Johana 9 - UVORO GHWALOLI KWA WANDU WOSE

Jesu kumuboesa mundu evelo kifondo

¹ Nao ilyi Jesu eluo keita, kamwona mundu avelo kifondo.

² Nawo wairimi wake wakamkotela, “Mwalimu, Nani adeile kaung'a, uyu mundu ango wavali wake hata kavalo kifondo?”

³ Jesu katumbulila, “Si uyu mundu ungi adeile kaung'a, ango wavali wake, ela ni ndighi za Mlungu zioneke zikedea kazi amweni kwake.

⁴ Ni suti tidee kazi za uyu anitumile na msenya; kiro chikujagha ngelo mundungi sedeagha kazi.

⁵ Ngelo nio aha urumenguni, nimi mlangazi ghwa urumengu.”

⁶ Naye aghenda kughora hung'u, Jesu kachila mate msangeni, karuwa nganda na mate, na kumvila ulya mundu nganda meso,

⁷ kamuza, “Ghenda uoghe ushu kele ndiwa ya Siloamu.” (Kutambula kwake kutumo). Nao ulya mundu kaghenda kaogha na kauya keona.

⁸ Nao wambawe na wandu awa wamwonile kelomba wakaghora, “Ado uyu siye ungi ulya mundu eluo kekala kitembo na kulomba?”

⁹ Wamoju wakaghora, “Niye mwenyi” wazima wakaghora, “Hata, ela wanafwanane naye.” Naye kaghamba, “Imi nimi mwenyi ulya mundu.”

¹⁰ Nawo wakamuza, “Ndamu meso ghako ghanafungulo ije?”

¹¹ Naye katumbulila, “Mundu aitogho Jesu wanaruire nganda, kanivila meso na kuniuza ‘Ghenda Siloamu uoghe.’ Nao nikaghenda nikaogha na nikapata kuona.”

¹² Nawo wakamkotela, “Uwo hiyo?” Kawauza, “Simanyile.”

Wafarisayo kuhada gha kuboeso kwake kifondo

¹³ Nawo wakamughenza kwa Wafarisayo ulya mundu eluo kifondo.

¹⁴ Kwani lyeluo ni ijua lya Sabato lyilya Jesu aruire nganda na kumfungula meso.

¹⁵ Wafarisayo wakamkotela sena ulya mundu selyi apatile kuona. Naye kawauza, “Wananivilile nganda meso ghangu, nemi nikaogha na nikaona.”

¹⁶ Wafarisayo wamoju wakaghamba, “Uyu mundu safumile kwa Mlungu kungi, kwani satalagha Sabato.” Ela wazima wakaghora, “Ije yadimika mundu wa kaung'a kudea wana mwakilimbita sa awa?” Nao wakasarikana.

¹⁷ Nawo wakamuza sena ulya mundu eluo kifondo, “Ughoragha ije ighulu yake kwa kukala wanakufungule meso?” Kawauza, “Iye ni tondolo.”

¹⁸ Vilongozi va Wayahudi siwadumuse kukala oluo kifondo kapata kuona mpaka wawapang'a wavali wake ulya mundu eluo kifondo,

¹⁹ na kuwakotela, “Ado uyu ni mwana wenyu mughoragha wanavelo kifondo? Ndamu wapata ije kuona?”

²⁰ Wavali wake wakatumbulila, “Tamanya uyu ni mwana wetu na kamba wanavelo kifondo.

²¹ Ela sitimanyile selyi apata kuona, hata sitiweni uyu amufungula meso ghake. Mkoteleni iye mwenyi; kwani ni mundu waenga edimagha kughora mwenyi.”

²² Wavali wake wanaghorire hung'u kwa kuogha Wayahudi, kwani Wayahudi wemalile kupatana kamba uwo mundu wose aghora kamba Jesu ni Masihi, aguso kele sinagogi.

²³ Kwa hung'u wavali wake wakaghora, “Ni mundu mubwaa mwenyi, mkoteleni iye mwenyi.”

²⁴ Nao wakampang'a kaili ulya mundu eluo kifondo, wakamwuza, “Mlike Mlungu! Tamanya uyu mundu ni mkaung'a.”

²⁵ Katumbulila, “Ngera ni mkaung'a imi simanya, ela namanya undu ghumojori, kamba neluo kifondo na ndamu naona.”

²⁶ Wakamkotela, “Wanakudeile ije? Wanakufungule ije meso ghako?”

²⁷ Kawatumbulila, “Ghamba namughorera, simusikile? Kudani munikotelagha sena? Ado mwanashaile kukala wairimi wake?”

²⁸ Nawo wakamtukana wekeghamba, “Uwe nuwe mwirimi wake, ela isi nisi wairimi wa Musa.

²⁹ Isi tamanya kamba Mlungu wanaghoranye na Musa, ela uyu mundu isi sitiweni andu afumile.”

³⁰ Ulya mundu kawatumbulila, “Ni mashiniko agha. Simumanyagha andu afuma, naye wananifungule meso!

³¹ Tanaweni kamba Mlungu sasikilagha wakaung'a, ela uwo wose emutasagha Mlungu na kudea mashayo ghake, Mlungu wanamsikilagha.

³² Na lyingi sikusikilo kufuma urumengu ghwaumbo kamba mundu avelo kifondo wafungulo meso.

³³ Ngera uyu mundu sefumile kwa Mlungu kumacho sedimile kudea kindu chingi.”

³⁴ Wakamtumbulila, “Uwe wanavelo kaung'eni na sudimagha kutifundisa.” Nao wakamgusa.

Ufondo ghwa kiroho

³⁵ Nao Jesu kasikila kamba wamgusa. Naye aghenda amwona, kamuza, “Wamudumusa Mwana wa Mdamu?”

³⁶ Naye katumbulila, “Nighorere Bwana, nani eri nimudumuse.”

³⁷ Jesu kamuza, “Wamalila kumwona, naye uyu ughoranya naye niye.”

³⁸ Ulya mundu kaghora, “Bwana Nadumusa.” Nao kadamika kamtasa.

³⁹ Nao Jesu kamuza, “Nanajile urumenguni kutaghanya eri awa siweonagha waone na awa weonagha siwaone.”

⁴⁰ Wafarisayo wamoju weluo kavui naye wakamuza, “Ado nasose nisi vifondo?”

⁴¹ Jesu kawauza, “Ngera moluo vifondo, kumacho simowesi kaung'a, ela kwa kukala mwaghora, ‘Tanaonagha’, kaung'a zenyu zanatulagha.