Juda 1 - UVORO GHWALOLI KWA WANDU WOSE

¹ Imi Juda, mtumishi wa Jesu Kristo na wakwawe Jakobo, nawandika kwenyu inyo mupang'ilo ni Mlungu, mukalagha kele mashayo gha Mlungu Aba na muo kele ulindiri ghwa Jesu Kristo:

² Mbazi, sere na mashayo ghajuzilike kwenyu.

Kuonyo ighulu ya walimu wa ndimi

³ Washayo, kwa kukala neluo na beha yemwandikila ighulu ya ukizi tio nagho itose, naona ni suti nimwandikile shwa ng'ori kumukumba ngolo yelyilwanila idumusi lyenyu ilyo Mlungu ahawile wandu wake wose kamojori.

⁴ Kwani wandu wamoju siwewo wa Mlungu wanangilile ghati yetu kwa kiviso. Wandu weghalulagha Ilagho lya Mbazi ya Mlungu wetu eri wakatise tamaa zawe ziwase za muli, nawo wamkana Jesu Kristo ewo keng'weri kilongozi na Bwana. Mawandiko gha Kuela ghanaghorire ko kale gha kutaghanyo wepatagha.

⁵ Kwani hata ngera sani mwamanya agha ghose, Nanashaile kumkumbusa inyo selyi Bwana awakizile wandu wa Israeli kufuma Misri, ela nyuma ya agha kawasaghisa walye siwedumuse.

⁶ Kumbukeni wana malaika walemilo ni kukala kele ubwaa ghwawe, ela wasighile malalo ghawe: wanafungilo na minyororo andu kwa wazimu kwa kiza, andu Mlungu awaikagha kudafwa Ijua wejetaghanyo.

⁷ Kumbukeni Sodomu na Gomora, na mizi yeluo avui, selyi wandu wake wadeile sa walye wana malaika; wanazingile na kudea malagho sigheo gha kidamu. Wakataghanyo kuisho na moto ghwa kale na kale sa kukala fwana kwa wose.

⁸ Niko kwenyi na wandu awa nawose, wana maloto ghewadeagha wadee kaung'a ighulu ya mili yawe; wamenya udimo ghwa Mlungu na kuvitukana viumbo va ubwaa va ighulu.

⁹ Hata malaika mubwaa Mikaeli sadeile hung'u. Wekerashana na Shetani ngelo weluo wekedea nganyi nani eusagha muli ghwa Musa, Mikaeli samutaghanye Shetani kwa kumtukana, ela wanamuzile, “Bwana wakukemela!”

¹⁰ Ela awa wandu watukana icho chose sichewatambukilagha, na ghalye malagho waghaweni sa nyamandu za isakeni, nigho ghenyi ghewahaitisagha.

¹¹ Ni bugha kwawe! Kwani wairima ngila ya Kaini; kwa undu ghwa pesa wadea makosa ghadeilo ni Balaamu. Wakala na kusikiriwa sa Kora na sa iye wehaitagha.

¹² Awa wandu siwetalagha, wendekala sa malibo gha uluwi kele ungaro ghwenyu ghwa karamu za mashayo. Wendemanya ghawe ghenyi. Wendekala sa maengu ghetukogho ni mbeo, ela sighewesi mvula. Wo ni sa miti siyewesi mavalo ghengi hata ngelo yake yevala, ni sa miti ikulilo miriginga na wanafwile putu.

¹³ Wendekala sa mivomivo ya bahari ya ndighi, kwa madeo ghawe gha aibu gheonekana mwazi sa mafulo. Wo wakala sa ndonde zilaghalaghagha ziikililo ulalo ni Mlungu andu kwa ko mweni kwa kiza cha kale na kale.

¹⁴ Yeluo ni kwa undu ghwa awa Enoko wa kivali cha mfungate kufuma Adamu atondole, keghamba, “Bwana ukujagha na maelfu gha wana malaika wake wa kuela

¹⁵ kutaghanya wose, kuwataghanya wose kwa madeo ghawe wadeile ghawase na kwa malagho ghawe ghose ghawase gha kaung'a waghorire ighulu yake.”

¹⁶ Wandu awa ngelo zose wenung'unikagha na kuwamenyesa wambawe, weirimagha tamaa zawe ziwase, wekulikagha wenyi na kuembaemba wandu wazima, eri wapate ghalye waghashaile.

Maonyo na mafundiso

¹⁷ Ela washayo! Mukumbuke ghalye mughorerero ni watumo wa Bwana wetu Jesu Kristo.

¹⁸ Nawo wanamuzile, “Kele majua gha kudua, wandu wejeja wemusholela, wandu weirima tamaa zawe ziwase.”

¹⁹ Awa wandu niwo weletagha kusarana, watuko ni tamaa zawe za muli na siwawesi Roho wa Mlungu.

²⁰ Ela inyo washayo, juzileni kukuwaghala ighulu ya idumusi lya kuela. Mukelomba kwa ndighi za Roho wa Kuela.

²¹ Kaleni amweni ya mashayo gha Mlungu, mukemudafwa Bwana wetu Jesu Kristo, amhawe umana ghwa kale na kale kwa mbazi yake.

²² Wakumbeni ngolo walye weo na ngera;

²³ wakizeni wamoju kwa kuwavekura kufuma kele moto na kuwaonyeza mbazi irunganyo na wogha, ela mumenye nguo zawe ziluwiso ni tamaa zawe ziwase.

Ilombi lyekasa

²⁴ Ndamu kwake iye edimagha kumulinda simojegwa na kumuleta simwowesi makosa na muboelo hambiri ya ubwaa ghwake.

²⁵ Mlungu mwenyi, Mkizi wetu, kwa ngila ya Jesu Kristo Bwana wetu, kukale ubwaa, ishima, ndighi na nguma kufuma ko kale na ndamu na hata kale na kale. Ameni.