Johana 8 - UVORO GHWALOLI KWA WANDU WOSE

¹ ela Jesu kaghenda mghondini ghwa Mizeituni.

² Nao ilyo ikesho naikesho kiro kaghenda Hekaluni, wandu wose wakamjila, naye kakala kitembo kadyowa kuwafundisa.

³ Walimu wa Sheria na Wafarisayo wakamletela muke mumoju adokilo kezinga na kumwika ghati yawe.

⁴ Wakamuza, “Mwalimu, muke uyu wanadokilo kezinga.

⁵ Kuirimana na Sheria yetu Musa wanalaghize, muke sa uyu alaso na mawe afwe, Ndamu ughoragha ije ighulu yake?”

⁶ Weghorire agha kumutima, eri wapate ghemshitakia. Ela Jesu kadamika na kuwandika msangeni na chala chake.

⁷ Nawo wajuzila kumkotela, kauka kimusi, kawauza, “Uyu wenyu sewesi kaung'a ingi akale wa hambiri kumlasa na iwe!”

⁸ Nao kadamika sena na kuwandika msangeni na chala chake.

⁹ Nawo waghenda wasikila agha, wakaghenda mumoju mumoju, wekedyowa na waghosi. Jesu kasigho mwenyi na ulya muke eluo kimusi hambiri yake.

¹⁰ Jesu kauka kamuza ulya muke, “Weo hiyo awa wakushitaki? Ungi sakutaghanye?”

¹¹ Naye kaghora, “Hata Bwana.” Naye Jesu kamuza, “Hata imi sikutaghanya kungi. Ghenda ngila zako, swadee kaung'a sena.”]

Jesu ni mlangazi ghwa urumengu

¹² Nao Jesu kaghora nawo sena kewauza, “Imi nimi mlangazi ghwa urumengu; uwo wose eniirimagha imi seghendagha na kiza anduangi, ela ujepata mlangazi ghwa umana.”

¹³ Nao Wafarisayo wakamuza, “Ondekushuhudia uwe mwenyi na ushuhuda ghwako si ghwa fulo ghungi.”

¹⁴ Jesu katumbulila, “Hata ngera sani nakushuhudia imi mwenyi, ushuhuda ghwangu ni ghwa fulo, kwani nanaweni andu nafuma na andu nighendagha, ela inyo simumanyagha andu nafuma hata andu nighendagha.

¹⁵ Inyo mwataghanya kidamu, imi sitaghanya mundungi.

¹⁶ Na hata ngera nataghanya, kutaghanya kwangu ni kwa hachi, kwani simi ungi keng'weri nitaghanyagha, sala imi na Aba uyu anitumile.

¹⁷ Kele Sheria yenyu kwanawandiko, ushuhuda ghwa wandu waili ni ghwa fulo.

¹⁸ Nakushuhudia imi mwenyi! Naye Aba uyu anitumile naese wanishuhudia imi.”

¹⁹ Nawo wakamkotela, “Tatio uwo hiyo?” Jesu kawatumbulila, “Inyo simuniweni imi na hata simumweni Aba, Ngera mwonweni imi, kumacho mumweni Aba naese.”

²⁰ Jesu oghorire malagho agha andu koika pesa, ngelo eluo kefundisa hekaluni; na sikwesi mundungi adimile kumwata, kwa kukala ngelo yake siyefikile.

Simudimagha kughenda andu nighendagha

²¹ Nao Jesu kawauza sena, “Nendeghenda ngila zangu; nenyo mjenihada hata mufwe na kaung'a zenyu. Simudimagha kughenda andu nighendagha.”

²² Nao vilongozi va Wayahudi wakaghora, “Ado ukuulaghagha mwenyi andu eghoragha, ‘Andu nighendagha imi simudimagha kuja’?”

²³ Naye kawatumbulila, “Inyo mwafuma naisi, ela imi nafuma naighulu. Inyo ninyo wa urumengu ughu, ela imi simi wa urumengu ughu.

²⁴ Niko namuza mufwighagha kele kaung'a zenyu. Ikakala simodumuse kukala ‘Imi niye,’ mufwighagha kele kaung'a zenyu.”

²⁵ Wakamuza, “Nuwe ani?” Jesu kawatumbulila, “Ghamba namghorera kufuma kudyowa.

²⁶ Nio na mengi gheghora ighulu yenyu na mengi ghetaghanya; ela kwa kukala uyu anitumile ni wa fulo, naghughorera urumengu agha nisikile kwake.”

²⁷ Nawo siwamanyile kamba oluo kehelea ighulu ya Aba.

²⁸ Nao Jesu kawauza, “Ilyi mwamunula Mwana wa Mdamu, aho niko munimanyagha kamba imi niye, na mjemanya kamba imi sideagha ilagho lyingi ekeng'weri, ela naghora ghalye Aba anifundise.

²⁹ Naye uyu anitumile uwo ngila mojori nemi; sanisighile keng'weri anduangi, kwani nanadeagha ngelo zose agha ghemuboelagha.”

