Johana 6 - UVORO GHWALOLI KWA WANDU WOSE

Jesu kulyisa walume elfu sanu

¹ Nao nyuma ya agha, Jesu kawambuka chambuko cha bahari ya Galilaya, iito bahari ya Tiberia,

² Na makoghano wakamwirima kwa kukala weonile wana mwakilimbita awadeile wa kuboesa wakongo.

³ Jesu kajoka mughondini, na kakala kitembo ngila mojori na wairimi wake.

⁴ Nayo karamu ya Wayahudi ya Pasaka yeluo avui.

⁵ Jesu alola na kuona wandu wengi wekemjila, kamuza Filipo, “Tighulagha hiyo mikate eri awa wandu walye.”

⁶ Agha weghorire kemtima, kwani omanyile agha edeagha.

⁷ Filipo kamtumbulila, “Hata ikaghulo mikate ya pesa ziitogho dinari maghana maili siidimagha kukata kila mundu apate kachache.”

⁸ Mwirimi wake mumoju, Andrea wakwawe Simoni Petro kamuza,

⁹ “Kuwo na mwanake aha ewo na mikate misanu ya shairi na makumba maili; ela ivi ni kimuni kwa wandu wengi sa awa?”

¹⁰ Jesu kawauza, “Uzeni wandu wakale kitembo.” Na kwa kukala koluo na nyasi andu alye, walume wakakala kitembo; waketi elfu sanu.

¹¹ Nao Jesu kawata mikate, naye aghenda afunya asanta kwa Mlungu, kuwasarira wandu wekalile kitembo; kadea ukwenyi kwa makumba, kila mumoju selyi eshaile.

¹² Nao waghenda walya na kughuta, kawauza wairimi wake, “Showeni misusure yasigho, eri kindu chingi sichahaite.”

¹³ Kwa hung'u wakashowa na kujuza vikapu ikumi na vili va misusure ya ilya mikate misanu ya shairi, yehangalo ni walye wandu wailyile.

¹⁴ Nao wandu waghenda waona mwakilimbita adeile, wakaghamba, “Uyu fulo niye tondolo ekujagha urumenguni.”

¹⁵ Naye kemanya kamba wanashaile kuja wamwate kwa ndighi wamdee mzuri; Jesu kauka alye kaghenda mughondini ekeng'weri.

Jesu kughenda ighulu ya meji

¹⁶ Nao kufika nahafukeni, wairimi wake wakaghenda baharini,

¹⁷ wakangila kele mashua na kudyowa kuwambuka bahari kughenda Kapernaumu. Na kiza chikakamba Jesu sebusile kwawe.

¹⁸ Nao bahari ikanulonulo ni mbeo mbwaa yeluo ikekwita.

¹⁹ Nawo waghenda kilomita sanu ango ndandatu, wakamwona Jesu keghenda ighulu ya bahari na keja kavui na mashua nawo wakangilo ni wogha,

²⁰ ela iye kawauza, “Nimi mwenyi simwaoghe.”

²¹ Nawo wakamhokera kwa kuboelo kele mashua, na iyo ngelo yenyi mashua ikafika kele isanga ilyi weluo wekeghenda.

Wandu kumhada Jesu

²² Nao ikesho lyake walye wandu wehangalike chambuko chilya cha bahari wakamanya kamba koluo na mashua mojori alye, na Jesu sangilile kele mashua iyo ngila mojori na wairimi wake, ela wairimi wake wanaghendile wenyi.

²³ Nao mashua nzima kufuma Tiberia zikeja hata avui na alye andu walyile mikate Bwana ailombelele.

²⁴ Nawo wandu waghenda waona Jesu seo ango wairimi wake, wakajoka mashua wakaghenda Kapernaumu wekemhada Jesu.

Jesu ni mkate ghwa umana

²⁵ Nao waghenda wamdoka chambuko chilya cha bahari, wakamuza, “Rabi wanajile nini aha?”

²⁶ Jesu kawatumbulila, “Fulo namuza, mwanihada si kwa kukala mwanaonile mwakilimbita, ela ni kwa kukala mwanalyile mikate mukaghuta.

²⁷ Simwachideile kazi chakulya chihakilikagha, ela chakulya chikalagha hata umana ghwa kale na kale, icho Mwana wa Mdamu emuhawagha; kwani niye Mlungu Aba amudumusa.”

²⁸ Nawo wakamuza, “Tideagha ije eri tidee kazi za Mlungu?”

²⁹ Jesu kawatumbulila, “Iyi niyo kazi ya Mlungu, mumudumuse uyu amtumile.”

³⁰ Nao wakamuza, “Ndamu ni mwakilimbita muni udeagha eri tikudumuse? Ni kazi muni udeagha?

³¹ Wana ake welyile mana kireti, selyi iwandiko, ‘Kawahawa mkate ghwelya kufuma mlunguni.’”

³² Nao Jesu kawauza, “Fulo namuza, si Musa ungi amuhawile mkate kufuma mlunguni, Aba niye amhawa mkate ghwa fulo kufuma mlunguni.

³³ Kwani mkate ghwa Mlungu ni ughu ghuselelagha kufuma mlunguni, na kughuhawa urumengu umana.”

³⁴ Nawo wakamuza, “Bwana, tihawe ughu mkate ngelo zose.”

³⁵ Jesu kawauza, “Imi nigho mkate ghwa umana, naye eja kwangu seshahogho ni njala, na uyu anidumusa sekauwagha lyingi.

³⁶ Ela nemuzile kukala, mwananionile na mkalegha kunidumusa.

