Luka 12 - UVORO GHWALOLI KWA WANDU WOSE

Kuonya ighulu ya ngolo mbili

¹ Nao ilyi makoghano gha wandu maelfu wemutindirire, hata kulatilana, Jesu kadyowa kughoranya na wairimi wake jako, “Kulindeni na chachu ya Wafarisayo ya ngolo mbili.

² Sikwesi kindu chingi chibulilo sichefunukulo ango chivisilo sichemanyikanagha.

³ Kwa hung'u icho chose mughoragha kizeni chijesikilo kele mlangazi, na icho mushashiragha chumbeni komweni chijeghoro ighulu ya nyumba na lwaka lubwaa.

Nani wowogha

⁴ “Fulo namuza wagheni wangu, simwaoghe walye weulagha muli na siwedimagha kudea kindu chingi chichumbagha.

⁵ Ela nijemuonya nani ewo oogha: muogheni uyu edimagha kumulagha na ewo na udimo kumukumba kele izia lya moto. Fulo namuza muogheni iye.

⁶ Ado mbaimbai sanu sizitaghogho kwa magome maili? Nako sikwesi ingi siyemanyikana kwa Mlungu.

⁷ Hata sisiri za vongo venyu zanawenu mtalo ghwake. Kwa hung'u simwaoghe, inyo muo wa zoghori mbwaa kuchumba mbaimbai nyingi.

Kumudumusa na kumlegha Kristo

⁸ “Fulo namuza, uwo wose enighoragha imi hambiri ya wandu, Mwana wa Mdamu naese ujemghora hambiri ya malaika wa Mlungu.

⁹ Ela uwo wose enikanagha hambiri ya wandu ujekano hambiri ya malaika wa Mlungu.

¹⁰ “Na uwo wose eghoragha laghelaghe ighulu ya Mwana wa Mdamu ujefwilo waya; ela uwo wose eghoragha laghelaghe ighulu ya Roho wa Kuela sefwilogho waya.

¹¹ “Nao ilyi mwaghenzo hambiri ya sinagogi na kwa watawala na wabwaa, simwakusirimise na agha mutumbulilagha ango mughoragha.

¹² Kwani Roho wa Mlungu ujemfundisa iyo ngelo yenyi icho mujeghora.”

Ikataniso lya mzuri mpumbavu

¹³ Nao mundu mumoju kele makoghano, kamuza Jesu, “Mwalimu, muze wakwetu tisare ufwa tisighililo ni aba.”

¹⁴ Ela Jesu kamuza, “Ee mundu wa wandu, nani aniikile kukala mtaghanyi ango msari wenyu?”

¹⁵ Naye kawauza, “Kulindeni na iziso; kwani umana ghwa mundu sighuo kele ungi ghwa mali ewo nayo.”

¹⁶ Naye kawaghorera ikataniso keghamba, “Koluo na mundu mumoju eluo mzuri, mbuwa yake yevele mavalo mengi.

¹⁷ Naye karirikanya mwenyi, ‘Nideagha ije kwani siwesi andu koika viro vangu?’

¹⁸ Kaghora, ‘Nideagha hung'u; Nifuchulagha vitundu vangu na niwaghale vizima vibwaa, eri niike viro vangu na vindu vizima.

¹⁹ Nao niiuze roho yangu, Ee roho, waikilo vindu vingi velya kwa miaka mingi, kwa hung'u zumua ulye, unwe na uboelo.’

²⁰ Ela Mlungu kamuza, ‘Mpumbavu uwe, ichi kiro chenyi roho yako yanashailo na ivi vindu vose waika, vijekala vani?’

²¹ Na hung'u niko kwenyi ikalagha kwa kila mundu ekuikilagha, mali na sekuikilagha mali kwa Mlungu.”

Kumudumusa Mlungu

²² Nao Jesu kawauza wairimi wake, “Kwa hung'u namuza, simwakusirimise na umana ghwenyu, mulyighagha kimuni ango kwa mili yenyu murwaragha kimuni.

²³ Ado umana si bora kuisa chakulya na muli si bora kuisa marwari.

²⁴ Ririkanyeni wana mang'olo, siwawandagha hata siwakwashagha hata siwawesi vitundu, ela Mlungu wanawalyisagha. Ado inyo si bora kuisa nyonyi!

²⁵ Nani kwenyu kwa maririkanyo edimagha kujuzila majua ghake?

²⁶ Ikakala simodimagha kudea malagho sagho machache, kudani mukusirimisagha na malagho mazima?

²⁷ Ririkanyeni vilua selyi vizeguwagha, sivideagha kazi hata sivilukagha nguo; ela namuza, hata Solomoni kele uzuri ghwake ghose sarusiro sa kimoju cha ivi.

²⁸ Ndamu ngera Mlungu arusagha nyasi ya mbweni iwo moyo lelo na ikesho yakumbo kele moto, sechumbagha kumurusa inyo wandu wa idumusi ichache!

²⁹ Kwa hung'u simwakusirimise na ichi mulyighagha na ichi munweghagha.

