Johana 3 - UVORO GHWALOLI KWA WANDU WOSE

Jesu na Nikodemu

¹ Nao koluo na mundu wa Wafarisayo, izina lyake Nikodemu, mubwaa wa Wayahudi.

² Uyu mundu ojile kwa Jesu na kiro na kamuza, “Mwalimu, tamanya uwe nuwe Mwalimu afuma kwa Mlungu, kwa kukala sikwesi mundungi edimagha kudea wana mwakilimbita wawadea seo na Mlungu.”

³ Jesu kamuza, “Fulo nakuza, ikakala mundu sevelo sena, sedimagha kughuona Uzuri ghwa Mlungu.”

⁴ Nikodemu kamuza, “Mundu udimagha ije kuvalo ewo mughosi? Ungilagha kifu kwa mee kaili na kuvalo?”

⁵ Jesu kamutumbulila, “Fulo nakuza, ngera mundu sevelo kwa meji na kwa Roho, sedimagha kungila Uzuri ghwa Mlungu.

⁶ Icho chivelo ni muli ni muli na icho chivelo ni Roho ni Roho.

⁷ Kwa hung'u swashinike andu nakuza. Ni suti muvalo sena.

⁸ Mbeo yaruma andu ishaile; nawe wasikila lwaka lwake, ela sumanyagha andu ifumagha hata andu ighenda. Ni hung'u kwenyi na kila mundu avelo kwa Roho.”

⁹ Nikodemu kamkotela, “Ghedimikagha ije agha?”

¹⁰ Jesu kamtumbulila, “Uwe nuwe mwalimu wa Waisraeli, na sena sutambukilogho ni agha?

¹¹ Fulo nakuza, taghora agha timanyagha na tashuhudia agha tionile, ela inyo simudumusagha ushuhuda ghwetu.

¹² Ikakala namughorera malagho gha urumenguni nenyo simunidumusagha, mjedumusa ije ilyi namughorera malagho gha mlunguni?

¹³ Sikwesi mundungi ajokile mlunguni lyingi, sala Mwana wa Mdamu uyu aselele kufuma mlunguni.

¹⁴ “Nao sa ilyi kwenyi Musa ajosile nyoka ya shaba kireti, niko kwenyi na Mwana wa Mdamu ejosogho;

¹⁵ eri uyo wose emudumusagha iye apate umana ghwa kale na kale.

¹⁶ Kwani Mlungu oshaile urumengu hata kumufunya Mwana wake mumojori, eri uwo amudumusa iye, sahaite, ela apate umana ghwa kale na kale.

¹⁷ Kwani Mlungu samutumile Mwana wake urumenguni eri ataghanye urumengu, ela urumengu ghukile kwa iye.

¹⁸ “Uwo wose amudumusa Mwana setaghanyo; ela uwo wose semudumuse wamalila kutaghanyo, kwa kukala samudumuse Mwana mumojori wa Mlungu.

¹⁹ Na uku niko kutaghanyo, mlangazi ghojile urumenguni, ela wandu wakashaya kiza kuisa mlangazi, kwa kukala madeo ghawe gheluo ghawase.

²⁰ Kwani uwo wose edeagha ghawase wanamenya mlangazi, naye sekujagha kele mlangazi, eri madeo ghake ghawase sighejeoneka.

²¹ Ela uwo wose edeagha gha fulo wanakujagha kele mlangazi, eri madeo ghake ghaoneke mwazi ghadeo kwa Mlungu.”

Jesu na Johana

²² Nao agha ghaita, Jesu na wairimi wake wakaghenda isanga lya Judea, kakala nawo alye na kubatiza.

²³ Johana naese oluo kebatiza Ainoni iwo avui na Salimu, kwa kukala alye koluo na meji mengi, nawo wandu wakamughendela wakabatizo.

²⁴ Kwani Johana okaile kungizo kifungoni.

²⁵ Nao kukakala na nganyi ghati ya wairimi wa Johana na Myahudi mumoju ighulu ya kueleso kwa kuogha.

²⁶ Nao wekeja kwa Johana, wakamuza, “Mwalimu, uyu moluwanyo naye chambuko cha Jordani, na kumshuhudia, uwo anyaha, ondebatiza, na wandu wose wendeghenda kwake.”

²⁷ Johana katumbulila, “Sikwesi mundungi edimagha kupata kindu chingi sehawilo ni Mlungu.

²⁸ Inyo wenyi mwamanya kamba nemushuhudie nikeghora; ‘Imi si Masihi ungi, ela nanatumilo hambiri yake.’

²⁹ Uyu ewo na mwali, niye musi muke, mgheni wa musi muke wanakalagha kimusi na kumsikizila, naye waboelo na ndighi ni lwaka lwa musi muke, kwa hung'u ndamu kuboelo kwangu kwakatila.

³⁰ Ni suti ajuzilike kumanyikana, ela imi ni suti nigotue.”

Uyu ekujagha kufuma mlunguni

³¹ Uyu ekujagha kufuma ighulu ni mubwaa kuisa wose, naye efumagha msangeni ni wa msangeni, naye waghora gha msangeni. Ela uyu ekujagha kufuma mlunguni uwo ighulu ya wose.

³² Naye washuhudia agha aonile na agha asikile, hata mundungi sahokere ushuhuda ghwake.

³³ Ela uyu ahokeragha ushuhuda ghwake waika hachi Mlungu ni Fulo.

³⁴ Kwani uyu atumilo ni Mlungu wanaghoragha ghore za Mlungu. Kwani Mlungu sampimilagha mundungi Roho.

³⁵ Aba wanamshaile Mwana, na wamuhawa vindu vose.

³⁶ Uwo wose amudumusa Mwana, uwo na Umana ghwa kale na kale, ela uwo wose semsikilagha Mwana seonagha Umana, ela hare ya Mlungu iwo ighulu yake.