Luka 13 - UVORO GHWALOLI KWA WANDU WOSE

Kuriha kaung'a ango kufwa

¹ Nao ilya ngelo yenyi wandu wamoju weluo alye, wakamghorera Jesu gha Wagalilaya wamoju waulagho ni Pilato ngelo yefunya sadaka zawe.

² Naye kawatumbulila, “Ado muririkanyagha kamba Wagalilaya awa niwo weluo wakaung'a kuisa Wagalilaya wose; kwa kukala wanasirime hung'u?

³ Fulo namuza, hata siko kungi, ela hata inyo nanyose mkalegha kuriha, mufwighagha sawo.

⁴ Ango muririkanyagha walye wandu ikumi na wanane wagwililo ni mnara Siloamu wakafwa niwo weluo wakosa kuchumba wandu wose wa Jerusalemu?

⁵ Fulo namuza, hata, ela nanyose mkalegha kuriha musaghagha.”

Ikataniso lya mtini sighovalagha

⁶ Nao Jesu kawaghorera ilyi ikataniso, “Mundu mumoju awandile mtini kele mbuwa yake ya mizabibu, naye keja kulola matunda, ela kasowa.

⁷ Nao kamuza mulimili mizabibu, ‘Lola kwa miaka mitatu neja kulola mavalo kufuma kwa ughu mtini, sipatile. Ghuteme, sighwahakile msanga bule?’

⁸ Ela mulimi katumbulila, ‘Bwana ghusighe ughu mwaka naghose nighulimile na kughungiza mbolea.

⁹ Nao ghukavala mavalo mwaka ghukujagha ni kirani, ela ghukalegha kuvala tighuteme.’”

Jesu kuboesa muke ijua lya Sabato

¹⁰ Nao ijua imoju lya sabato oluo kefundisa kele sinagogi.

¹¹ Na alye koluo na muke mumoju eluo na pepo imudeile agomeke kwa miaka ikumi na minane sedimagha kughoroka.

¹² Nao Jesu amwona, kampang'a, kamuza, “Mundu muke, wafungulo unyonge ghwako.”

¹³ Naye amwikilila mkonu, kaghoroka iyo ngelo yenyi na kumlika Mlungu.

¹⁴ Ela mubwaa wa sinagogi kawasilo kwa kukala Jesu waboesa ijua lya Sabato, kwa hung'u kauza wandu, “Kuwo na majua matandatu ghedea kazi, kwa hung'u muje majua agho muboeso na si ijua lya Sabato.”

¹⁵ Nao Bwana kamtumbulila, “Inyo wandu wa ngolo mbili! Ado kila mumoju wenyu safungulagha ng'ombe ango mchungu ghwake boroni na kughughenza kunwa meji?

¹⁶ Ndamu uyu muke wa kivali cha Abrahamu afungilo ni Shetani miaka ikumi na minane siyemfweni afungulo ichi kifungo ijua lya Sabato?”

¹⁷ Naye ilyi eluo keghora hung'u walye wamaiza wake wakafwishika waya; na wandu wose wakaboelo ni malagho ghose gha mashiniko eluo kedea.

Ikataniso lya ndembe ya haradali

¹⁸ Nao Jesu kakotela, “Uzuri ghwa Mlungu ghuo sa kimuni? Na nighufwananisagha na kimuni?

¹⁹ Nighufwananisagha na ndembe ya haradali aiusile mundu kaiwanda mbweni kwake, nayo ikazeguwa, ikakala mwiti mubwaa na hata nyonyi zikeja zikawaghala vichunguri kele mbashe zake.”

Ikataniso lya chachu

²⁰ Nao Jesu kaghora sena, “Nighufwananise na kimuni Uzuri ghwa mlunguni?

²¹ Ghwanafwanane na chachu aiwatile muke kaingiza kele pishi ndatu za unga hata ghose ghukakala chachu.”

Mjango msuse

²² Nao Jesu kaghenda ngila zake keitila kele mizi mibwaa na michache, kefundisa wandu kele charo cheghenda Jerusalemu.

²³ Nao mundu mumoju kamkotela, “Ado Bwana, wandu wekilagha ni wachache?”

²⁴ Naye kawatumbulila, “Deeni kasidi kungila kele mjango msuse, kwani fulo namuza, wengi weshayagha kungila, ela siwedimagha.

²⁵ Kwani ngelo mundu wa nyumba eukagha na kurughara mjango, mkalagha shighati mkedaha mjango, mkeghora, ‘Bwana tirughurire.’ Naye ujemtumbulila, ‘Simumanyile andu mwafuma inyo.’

²⁶ Nenyo mujeghora, ‘Tanalyile na kunwa newe na kwatifundisa kele ngila zetu.’

²⁷ Ela iye ujeghora, ‘Fulo namuza, simweni andu mfumagha, ghendeni noko inyo wandu wa laghelaghe.’

²⁸ Nao aho kujekala kililo na kukengeresha majegho ilyi mwamona Abrahamu, Isaki na Jakobo na wana tondolo wose kele Uzuri ghwa Mlungu na inyo mwakumbo shighati.

²⁹ Na wandu wejeja kufuma mashariki na magharibi na kufuma kaskazini na kusini wakale kitembo kele karamu ya Uzuri ghwa Mlungu.

³⁰ Nao aho awa weo wa kuduwa wejekala wa hambiri na awa weo wa hambiri wejekala wa kuduwa.”

Mashayo gha Jesu kwa Jerusalemu

³¹ Nao ilya ngelo yenyi Wafarisayo wamoju wekeja kwa Jesu na kumuza, “Fuma aha kwani Herode wanashaile kukuulagha.”

³² Naye kawatumbulila, “Ghendeni mumughorere ulya kwehe, ‘Zighana nendegusa pepo na kuboesa lelo na ikesho na ijua lya katatu nijemalila kazi yangu.’

³³ Elaima ni suti nighende ngila zangu lelo na ikesho na ilau, kwani siidimikagha tondolo afwile shighati ya Jerusalemu.

³⁴ “Ee Jerusalemu, Jerusalemu, uwe uulaghagha wana tondolo na kuwalasa mawe awa wetumogho kwako! Ni kalinga nakoghanya wana wako selyi nguku ikoghanya wana wake kele mabambato ghake, ela mwalegha sadee hung'o.

³⁵ Zighana nyumba yenyu yabariko. Fulo namuza simunionagha hata ilya ngelo mujeghora, ‘Wabarikio uyu ekujagha kwa izina lya Bwana.’”