Johana 7 - UVORO GHWALOLI KWA WANDU WOSE

Jesu na wana wakwawe

¹ Nao nyuma ya agha, Jesu kaselasela Galilaya; naye sadimile kughenda Judea, kwa kukala vilongozi va Wayahudi weluo wekehada kumuulagha.

² Nayo ngelo ya karamu ya Wayahudi ya Vianda yeluo avui.

³ Nawo wana wakwawe wakamuza, “Fuma aha ughende Judea eri wairimi wako wapate kuona kazi uzideagha.

⁴ Kwani sikwesi mundungi adeagha malagho kivisoni ikakala ashaile amanyo ni wandu. Ikakala udeagha malagho, dea mwazi urumengu ghuone.”

⁵ Kwani hata wana wakwawe siwemdumuse.

⁶ Jesu kawauza, “Ngelo yangu yanakaile kufika, ela kwenyu ngelo yose yanafweni.

⁷ Urumengu sigudimagha kumumenya inyo kungi, ela ghwananimenyile imi, kwa kukala nashuhudia madeo ghake gha laghelaghe.

⁸ Ghendeni kele karamu inyo wenyi, ela imi sighendagha kungi kele karamu, kwani ngelo ifweni siifikile.”

⁹ Naye aghora hung'u kakala alyenyi Galilaya.

Jesu kele Karamu ya Vianda

¹⁰ Nao nyuma ya wana wakwawe kughenda kele karamu, Jesu naese kaghenda, ela kwa kiviso.

¹¹ Vilongozi va Wayahudi weluo wekemhada kele karamu, wakaghora, “Uwo hiyo?”

¹² Nao wandu wengi weluo wekeshashirana ighulu yake. Wamoju wekeghamba, “Ni mundu waloli.” Na wazima wekeghamba “Hata, ondelaghaza wandu.”

¹³ Ela kwa undu ghwa kuogha vilongozi va Wayahudi, mundungi saghorire mwazi.

¹⁴ Nao karamu ifika kavui ghati, Jesu kaghenda Hekaluni na kudyowa kufundisa.

¹⁵ Vilongozi va Wayahudi wakashinika wakaghora, “Ado uyu mundu wamanya ije malagho mengi hung'u naye safundiso lyingi?”

¹⁶ Jesu kawatumbulila, “Mafundiso ghangu si ghangu ghengi, ela ni gha uyu anitumile.

¹⁷ Uwo wose ashaile kudea mashayo gha Mlungu, umanyagha kamba mafundiso ghangu ghafuma kwa Mlungu ango ni ghangu ghenyi.

¹⁸ Uyu eghoragha gha nguma yake mwenyi ondehada kuliko; ela uyu ehadagha kuliko kwa uyu amtumile, ni wa fulo na kwake sikwesi ndimi.

¹⁹ Ado Musa samuhawile Sheria? Na hata sikwesi ungi wenyu awatagha Sheria. Ndamu kudani muhadagha kuniulagha?”

²⁰ Wandu wakamtumbulila, “Ado wana pepo! Nani ahada kukuulagha?”

²¹ Jesu kawatumbulila, “Nanadeile mwakilimbita mumojori nenyo mukamushinikila.

²² Musa wanamuhawile kuchwa (ela si Musa ungi ni wana akeo), nenyo mwachwa mundu ijua lya Sabato.

²³ Ndamu, ikakala mwamuchwa mundu ijua lya Sabato, eri Sheria ya Musa siyavunjo, kudani mwawasilo nimi kwa kumuboesa mundu ijua lya Sabato?

²⁴ Simwataghanye kwa kuona, ela taghanyeni kwa hachi.”

Ado Jesu ni Masihi?

²⁵ Nao wandu wamoju wa Jerusalemu wakaghora, “Ado uyu siye ungi mundu wemhadagha wamulaghe?

²⁶ Loleni selyi eghoragha mwazi, nawo siweghoragha kindu chingi ighulu yake! Ado yadimika wabwaa wanaweni fulo kamba uyu niye mwenyi Masihi?

²⁷ Isi tamanya andu uyu mundu afuma, ela Masihi keja sikwesi mundungi emanyagha andu efumagha.”