³⁰ Naye kwa kughora hung'u wengi wakamdumusa.

Wandu weo wakidina na wasunyi

³¹ Nao Jesu kawauza walye Wayahudi wamudumuse, “Mkawata mafundiso ghangu mjekala wairimi wangu wa fulo;

³² na mjemanya fulo, na fulo ijemdea wakidina.”

³³ Nawo wakamtumbulila, “Isi nisi mbari ya Abrahamu, na lyingi sitikalile wasunyi wa mundungi. Ndamu kudani waghora tikalagha wakidina?”

³⁴ Jesu kawatumbulila, “Fulo namuza, kila mumoju edeagha kaung'a ni msunyi wa kaung'a.

³⁵ Msunyi sakalagha nyumba majua ghose, ela mwana wanakalagha majua ghose.

³⁶ Kwa hung'u Mwana kakudea kukala mkidina, ukalagha mkidina wa fulo.

³⁷ Namanya putu ninyo mbari ya Abrahamu, ela sena mwanahada kuniulagha, kwa kukala mafundiso ghangu sighapatile ulalo amweni kwenyu.

³⁸ Naghora agha nionile kwa Aba, nenyo mwadea selyi musikile kwa tatio.”

³⁹ Wakamtumbulila, “Aba ni Abrahamu.” Jesu kawauza, “Ngera mwoluo wana wa Abrahamu, kumacho mudeagha selyi Abrahamu eluo kedea.

⁴⁰ Ela ndamu mwahada kuniulagha imi, mundu amughorera fulo kufuma kwa Mlungu; na agha sigho ghengi Abrahamu adeile!

⁴¹ Mwadea selyi tatio adeile” Nawo wakamuza, “Isi sitivelo kwa kuzinga, Tio na Aba mumojori, naye ni Mlungu.”

⁴² Jesu kawauza, “Ngera Mlungu eluo tatio fulo, kumacho munishaile, kwa kukala nanafumile kwa Mlungu, na niko nio aha. Sijile kwa udimo ghwangu Imi mwenyi, ela wananitumile.

⁴³ Kudani simomanyagha selyi nighoragha? Ni kwa kukala simusikizilagha malagho ghangu.

⁴⁴ Ninyo wana wa tatio Shetani, na mashayo ghenyu ni kudea selyi tatio ashaile. Oluo muulaghi kufuma kudyowa, naye seshaile kudea fulo, kwa kukala amweni kwake sikwesi fulo. Naye keghora ndimi, niko kwenyi avelo, kwa kukala ni mundimi na tatie ndimi.

⁴⁵ Ela kwa kukala naghora fulo simudumusagha.

⁴⁶ Nani wenyu aniona na kaung'a? Ngera naghora fulo, kudani Simonidumusagha?

⁴⁷ Uyu ewo wa Mlungu wanasikila malagho gha Mlungu. Ichi chimudeagha simwasikile ni kwa kukala sinyo wa Mlungu wengi.”

Jesu na Abrahamu

⁴⁸ Vilongozi va Wayahudi wakamtumbulila Jesu, “Ado sitighorire fulo kamba nuwe Msamaria na wana pepo?”

⁴⁹ Jesu kawatumbulila, “Siwesi pepo ingi; ela namhawa Aba ishima hata mkanakale inyo simunihawagha ishima.

⁵⁰ Imi sitalagha kuhawo ishima lyingi; ela kuwo ehadagha, naye niye mtaghanyi.

⁵¹ Fulo namuza, uwo wose ewatagha ghore zangu sefwighagha lyingi.”

⁵² Wayahudi wakamuza, “Ndamu tamanya kamba fulo wana pepo. Abrahamu wanafwile na hata wana tondolo wanafwile; nawe waghamba, ‘Uwo wose awata ghore zako sefwighagha lyingi.’

⁵³ Ado uwe nuwe mubwaa kumuchumba Aba Abrahamu afwile? Na wana tondolo nawose wanafwile! Ado ukuonagha sa ani?”

⁵⁴ Jesu katumbulila, “Ilyi nakulika imi mwenyi, uko kukulika si kindu chingi. Ni Aba tu enilikagha, uyu mwumwitagha Mlungu wenyu.

⁵⁵ Ela, simumweni kungi. Imi nanamweni. Ilyi naghora simweni ndekala mundimi senyo, ela namumanya na nawata ghore zake.

⁵⁶ Tatio Abrahamu oboelelo ni kuona ngelo yangu yeja na aghenda aona kabwelo.”

⁵⁷ Wayahudi wakamuza, “Uwe suketi miaka mirongo misanu kungi, nawe ughoragha wanamwonile Abrahamu?”

⁵⁸ Jesu kawauza, “Fulo namuza, hambiri ya Abrahamu kuvalo imi neluo.”

⁵⁹ Nao wakashowa mawe eri wamlase, ela Jesu kakuvisa, na kufuma Hekaluni.