Luka 11 - UVORO GHWALOLI KWA WANDU WOSE

Jesu kufundisa kulomba

¹ Nao ijua imoju ilyi Jesu eluo kelomba andu kumoju, aghenda amalila, mwirimi wake mumoju kamuza, “Bwana tifundise kulomba selyi Johana afundise wairimi wake.”

² Naye kawauza, “Mkelomba, mughore, ‘Aba, Izina lyako lyieleso, Uzuri ghwako ghuje.

³ Utihawe kila ijua chakulya cha kila ijua.

⁴ Utifwile, waya kaung'a zetu, kwani natose tawafwila waya awa wose watikosile; na swatingize matimoni.’”

⁵ Nao kawauza, “Nani kwenyu ewo na mgheni wake, emughendelagha na kiro kibwaa na kumuza, ‘Mgheni wangu nihawe mikate mitatu,

⁶ kwani najilo ni mgheni wangu ewo charoni nemi siwesi kindu chemuhawa.’

⁷ Naye ulya ewo ko mweni amutumbulile, ‘Swanisirimise! Narughara mjango na wana wangu watunguranya nemi ulilini, sidimagha kuuka nikuhawe kindu chingi!’

⁸ Fulo namuza, hata ngera sani seukagha amuhawe kindu chingi kwa kukala ni mgheni wake; uko kulombolombo kwenyi kumudeagha auke amuhawe ivo ashaile.

⁹ Kwa hung'u namuza, Lombeni, nenyo mjehawo, hadeni nenyo mjeona, daheni nenyo mjerughuriro.

¹⁰ Kwani kila elombagha upatagha, na kila ehadagha uonagha na kila edahagha urughurirogho.

¹¹ Ni aba muni kwenyi ilyi mwanwake amulomba ikumba emuhawagha nyoka kibalo cha ikumba.

¹² Ango ilyi amulomba igi emuhawagha kishushe?

¹³ Ndamu ngera inyo muo walaghelaghe, mwamanya kuwahawa wana wenyu vindu valoli, ije Tatio ewo mlunguni si kuchumba kuwahawa Roho wa Kuela awa wamulomba!”

Jesu na Beelzebuli

¹⁴ Nao ilyi Jesu eluo kegusa pepo iwo bubu; ilya pepo ighenda imufuma ulya mundu eluo bubu, kaghora, na wandu wose wakashinika.

¹⁵ Ela wamoju wakaghora, “Wagusa pepo kwa ndighi za Beelzebuli mubwaa wa pepo.”

¹⁶ Wamoju kwa kumutima, wakalomba mwakilimbita kufuma mlunguni.

¹⁷ Ela iye kemanya maririkanyo ghawe kawauza, Kila uzuri ghusarikagha ghwenyi na kurashana sighumangagha, na nyumba ikasarikana yenyi yendegwa.

¹⁸ Ndamu ilyi Shetani asarika mwenyi, uzuri ghwake ghudima ije kumanga? Inyo mwanuza nagusa pepo kwa ndighi za Beelzebuli.

¹⁹ Ikakala imi nagusa pepo kwa ndighi za Beelzebuli, wana wenyu wanazigusagha kwa ndighi zani? Kwa hung'u niwo wenyi wemutaghanyagha.

²⁰ Ela ikakala imi nagusa pepo kwa ndighi za Mlungu, manyeni kamba Uzuri ghwa Mlungu ghwamujila.

²¹ “Ngelo mundu wa ndighi, ewo na mata yake, ewo kelinda nyumba yake, vindu vake vio sere.

²² Ela ngelo mundu mumoju ewo na ndighi kumwisa eje na kumukwita na kumusima, ujeusa mata yake yeluo ikemlinda na kusara vindu vake.

²³ Uyo wose seo nemi uwo kinyume changu, naye sekoghanyagha nemi ondesaghisa.

Kuuya kwa pepo

²⁴ “Nao ilyi pepo yamufuma mundu, yanaitilagha andu kuomile ikelola andu kozumuila, nayo ilyi yasowa, ijeghora, ‘Niwuyagha kele nyumba yangu ilya nifumile.’

²⁵ Nao ikeja ikadoka yashero na kuiko kirani.

²⁶ Aho ighendagha ilete pepo nzima mfungate ziwase kuichumba, nazo zijengila na kukala alye, na ulya mundu ujewasa kuchumba selyi eluo hambiri.”

Kuboelo kwa fulo

²⁷ Nao ilyi eluo keghora hung'u, muke mumoju kele makoghano kaghora kwa lwaka lubwaa, keghamba, “Abarikio muke akuvele na kukumamisa.”

²⁸ Ela Jesu kaghora, “Wabarikio walye wesikilagha ilagho lya Mlungu na kulyiwata.”

Kushaya mwakilimbita

²⁹ Nao ilyi makoghano weluo wekemtindirira, kawauza, “Kivali ichi ni kivali chiwase, chendeshaya kuona mwakilimbita, ela sichionagha mwakilimbita ungi sala mwakilimbita wa Jona.

