Johana 5 - UVORO GHWALOLI KWA WANDU WOSE

Kuboesa kele ndiwa

¹ Nao agha ghaghenda kudua koluo na karamu ya Wayahudi, na Jesu kaghenda Jerusalemu.

² Nao alye Jerusalemu koluo na ndiwa avui na Mjango ghwa Ng'onzi, ghuitogho Bethzatha kwa Kihebrania; nayo yeluo na baraza sanu.

³ Kele izi baraza weluo weketungura wakongo wengi: vifondo, washoghori na weo na tambazi, (nawo weluo wekedafwa meji ghanyavuro.

⁴ Kwani malaika wa Bwana oluo keselela ngelo kwa ngelo kele ndiwa na kughanyavura meji. Naye uwo wose angilile mejini hambiri ngelo ghanyavuro, kaboa ukongo ghwake eluo nagho).

⁵ Nao alyenyi koluo mundu mumoju eluo mkongo miaka mirongo mitatu na nane.

⁶ Naye Jesu aghenda amwona anarage alye, kamanya kamba wakala mkongo luma, kamuza, “Wanashaile kuboa?”

⁷ Ulya mkongo kamtumbulila, “Bwana siwesi mundungi oningiza ndiweni ngelo meji ghenyavurogho, kwani keri nikujagha, mundu mumoju wangila hambiri yangu.”

⁸ Jesu kamuza, “Uka, utuke ulili ghwako, ughende.”

⁹ Nao shwa ng'ori ulya mundu kaboa, naye katuka ulili ghwake kaghenda. Nalyo lyilya ijua lyeluo ni ijua lya Sabato,

¹⁰ Nao vilongozi va Wayahudi wakamuza ulya mundu aboeso, “Lelo ni ijua lya Sabato na kwanarighidogho kwa sheria kutuka ulili ghwako.”

¹¹ Ela kawatumbulila, “Uyu mundu aniboesa niye anuza, ‘Tuka ulili ghwako ughende.’”

¹² Nawo wakamuza, “Nani uyo mundu akuuza, ‘Tuka ulili ghwako na ughende?’”

¹³ Ela ulya mundu aboeso samumanyile ulya mundu amuboese kungi, kwani Jesu ovisike, kwa kukala wandu weluo wengi andu alye.

¹⁴ Nao ko nyuma, Jesu kamdoka hekaluni, na kamuza, “Lola waboa, kwa hung'o swadee kaung'a sena, eri sojepato ni malagho ghawase kuchumba agha.”

¹⁵ Nao ulya mundu kaghenda kawaghorera vilongozi va Wayahudi kamba ni Jesu amuboesa.

¹⁶ Na ilyi nilyo lyiwadeile vilongozi va Wayahudi wadyowe kumtirira Jesu, kwa kukala wanaboese mundu ijua lya Sabato.

¹⁷ Ela Jesu kawatumbulila, “Aba wanatulagha kedea kazi, nemi namose nendedea kazi.”

¹⁸ Ilagho ilyi lyikawadea vilongozi va Wayahudi washaye na ndighi kumuulagha, kwa kukala savunjile Sabato yenyi kungi, ela omwitile Mlungu ni Tatie iye mwenyi, kekukatanisa na Mlungu.

Ndighi za Mwana wa Mlungu

¹⁹ Jesu kawatumbulila, “Fulo namuza, Mwana sedimagha kudea kindu chingi iye mwenyi, sala icho amwona Tatie kedea. Kwani icho chenyi edeagha, nicho chenyi na Mwana adeagha.

²⁰ Kwani Aba wanamshaile Mwana, naye wamuonyeza ghose edeagha mwenyi, naye ujemwonyeza kazi mbwaa kuchumba izi, eri mpate kushinika.

²¹ Na selyi kwenyi Aba azusagha wafwa na kuwahawa umana, niko kwenyi na Mwana awahawagha umana awa awashaya.