³⁰ Kwani wandu wa mbari zose za urumengu wahada ivi vindu, ela Tatio wanaweni kamba mwanavishaile.

³¹ Ela hadeni jako uzuri ghwa Mlungu, na ivi vindu vijekala venyu na vose.

Uzuri Mlunguni

³² “Simwaoghe inyo uranu mchache, kwani yamuboela Tatio kumuhawa Uzuri.

³³ Tagheni vose muo navo mufunye sadaka. Nao mukwikile mifuko ya pesa siyedemagha na mali siyegotuwagha mlunguni, andu viting'a sivefikagha hata viburute sivehakilagha.

³⁴ Kwani andu kwenyi mali yako iwo niko kwenyi ngolo yako iwo.

Watumishi welindagha

³⁵ “Kaleni kirani kwa ilyo lyose lyikujagha, mukuruse na mukufunge mikoa na taa zenyu zikewaka,

³⁶ sa watumishi wemudafwagha Bwana wawe ekujagha kufuma kele karamu ya harusi, eri ngelo eja na kudaha mjango wamurughurire.

³⁷ Baha watumishi walye wedokogho walavile. Fulo namuza, ulya Bwana ujekufunga chunu, awakalise kitembo mezeni na kuwatumikila.

³⁸ Hata ngera eja na kiro kibwaa ango na ikesho kiro, na awadoke hung'o, baha watumishi walye.

³⁹ Ela manyeni kamba ngera mundu wa nyumba endemanya ngelo ya kuja kiting'a, macho alindile, na sesighagha nyumba yake ivunjo.

⁴⁰ Nanyose kaleni kirani, kwani Mwana wa Mdamu ukujagha ngelo simoighelelagha.”

Mtumishi mdumusiliki na seo mdumusiliki

⁴¹ Petro kamuza, “Bwana ondeghora ikataniso ilyi kwetu kwenyi ango kwa wandu wose?”

⁴² Nao Bwana katumbulila, “Nani ewo mtumishi mudumusiliki na ewo na akili aikilo ni Bwana wake ighulu ya nyumba yake, eri awahawe wambawe chakulya chawe kwa ngelo?

⁴³ Baha mtumishi ulya Bwana wake emudokagha kedea sa hung'u.

⁴⁴ Fulo namuza, ujemwika ighulu ya vindu vake vose.

⁴⁵ Ela ilyi mtumishi ulya aghora mwenyi, ‘Bwana wangu wamuka luma kuja,’ naye adyowe kuwakwita watumishi wa kialume na wa kiwake na alyigheghe na kunwa na anaruweghe,

⁴⁶ bwana wa ulya mtumishi ujeja ijua selyimanyagha na saa seimanyagha; naye ujemkwita na ndighi na kumwikanya na awa siweluo wadumusiliki.

⁴⁷ Na mtumishi ulya eweni ghalye ashaile Bwana wake, ela sakuikile kirani ango kudea selyi ashaile, upatagha ikwito ibwaa.

⁴⁸ Ela uyu eluo seweni na wanadeile lyiketi kukwito, upatagha ikwito lyiwanguwe. Uyu wose ahawilo vingi, kwake vingi vijeshayo; na uyu aikilo na vingi ni wandu, kwake wejeshaya vingi.

Jesu ni chausa cha kusarika

⁴⁹ “Nanajile urumenguni kukoza moto, na neshaile macha hung'u ghwawaka!

⁵⁰ Nio na ubatizo nifweni nibatizo nagho, nemi nasirimiso hata ghukatiso!

⁵¹ Ado muririkanyagha kamba nendeleta sere urumenguni? Hata, ela fulo yenyi nendeleta kusarikana.

⁵² Kwani kufuma indakwenyi kujekala nyumba iwo na wandu wasanu kusarika, watatu kwa waili na waili kwa watatu.

⁵³ Aba ujekala kinyume cha mwana wake, na mwana ujekala kinyume cha tatie: mawe ujekala kinyume cha mchana wake, na mchana ujekala kinyume cha mee. Mkekulu ujekala kinyume cha mkazamwana na mkazamwana ujekala kinyume cha mkekulu wake.”

Kutambula ngelo

⁵⁴ Nao Jesu kawauza makoghano, “Ilyi mwaona iwengu lyikefuma magharibi, mwaghamba mshushure ghukujagha na fulo ghweja.

⁵⁵ Na ilyi mwaona mbeo ikeruma kufuma kusini, mwaghamba kukalagha na ijua, nalyo lyakala.

⁵⁶ Inyo wandu wa ngolo mbili! Mwamanya gha kuzighana urumenguni na gha mlunguni, kudani simotambulagha gha iyi ngelo?”

Kupatana na mumaiza wako

⁵⁷ “Kudani simotaghanyagha gha hachi inyo wenyi?

⁵⁸ Nao koghendanya na uyu ekushitakiagha kwa mtaghanyi, dea kasidi yepatana naye ngileni, eri sakughenze kwa mtaghanyi, na mtaghanyi sakuhawane kwa askari na askari sejekungiza kifungoni.

⁵⁹ Fulo nakuza sufumagha alye hata wamalila kulipa senti ya kudua.”