³⁰ Kwani selyi kwenyi Jona eluo mwakilimbita wa wandu wa Ninawi, niko kwenyi na Mwana wa Mdamu ekalagha kwa kivali ichi.

³¹ Mzuri muke wa Sheba ujekala kimusi ngelo ya kutaghanya kivali ichi kukala chio na makosa, kwani iye wanajile kufuma kulele eri asikile suku ya Solomoni, na nambe anyaha kuo na mubwaa kumwisa Solomoni.

³² Nawo wandu wa Ninawi wejekala kimusi ngelo ya kutaghanya wandu wa kivali ichi kukala chio na makosa, kwani wo wanarihire kaung'a zawe kwa machilo gha Jona, na nambe anyaa kuo na mubwaa kumwisa Jona.

Mlangazi ghwa muli

³³ “Sikwesi mundungi awashagha taa eri aike kivisoni ango kuiika isi ya pishi, ela wanaiikagha andu kwa ighulu eri kamba wandu wengilagha waone mlangazi.

³⁴ Iziso lyako ni mlangazi ghwa muli ghwako. Ngera iziso lyako lyio banana, muli ghwako ghose ghuo na mlangazi, ela ngera silyeo banana muli ghwako ghwajula kiza.

³⁵ Kwa hung'u linda mlangazi ghuo amweni kwako sighwakale kiza.

³⁶ Na ngera muli ghwako ghose ghuo na mlangazi sikweo na luhande lungi luo na kiza, ghujekala ghose ni mlangazi, selyi taa iwo na mlangazi ikuhawagha mlangazi ghwake.”

Jesu kughora ighulu ya Wafarisayo na walimu wa Sheria

³⁷ Nao Jesu amalila kughora, Mfarisayo mumoju kamlomba aghende kulya naye. Naye kaghenda kakala kitembo kulya.

³⁸ Nao ulya Mfarisayo kashinika kuona Jesu kelya seoghile vala.

³⁹ Nao Bwana kamuza, “Inyo Wafarisayo mwaoghesha vikombe na sahani shighati, ela amweni kwenyu kwanajule uting'a na ulaghelaghe.

⁴⁰ Inyo wapumbavu! Ado uyu adeile shighati siye mwenyi adeile ko mweni?

⁴¹ Ela funyeni ivo vindu vio aho mweni kukala sadaka kwa wakiwa na vose vijeela kwenyu.

⁴² “Ela ni bugha kwenyu inyo Wafarisayo! Kwani mwafunya ifungu lya ikumi lya manyasi ghanukagha kirani na kisenya na mbogha zose, na sena mwasigha hachi na mashayo gha Mlungu. Yemufweni mudee agha na simosighagha kudea ghalye mazima.

⁴³ “Ni bugha kwenyu, inyo Wafarisayo, kwani mwanashayagha kukala vifumbi va hambiri kele sinagogi na kuroghoo ni wandu sokoni.

⁴⁴ Ni bugha kwenyu, kwani mwakala sa mbira sizeonekanagha, na wandu waita ighulu yawe siwemanyagha.”

⁴⁵ Nao mwalimu mumoju wa Sheria kamukotela, “Mwalimu koghora hung'u waghora laghelaghe ighulu yetu natose?”

⁴⁶ Jesu katumbulila, “Ni bugha kwenyu inyo walimu wa Sheria, kwani mwawatukisa wandu misigo igwaile siwedimagha kuituka, na inyo wenyi simuiwatagha hata na chala.

⁴⁷ Ni bugha kwenyu, kwani mwawaghalila mbira za wana tondolo waulagho ni wana akeo.

⁴⁸ Kwa hung'u mwashuhudia na kudumusilana na madeo ghana akeo, kwani wanawaulaghe, nenyo mwawaghalila mbira.

⁴⁹ Kwa hung'u, ulachu ghwa Mlungu ghoghorire, ‘Nitumagha wana tondolo na watumo, na wamoju wejewaulagha na kuwatirira.’

⁵⁰ Eri bighati ya wana tondolo wose itikile kufuma kudyowa urumengu, ishayo kele kivali ichi.

⁵¹ Kufuma kuulagho kwa Abeli hata kifwa cha Zakaria aulaghilo ghati ya andu kofunya sadaka na andu kwa kuela. Fulo namuza wandu wa kivali ichi wejekwito kwa madeo agha.

⁵² “Ni bugha kwenyu inyo walimu wa Sheria! Kwani mwausa mfungulo ghomanya. Inyo wenyi simungilile na hata awo washaile kungila mwawaima.”

⁵³ Nao ilyi Jesu eluo keghenda, walimu wa Sheria na Wafarisayo, wakadyowa kumtindirira na kumukotela makotelo mengi,

⁵⁴ wekemtegha, eri wamwate na ilagho lyingi eghoragha.