Johana 21 - UVORO GHWALOLI KWA WANDU WOSE

Jesu kuwafumila wairimi mfungate

¹ Nao nyuma ya agha, Jesu kakuonyeza sena kwa wairimi wake mbalimbali ya bahari ya Tiberia. Kakuonyeza hung'u:

² Ilyi Simoni Petro, Thoma aitogho Ihega, Nathanieli wa Kana ya Galilaya, wana wa Zebedayo na wairimi wake waili wamoju, weluo ngila mojori.

³ Simoni Petro kawauza wambawe, “Nendeghenda kuwata makumba.” Nawo wakamuza, “Nasose tighendanya nawe.” Nao wakafuma wakajoka mashua wakaghenda, ela kele kiro chilya siwawatile kindu chingi.

⁴ Nao kughenda kucha, Jesu kakala kimusi mbalimbali ya bahari, ela wairimi siwamumanyile kamba ni Jesu kungi.

⁵ Nao Jesu kawauza, “Wanake mwanawesi kindu chingu chelya?” Nawo wakamtumbulila, “Hata.”

⁶ Nao kawauza, “Kumbeni nyavu zenyu kele mkonu ghwa kijo ghwa mashua, nenyo mwatagha makumba.” Nao wakakumba nyavu, nawo wakalemo ni kuiruta kwa undu ghwa ungi ghwa makumba.

⁷ Nao ulya mwirimi eshailo ni Jesu kamuza Petro, “Ni Bwana!” Naye Simoni Petro aghenda kusikila ni Bwana, kakufunga nguo yake kirani, kwani oluo tuu, nao kakukumba baharini.

⁸ Ela walye wairimi wamoju wekeja na mashua wekeruta nyavu ijule makumba; kwani siweluo kulele na isanga lyiomile, ni sa mita ighana hung'u.

⁹ Nawo waghenda waselela msangeni wakaona moto ghwa makala alye, ghwaikililo makumba na mkate.

¹⁰ Jesu kawauza, “Leteni makumba ghamoju agho mwawata indakwenyi.”

¹¹ Nao Simoni Petro kajoka kele mashua, karuta nyavu hata mbalimbali ya Bahari nayo yejule makumba mabwaa ighana na mirongo misanu na ndatu, hata ngera sani gheluo mengi, nyavu siizaike kungi.

¹² Jesu kawauza, “Njuuni mutambule mlomu.” Hata sikwesi ungi wa wairimi wake adimile kumkotela, “Nuwe ani?” Kwani wemumanyile ni Bwana.

¹³ Nao Jesu keja kawata mkate kawahawa na makumba kadea hung'u kwenyi.

¹⁴ Ilyi ni indu lya katatu lya Jesu kukuonyeza kwa wairimi wake aghenda azuka kufuma kwa wafwa.

Jesu na Petro

¹⁵ Nao waghenda wamalila kulya, Jesu kamuza Simoni Petro, “Simoni mwana wa Johana wananishaile imi kuisa awa?” Naye kamtumbulila, “Ee, Bwana, wamanya kamba nanakushaile.” Jesu kamuza, “Linda wana wa ng'onzi wangu.”

¹⁶ Nao kamuza indu lya kaili, “Simoni mwana wa Johana wananishaile?” Katumbulila, “Ee, Bwana wamanya kamba nanakushaile.” Kamuza, “Lisa ng'onzi zangu.”

¹⁷ Kamuza indu lya katatu, “Simoni mwana wa Johana wananishaile?” Petro kawasilo kwa kukala wanamkotelele indu lya katatu, “Wananishaile?” Kamuza, “Bwana uwe wamanya ghose, uwe wamanya kamba nanakushaile.” Jesu kamuza, “Linda ng'onzi zangu.

¹⁸ Fulo nakuza, Ilyi oluo mtawana oluo kokufunga mkoa uwe mwenyi na kughenda andu ushaile, ela ilyi wawuya mughosi ujeghorora mikonu yako, na mundu mzima ujekufunga na kukughenza andu soshaile.”

¹⁹ (Naye Jesu oghorire agha kuonyeza ni kifwa muni Petro efwighagha eri kumlika Mlungu.) Naye kamuza, “Niirime.”

Jesu na ulya mwirimi mzima

²⁰ Nao Petro kaghaluka, kamwona ulya mwirimi eshailo ni Jesu kemwirima. Uyu ni ulya mwirimi eluo kavui na Jesu ngelo ya kilalilo na kumkotela, “Bwana nani ekufunyagha?”

²¹ Nao Petro aghenda amwona kamuza Jesu, “Bwana na uyu mundu ni ije?”

²² Jesu kamuza, “Ilyi nashaya akale hata nije kwanawesini? Uwe niirime tu!”

²³ Nao malagho ghakaera kwa wana wakwetu kamba ulya mwirimi sefwighagha. Ela Jesu samuzile kamba sefwighagha, ela “Ilyi nashaya akale hata nije kwanawesini?”

²⁴ Uyu niye mwirimi ashuhudia agha na kughawandika. Nesi tamanya kamba agha ashuhudia ni gha fulo.

Kudua

²⁵ Kwanawesi malagho mengi Jesu adeile sighewandiko na ngera ghewandiko kila imoju, macha urumengu sighokatagha kwa ivo vuo vewandikogho.