Johana 4 - UVORO GHWALOLI KWA WANDU WOSE

Jesu na muke wa Samaria

¹ Nao Jesu aghenda amanya kamba Wafarisayo wanasikile kukala wapata na kubatiza wairimi wengi kumchumba Johana.

² (Hata ngera sani Jesu mwenyi sabatize sala wairimi wake),

³ kafuma Judea sena na kughenda Galilaya.

⁴ Naye oluo ni suti aitile Samaria.

⁵ Nao kafika muzi ghwa Samaria ghuitogho Sukari, kavui na mbuwa Jakobo emuhawile mwanwake Josefu.

⁶ Nako alye koluo na kizia cha meji cha Jakobo; naye Jesu kwa kukala osililo ni ndighi kwa charo, kakala kitembo avui na icho kizia. Na koluo ni saa ndandatu za msenya.

⁷ Nao keja muke mumoju Msamaria kuteka meji, Jesu kamuza, “Nihawe meji ninwe.”

⁸ Andu wairimi wake weghendile kele muzi kughula chakulya.

⁹ Naye muke wa Kisamaria kamuza, “Yadimika ije uwe Myahudi kunilomba imi meji, nemi nimi muke wa Kisamaria?” Kwani Wayahudi na Wasamaria siwalyanya.

¹⁰ Jesu kamtumbulila, “Ngera omanyile inosi lya Mlungu na nani uyu ekuuzagha, ‘Nihawe meji ninwe,’ mango wamlomba iye meji, naye mango akuhawa meji gha umana.”

¹¹ Ulya muke kamuza, “Bwana, suwesi kindu chingi cheteka meji na kizia chanamalike, ndamu wapatila hiyo agho meji gha umana?

¹² Ado uwe nuwe mubwaa kumwisa ake Jakobo, uyu atihawile ichi kizia, hata iye mwenye kanwa, na wana wake na ng'ombe?”

¹³ Jesu kamuza, “Uwo wose enweghagha meji agha ukauwagha sena.

¹⁴ Ela uwo wose enweghagha meji agho nijemuhawa imi, sekauwagha lyingi sena; kwani agho meji nijemhawa, ghekalagha amweni kwake ndoo ya meji ghwa umana ghwa kale na kale.”

¹⁵ Ulya muke kamuza, “Bwana nihawe agho meji eri nisakauwe, hata nisakujeghe aha kuteka meji.”

¹⁶ Jesu kamuza, “Ghenda umpang'e mlume wako jako mjanye aha.”

¹⁷ Ulya muke kamtumbulila “Siwesi mlume.” Jesu kamuza, “Waghora fulo, ‘Siwesi mlume,’

¹⁸ Kwani oluo na walume wasanu, na hata uyu uwo naye si mlume wako ungi, kwa hung'u waghora fulo.”

¹⁹ Ulya muke kamuza, “Bwana, naona uwe nuwe tondolo!

²⁰ Wana ake weluo weketasila Mlungu kele mughondi ughu, ela inyo mwaghora Jerusalemu niko andu kufweni kumtasila Mlungu.”

²¹ Jesu kamuza, “Ee muke, nidumuse kamba ngelo ikujagha simomtasagha Aba kele mughondi ughu hata Jerusalemu.

²² Inyo mwatasa icho simomanyagha, ela isi tamanya icho titasagha, kwani ukizi ghweja kwa ngila ya Wayahudi.

²³ Ela ngelo ikujagha, hata indakwenyi iwo, watasi wa fulo wemtasagha Aba kwa roho na fulo kwenyi, kwani watasi sa awo niwo washailo ni Aba wamtase.

²⁴ Mlungu ni Roho, nawo awa wamtasa ni suti wamtase kwa roho na fulo.”

²⁵ Ulya muke kamuza, “Namanya Masihi (uyu aitogho Kristo) ukujagha, naye keja, ujetighorera kila kindu.”

²⁶ Jesu kamuza, “Imi nighoranyagha na uwe, Nimi.”

²⁷ Nao alyenyi wairimi wake wekeja, nawo wakashinika kumdoka kuhelea na muke, ela sikwesi mundungi amuzile, “Nini ushaile,” ango “Kudani uheleagha na muke?”

