwaa mlunguni kwa mkaung'a mumojori erihagha kuchumba kwa wahachi mirongo kenda na kenda siwewo na undu ghoriha.

Ikataniso lya pesa ilaghaye

⁸ “Ango ni muke muni kwenyu ewo na shilingi ikumi, kalaghaza mojori, sewashagha taa na kushera nyumba, na kuihada hata aione?

⁹ Naye ilyi aiona upang'agha wagheni wake na wambawe, awauze, ‘Boeloni nemi, kwani naiona shilingi yangu ilaghaye.’

¹⁰ Hung'u kwenyi namuza kujekala na kuboelo kwa malaika wa Mlungu kwa mkaung'a mumojori erihagha.”

Ikataniso lya mwana alaghaye

¹¹ Nao Jesu kaghora, “Koluo na mundu mumoju eluo na wana waili.

¹² Na ulya mchache kamuza tatie, ‘Aba nihawe mali ilya ikalagha yangu.’ Naye tatie kawasarira mali yake.

¹³ Nao nyuma ya majua machache, ulya mwana mchache katagha mali yake yose, kapata pesa na kutamba isanga lya kulele. Naye alye kahakila mali yake kwa kulya laghelaghe.

¹⁴ Naye aghenda amalila kuzitumia zose, njala ikangila kele lyilya isanga. Naese kadyowa kusowa chelya.

¹⁵ Nao kaghenda kwa mundu mumoju wa isanga lyilya, kaghenzo mbweni kwake kulisa nguluwe.

¹⁶ Naye karirigho ni kulya makoko gheluo ghekelyigho ni nguluwe, hata sikowesi mundungi emuhawile kindu chingi.

¹⁷ Nao aghenda atoka akili, karirikanya, ‘Ni watumishi walinga wa aba welyighagha na kuhangala, nemi aha nendefwa kwa njala!

¹⁸ Niukagha nighende kwa Aba nimuze, Aba nanadeile kaung'a ighulu ya Mlungu na hambiri yako.

¹⁹ Sifweni kuito mwana wako. Nidee nikale mumoju wa watumishi wako.’

²⁰ Nao kauka kaghenda kwa tatie. “Ela ilyi eluo kulele kwenyi, tatie kamwona kamufwila waya, na kamkimbilila na kamusura na kumususuga.

²¹ Nao ulya mwana kamuza, ‘Aba, nanadeile kaung'a ighulu ya Mlungu na hambiri yako na siinifweni kuito mwana wako.’

²² Ela tatie kawauza watumishi wake, ‘Leteni shoshoa nguo yaloli mumurwarise, na mumungize ngome kele chala chake na vilatu kele maghulu ghake.

²³ Na mulete ngache ibandile muishinje tilye na tiboelo!

²⁴ Kwani uyu mwanwangu wofwile naye wazuka, olaghaye na waoneka.’ Nawo wakadyowa kuboelo.

²⁵ “Naye ulya mwanwake mubwaa oluo mbweni ilya ngelo, nao ilyi eluo keuya, afika avui na kaya, kasikila ngoma na kivini.

²⁶ Kampang'a mumoju wa watumishi na kamkotela; ‘Ni kimuni chio aho?’

²⁷ Ulya mtumishi kamuza, ‘Wakwenyu weja, na tatio wamushinjila ilya ngache ibandile, kwa kukala wampata ewo moyo.’

²⁸ Ela iye kawasilo na kalegha kungila kaya.

²⁹ Tatie kafuma kamungolangola, ela kamuza tatie, ‘Lola ni miaka milinga nakutumikila na lyingi seleghile malagho ghako? Hata na lyingi sunihawile ndangina eri niboelo na wagheni wangu.

³⁰ Ela uyu mwanwako amalile mali yako na vijimbo eja, wamushinjila ngache ibandile.’

³¹ Nao tatie kamuza, ‘Mwanwangu, ngelo zose uwo ngila mojori nemi, na vose nio navo ni vako.

³² Kwa hung'u ni hachi tibwelo na tiseke, Kwani uyu wakwenyu wofwile na wazuka, wolaghaye na waoneka.’”