²⁸ Nao Jesu kaghora na lwaka lubwaa ngelo eluo kefundisa Hekaluni, “Fulo mwananiweni na mwanaweni andu nifumile! Ela sijile kwa kushaya kwangu kungi, uyu anitumile ni wa fulo na inyo simumweni.

²⁹ Imi namumanya, kwani nanafumile kwake, na niye anitumile.”

³⁰ Nao wakashaya kumwata, ela wakalemo ni kumwata kwa kukala ngelo yake yekaile.

³¹ Wandu wengi wakamudumusa wekeghamba, “Ado Masihi keja udeagha wana mwakilimbita kuchumba awa uyu mundu awadea?”

Askari kutumo kumwata Jesu

³² Nao Wafarisayo waghenda wasikila selyi wandu weluo wekezughunuka ighulu yake; niko wakohani wabwaa na Wafarisayo wakatuma warindiri wamwate.

³³ Jesu kaghora, “Kwa ngelo njache nikalanyagha nenyo, nao ima nighende kwa uyu anitumile.

³⁴ Mujenihada na simujeniona, kwani andu nio simudima kuja.”

³⁵ Nao vilongozi va Wayahudi wakaghora wenyi na wenyi, “Ni hiyo uyu mundu eghendagha hata sitedima kumwona? Ado ughendagha kwa wamuzetu wasaghilesaghile kwa Wagiriki na kuwafundisa Wagiriki?

³⁶ Chausa chake nini kughora ‘Mujenihada na simunionagha,’ na sena, ‘Andu nio simudimagha kuja?’”

Ndoo ya meji gha umana

³⁷ Nao ijua lya kudua kwa karamu lyeluo ni ijua ibwaa, Jesu kakala kimusi kaghora na lwaka lubwaa, “Uwo wose eo na kau eje kwangu anwe.

³⁸ Uwo wose anidumusa imi selyi Mawandiko gha Kuela ghaghora, ‘Meta ya meji gha umana ijetika kufuma ngoloni kwake.’”

³⁹ Agha oghorire ighulu ya Roho, uyu awa wamudumusa wejemupata. Kwani Roho okaile kuja kwa kukala Jesu okaile kuliko kwa kuzuka.

Kusarika kwa wandu

⁴⁰ Nao wandu wamoju waghenda wasikila malagho agha, wakaghora, “Uyu Fulo ni tondolo.”

⁴¹ Wazima wakaghora, “Uyu ni Masihi” Ela wamoju wakaghora, “Ado Masihi ukujagha kufuma Galilaya?

⁴² Mawandiko gha Kuela ghaghora ije ighulu ya Masihi kamba ufumagha kele mbari ya Daudi, na ukujagha kufuma Bethlehemu, muzi ghwa Daudi?”

⁴³ Kwa hung'u wandu wakasarikana ighulu yake.

⁴⁴ Wamoju wawe wakashaya kumwata, ela mundungi samwatile.

Kulegha kudumusa kwa wabwaa wa Wayahudi

⁴⁵ Nao warindiri wakauya kwa wakohani wabwaa na Wafarisayo; nawo wakawakotela, “Kudani simwomuletile?”

⁴⁶ Warindiri wakatumbulila, “Na lyingi kwenyi sitionile mundungi keghora sa uyu mundu!”

⁴⁷ Wafarisayo wakawatumbulila, “Nanyose mwalaghazoba?”

⁴⁸ Mwanamwonile mundungi wa wabwaa ango Wafarisayo amudumuse?

⁴⁹ Sala makoghano siweweni Sheria ya Musa; nawo wawanyizo.

⁵⁰ Nikodemu uyu emughendelele Jesu ko hambiri na eluo mumoju wawe, kawauza,

⁵¹ “Ado Sheria yetu yanamutaghanya mundu hambiri ya kusikila na kumanya selyi adeile?”

⁵² Nawo wakamtumbulila, “Ado nawose ondefuma Galilaya? Shoma Mawandiko gha Kuela na ujeona kukala sikwesi tondolo ungi efumagha Galilaya.” [

Muke awatilo kezinga

⁵³ Nawo wose wakagala;