²⁸ Nao ulya muke kasigha mbuta yake ya meji, kaghenda kele muzi, na kuwauza wandu,

²⁹ “Njuuni mumwone mundu anighorera malagho ghangu ghose nideile, siyadimika kukala uyu niye Masihi?”

³⁰ Nao wakafuma kele muzi na kumughendela Jesu.

³¹ Ngelo iyo yenyi wairimi wake weluo wekemfunganzila, wekemuza “Mwalimu, lyaa.”

³² Ela iye kawauza, “Nio na chakulya chelya inyo simwochimanyagha.”

³³ Nao wairimi wakakotelana, “Kuo mundungi amletela chakulya?”

³⁴ Jesu kawauza, “Chakulya changu ni kudea mashayo gha uyu anitumile, na kuimalila kazi yake.

³⁵ Ado simughoragha, ‘Yasigho mezi mine, nao tikwashe?’ Nemi namuza, Zighaneni, muone selyi mbuwa zaela kwa kukwasha.

³⁶ Uyu mundu ekwashagha walipo mafungu ghake, wakoghanya mavalo kwa umana ghwa kale na kale, eri mwandi na mkwashi waboelo wose.

³⁷ Kwani mughoro ughu ni ghwa fulo, ‘Mumoju wawanda na mumoju wakwasha.’

³⁸ Nanamtumile kukwasha, andu simodeile kazi ingi, wazima wanadeile kazi, nenyo mwawarurika kwa kazi yawe.”

³⁹ Nao Wasamaria wengi wa muzi ghulya wakadumusa kwa undu ghwa ushuhuda ghwa ulya muke, “Wanighorera malagho ghose nideile.”

⁴⁰ Nawo Wasamaria weja kwake wakamlomba akalanye nawo: naye kakalanya nawo majua maili.

⁴¹ Nao wandu wengi wakadumusa kwa undu ghwa ghore zake.

⁴² Nawo wakamuza ulya muke, “Si kwa undu ghwa malagho ghako kungi isi tadumusa, ela ni kwa kukala tasikila isi wenyi na tamanya fulo uyu ni Mkizi wa urumengu.”

Jesu kumuboesa mwana wa mundu mubwaa wa serikali

⁴³ Naye aghenda amalila majua maili, kaghenda Galilaya.

⁴⁴ Kwani Jesu mwenyi oghorire, “Tondolo salikogho kele isanga lyake lyenyi.”

⁴⁵ Nao aghenda afika Galilaya, Wagalilaya wakamkaribisha kirani, kwa undu ghwa ghalye ghose waonile kedea Jerusalemu ngelo ya karamu, kwani nawose weghendile kele karamu ya Pasaka.

⁴⁶ Nao kauya sena Kana ya Galilaya, andu eghalule meji kukala divei. Nako Kapernaumu koluo na mundu mubwaa mumoju eluo na mwana mkongo.

⁴⁷ Naye aghenda asikila kamba Jesu weja Galilaya kufuma Judea, kamughendela na kumlomba waselelanye eri amuboese mwana wake, kwani oluo avui na kufwa.

⁴⁸ Nao Jesu kamuza, “Simudima kudumusa ikakala simoonile wana mwakilimbita na mashiniko.”

⁴⁹ Ulya mubwaa kamuza, “Bwana, tighende mwanwangu sefwile.”

⁵⁰ Jesu kamuza, “Ghenda, mwanwako uwo banana.” Ulya mundu kadumusa malagho gha Jesu, kaghenda ngila yake.

⁵¹ Naye ilyi eluo kegala, kakoghana na watumishi wake, wakamuza, “Mwanwako uwo banana.”

⁵² Naye kawakotela ngelo adyowile kuboa, nawo wakamuza, “Ighulo saa mfungate msuko niko ghumusighile.”

⁵³ Nao tatie kamanya ni ilya saa yenyi Jesu amuzile, “Mwanwako uwo banana.” Naye mwenyi kadumusa na nyumba yake yose.

⁵⁴ Uyu oluo ni mwakilimbita wa kaili Jesu amudeile aghenda eja Galilaya kufuma Judea.