²² Aba setaghanya mundungi, kwani wamhawa Mwana wake kutaghanya kose,

²³ eri wose wamhawe Mwana ishima selyi kwenyi wemhawagha Aba ishima. Uyo wose semhawagha Mwana ishima semhawagha ishima Aba uyu amutumile.

²⁴ “Fulo namuza, uwo wose esikilagha malagho ghangu na kumudumusa uyu anitumile, uwo na umana ghwa kale na kale, hata setaghanyo kungi, kwani waita kufuma kele kifwa na kungila kele umana.

²⁵ Fulo namuza, ngelo ikujagha hata indakwenyi iwo, awa wafwile wejesikila lwaka lwa Mwana wa Mlungu, nawo awa wesikilagha wejekala moyo.

²⁶ Na selyi kwenyi Aba ewo na umana, niko kwenyi amuhawile Mwana kukala na umana.

²⁷ Na kamhawa ndighi zetaghanya kwa kukala ni Mwana wa Mdamu.

²⁸ Simwashiniso ni agha, kwani ngelo ikujagha awa wose weo mbireni wejesikila lwaka lwake;

²⁹ nawo wejezuka, awa wadeile ghaloli, wejezuka na kukala moyo, na awa wadeile laghelaghe, wejazuka na kutaghanyo.

Kumushuhudia Jesu

³⁰ “Sidimagha kudea kindu chingi kwa udimo ghwangu imi mwenyi, selyi kwenyi nasikila, niko kwenyi nataghanya, na kutaghanya kwangu ni kwa hachi; kwa kukala sideagha selyi nishaile kungi, ela selyi ashaile uyu anitumile.

³¹ Ilyi nakushuhudia imi mwenyi, ushuhuda ghwangu sighukalagha ghwa fulo.

³² Ela kuo mumoju enishuhudiagha, nemi namanya ushuhuda ghwake ni ghwa fulo.

³³ Motumile wandu kwa Johana, naye kamushuhudia gha fulo.

³⁴ Nako si andu ati nipate ushuhuda ghwa mundungi, ela naghora hung'u eri mupate kukila.

³⁵ Johana oluo sa taa iwakagha na kung'ala, nenyo moboelelo kwa ngelo njache ni mlangazi ghwake.

³⁶ Ela ushuhuda ghwangu ni mubwaa kuisa ghwa Johana: kwa undu ghwa kazi Aba anihawile kudea, izi kazi zenyi nideagha zashuhudia kamba Aba niye anitumile imi.

³⁷ Naye Aba uyu anitumile imi naese wanishuhudia. Na lyingi simusikile lwaka lwake, hata simumonile ushu ghwake,

³⁸ na hata ilagho lyake silyikalagha amweni kwenyu, kwa kukala simumudumuse uyu amutumile.

³⁹ Inyo mwashoma Mawandiko gha Kuela, kwa kukala mwaririkanya kamba ghempatilagha umana ghwa kale na kale; nagho ghenyi ghanishuhudia imi;

⁴⁰ nenyo mwalegha kuja kwangu eri mpate umana.

⁴¹ “Sishayagha kukumo ni wandu kungi.

⁴² Ela namanya putu kamba simwesi mashayo gha Mlungu.

⁴³ Neja kwa izina lya Aba, nenyo simunihokeragha, ela ilyi mumoju eja kwa izina lyake lyenyi mjemuhokera.

⁴⁴ Mudumusagha ije ikakala mwakumana inyo wenyi na kulegha kuhada kukumo kufumagha kwa Mlungu mwenyi?

⁴⁵ Simwaririkanye ati imi nimi nimughoragha kwa Aba, Ela ni Musa mwenyi uyu mumukosereagha emughoragha.

⁴⁶ Ngera momudumuse Musa, mango namose mwanidumusa; kwani wanawandike ghangu.

⁴⁷ Ela kwa kukala simudumuse mawandiko ghake, mudumusagha ije malagho ghangu?”