³⁷ Awo wose anihawa Aba wekujagha kwangu; naye uwo wose ekujagha kwangu, simugusagha anduangi;

³⁸ kwani nanajikile kufuma mlunguni, si kudea mashayo ghangu kungi, ela mashayo gha uyu anitumile.

³⁹ Nagho agha nigho mashayo gha uyu anitumile, kamba salaghaze icho chose anihawile, ela nichizuse ijua lya kudua mbali.

⁴⁰ Kwani agha nigho mashayo gha Aba, kamba kila emonagha Mwana na kumudumusa apate umana ghwa kale na kale, nemi nijemzusa ijua lya kudua mbali.”

⁴¹ Nao Wayahudi wakamuzughunikila kwa kukala oghorire “Imi nigho mkate ghuselele kufuma mlunguni.”

⁴² Wakaghamba, “Ado uyu si Jesu mwana wa Josefu? Tanawaweni tatie na mee putu. Ndamu ughoragha ije kamba, ‘Nanajikile kufuma mlunguni?’”

⁴³ Jesu kawatumbulila “Simwazughunuke inyo wenyi.

⁴⁴ Sikwesi mundungi edimagha kuja kwangu, ikakala serutiro ni Aba uyu anitumile; nemi nijemzusa ijua lya kudua mbali.

⁴⁵ Yanawandiko ni wana tondolo kamba: ‘Nawo wose wejefundiso ni Mlungu.’ Kila mundu emusikilagha Aba na kukufundisa kufuma kwake, wanakujagha kwangu.

⁴⁶ Si kughamba kamba mundungi wanamwonile Aba, sala uyu afumile kwa Mlungu niye amwonile Aba.

⁴⁷ Fulo namuza, uyu edumusagha, uwo na umana ghwa kale na kale.

⁴⁸ Imi nimi mkate ghwa umana.

⁴⁹ Wana akeo wanalyile mana kireti nawo wakafwa.

⁵⁰ Ughu nigho mkate ghujikagha kufuma mlunguni; eri mundu eghulyighagha safwe.

⁵¹ Imi nimi mkate ghwa umana ughu ghuselele kufuma mlunguni; ilyi mundungi alya mkate ughu ukala mana kwa kale na kale, na mkate ughu nifunyagha kwa undu ghwa urumengu ni muli ghwangu.”

⁵² Nao Wayahudi wakadea nganyi wenyi na wenyi wekeghamba, “Udimagha ije uyu mundu kutihawa muli ghwake tighulye?”

⁵³ Nao Jesu kawauza, “Fulo namuza, Ilyi mwalegha kulya muli ghwa Mwana wa Mdamu na kunwa bighati yake, simuo na umana amweni kwenyu;

⁵⁴ uwo wose elyigha muli ghwangu na kunwa bighati yangu uwo na umana, nemi nijemzusa ijua lya kudua mbali.

⁵⁵ Kwani muli ghwangu ni chakulya cha fulo, na bighati yangu ni chenwa cha fulo.

⁵⁶ Uwo wose elyighagha muli ghwangu na enweghagha bighati yangu, wanakalagha amweni kwangu, nemi nanakalagha amweni kwake.

⁵⁷ Selyi kwenyi Aba anitumile ewo moyo; namose nio moyo kwa undu ghwa Aba, ni hung'u kwenyi na uyu enilyighagha ujekala moyo kwa undu ghwangu.

⁵⁸ Ughu nigho mkate ghuselele kufuma mlunguni, si sa ghulya wana akeo walyile wakafwa, ela uyu elyighagha mkate ughu ukalagha moyo kwa kale na kale.”

⁵⁹ Jesu oghorire malagho agha ilyi eluo kefundisa kele Sinagogi alye Kapernaumu.

Ghore za umana ghwa kale na kale

⁶⁰ Nao wairimi wake wengi waghenda wasikila wakaghora, “Ghore izi zanakulile, nani edimagha kuzisikila?”

⁶¹ Naye Jesu kamanya ngoloni kwake kamba wairimi wake wanung'unikila agha, kawauza, “Ije mwashiniso ni agha?

⁶² Ndamu ikalagha ije ilyi mwamona Mwana wa Mdamu kejoka andu afumile?

⁶³ Roho niyo ihawagha umana; muli sighuwesi ndighi. Malagho namughorera ni Roho na umana.

⁶⁴ Ela kuo wamoju wenyu siwedumusagha.” Kwani Jesu omanyile kufuma kudyowa ni weo siwedumusagha na nani emfunyagha.

⁶⁵ Naye kawauza, “Ichi nicho chausa cha kumuza kamba mundungi sekujagha kwangu sedimiso ni Aba.”

⁶⁶ Nao kwa undu ughu wairimi wake wengi wakauya na nyuma kuirimana naye.

⁶⁷ Jesu kawauza walye wairimi ikumi na waili, “Ado nanyose mwanashaile kughenda?”

⁶⁸ Simoni Petro kamtumbulila, “Bwana, timughendele ani? Tamanya uwo na malagho gheo na umana ghwa kale na kale.

⁶⁹ Nesi tadumusa na tamanya kamba uwe nuwe Mweli afumile kwa Mlungu.”

⁷⁰ Jesu kawatumbulila, “Ado simusaghule wairimi ikumi na waili? Na mumoju wenyu ni Shetani?”

⁷¹ Naye oluo keghora ighulu ya Juda mwana wa Simoni Iskariote, uyu eluo mumoju wa wairimi ikumi na waili, eluo umfunyagha.