Luka 10 - UVORO GHWALOLI KWA WANDU WOSE

Jesu kutuma wandu mirongo mfungate na waili

¹ Nao nyuma ya agha, Bwana kasaghula wamoju mirongo mfungate na waili, kawatuma hambiri yake waili waili kele mizi na andu kose iye mwenyi eluo ughendagha.

² Naye kawauza, “Mvono ni mungi, ela wakwashi ni wachache; kwa hung'u mumulombe Bwana wa mvono atume wakwashi wakwashe mvono ghwake.

³ Ghendeni ngila zenyu mkemanya kamba namtuma sa wana wa ng'onzi ghati ya turugha.

⁴ Simwatwale mfuko ghwa pesa hata kikuchu hata simwarware vilatu na simwaroghowe mundungi ngileni.

⁵ Na iyo nyumba yose mwangila ghoreni jako, ‘Sere ikale kele nyumba iyi.’

⁶ Nao ngera kuo na mwana wa sere alye, sere yenyu ijekala kwake. Ela ngera seo ijemuila.

⁷ Mkale kele ilya nyumba yenyi, mkelya na kunwa vilya wemuhawagha, kwani mdei kazi wanashaile ifungu lyake. Simwaghende kufuma nyumba hata nyumba.

⁸ Ilyi mwangila kele muzi nawo wakamuhokera, lyeni vindu vilya wemuhawagha.

⁹ Boeseni wakongo wake na muwauze, ‘Uzuri ghwa Mlungu ghuo kavui nenyo.’

¹⁰ Ela ilyi mwangila kele muzi nawo wakalegha kumuhokera, ghendeni kele ngila mbwaa na mughore,

¹¹ ‘Hata vumbi ya muzi ghwenyu iwo kele maghulu ghetu tamughungudulila, ela manyeni kamba Uzuri ghwa Mlungu ghuo avui.’

¹² Nemi namuza, kujekala baha ijua lyilya kwa Sodomu kuchumba ghulya muzi.

Mizi siyedumusagha

¹³ “Ni bugha kwako Korazini! Ni bugha kwako Bethsaida! Kwani ngera wana mwakilimbita wadeilo kwenyu wadeilo Tiro na Sidoni macha warihire ko kale, wekerwara nguo za magunia na kukuvila ivu.

¹⁴ Ela ijekala bahabaha kwa Tiro na Sidoni ijua lya kutaghanyo kuisa inyo.

¹⁵ Na uwe Kapernaumu, ukujosagha hata mlunguni? Ujeselezo hata wazimuni.

¹⁶ “Uyu emusikilagha inyo wanisikila imi na uyu emuleghagha inyo wanilegha imi, na uyu enileghagha imi wamulegha uyu anitumile.”

Kuuya kwa walye mirongo mfungate na waili

¹⁷ Nao walye mirongo mfungate na waili wakauya waboelelo wekeghamba, “Bwana, hata pepo zeluo ziketisikila kwa izina lyako.”

¹⁸ Naye kawauza, “Nanamwonile Shetani keselela sa king'alang'ala kufuma mlunguni!

¹⁹ Loleni namuhawa ndighi zelatila nyoka na vishushe na ndighi zose za ulya mumaiza; hata sikwesi kindu chingi chidimagha kumushoghonola.

²⁰ Ela simwaboelo ni ilyi lya kukala na ndighi ighulu ya pepo, ela muboelo kwa kukala mazina ghenyu ghanawandiko mlunguni.”

Jesu kumlika Mlungu

²¹ Nao iyo ngelo yenyi Jesu kajulo ni Roho wa Kuela, kaboelo kaghamba, “Nakukasa, Aba, Bwana wa mlunguni na isanga, kwa kuvisa agha malagho kwa wandu washomile na walachu na kuwafunukulila wanake wakoo. Ee Aba ni kushaya kwako kwenyi.”

²² Nao kaghora, “Vindu vose nahawo ni Aba, na sikwesi mundungi amweni Mwana sala Aba, ango amweni Aba sala Mwana, na walye Mwana ewasaghulagha kuwatambulila.”

²³ Nao kawaghalukila wairimi wake weo wenyi, kawauza, “Baha meso gheonagha agha muonagha.

²⁴ Kwani namuza, wana tondolo na wazuri weshaile kuona agha muonagha na siwaghaonile, na kusikila agha musikilagha, na siwaghasikile.”

Ikataniso lya Msamaria waloli

²⁵ Nao mwalimu wa Sheria keja kwa Jesu kumutima keghamba, “Mwalimu, nideagha ije eri nipate umana ghwa kale na kale?”

²⁶ Jesu kamuza, “Kwanawandiko ije kele Sheria? Washoma ije?”

²⁷ Naye kamtumbulila, “Umshaye Bwana Mlungu wako kwa ngolo yako yose, na kwa roho yako yose, na kwa ndighi zako zose, na kwa akili zako zose; na mumbenyu umshaye sa uwe mwenyi.”

²⁸ Nao Jesu kamuza, “Watumbulila kirani, Dea hung'o ukale moyo.”

²⁹ Ela iye keshaya kukuhawa hachi mwenyi, kamuza Jesu, “Na mumbetu nani?”

³⁰ Jesu kamutumbulila, “Mundu mumoju oluo keselela kufuma Jerusalemu kughenda Jeriko, naye kakoghana na wavekuri, wakamfunya nguo zake, wakamkwita, nawo wakaghenda wakamsigha avui na kufwa.

³¹ Nao kwa nzani mkohani mumoju oluo keselela kele ngila ilya, naye aghenda amwona kaitila na mbali.

³² Na Mlawi naese kaitila andu alye, naye aghenda amwona kaitila na mbali.

³³ Ela Msamaria mumoju eluo ketamba afika alye andu eluo, kamfwila waya

³⁴ kamughendela kamfunga ngoru zake, kazivila mavuta na divei. Nao kamunula kamjosa kele nyamandu yake, kamughenza kele nyumba ya wagheni, kamulwaza alye.

³⁵ Nao ilyo ikesho kafunya pesa ziitogho dinari mbili kamuhawa mubwaa wa nyumba ya wagheni, kamuza, ‘Mlwaze na icho chose utumiagha nijekulipa nikewuya.’”

³⁶ Nao Jesu kamuza, “Nani kele awa wandu watatu uririkanya oluo ni mumbawe ulya mundu akoghane na wavekuri?”

³⁷ Nao ulya mwalimu wa Sheria kaghora, “Ni ulya amufwilile waya.” Jesu kamuza “Ghenda na udee sa hung'o.”

Jesu kughenda kwa Martha na Mariamu

³⁸ Nao ilyi weluo wekeghenda, wakafika muzi ghumoju na muke mumoju aitogho Martha kamuhokera Jesu nyumba kwake.

³⁹ Naye woluo na wakwawe wa wake aitogho Mariamu, uyu ekalile kitembo kavui na Jesu kesikizila mafundiso ghake.

⁴⁰ Ela Martha woluo kekusirimisa na kazi nyingi. Kwa hung'o kamughendela Jesu, kamuza, “Bwana ado suonagha wakwetu wanisigha nitumike keng'weri? Muze aniwarure.”

⁴¹ Ela Bwana kamtumbulila, “Martha, Martha, ondekambo ni chongo na kukusirimisa na vilambo vingi.

⁴² Ni ilagho imojori lyishaike, na Mariamu wasaghula luhande lwaloli, sedimagha kusoko.”