Johana 20 - UVORO GHWALOLI KWA WANDU WOSE

(Matayo 28:1-8; Marko 16:1-8; Luka 24:1-12)

¹ Nao ijua lya Jumwa, Mariamu Magdalene keja mbireni na ikesho kiro kukaile kuela kirani, naye, kaona iwe lyafunyo kele mjango ghwa mbira.

² Kwa hung'u kakimbila hata kwa Simoni Petro na ulya mwirimi mumoju, ulya eshailo ni Jesu, kawauza, “Wamufunya Bwana kele mbira na sitimanyile andu wamuzika.”

³ Nao Petro na ulya mwirimi mumoju wakafuma kughenda mbireni.

⁴ Wakakimbila wose waili, ela ulya mwirimi mumoju kakimbila na iseghe kumwisa Petro, kadyowa kafika mbireni.

⁵ Naye aghenda afika kadamika kasungila, kaona sanda iwawenyi, ela sangilile.

⁶ Nao keja Simoni Petro nyuma yake, naye kangila kele mbira, kaona sanda,

⁷ na kitambaa efungilo nacho chongo, ichi sicheluwanyo na sanda, ela chekunjilo na kuiko chenyi.

⁸ Nao ulya mwirimi mumoju adyowile kafika mbireni, kangila naese, kaona na kudumusa.

⁹ Kwani wekaile kumanya selyi Mawandiko gha Kuela gheghoragha, kamba ni suti azuke kufuma kwa wafwa.

¹⁰ Nao walye wairimi wakagala kaya kwawe.

Jesu kumufumila Mariamu Magdalene

¹¹ Mariamu kakala kimusi shighati ya mbira kelila. Nao ilyi eluo kelila, kadamika kasungila mbireni.

¹² Naye kaona wana malaika waili werwere nguo za munyange, wakala kitembo andu muli ghwa Jesu ghozikilo, mumoju chongoni na mumoju maghuluni.

¹³ Wakamuza, “Muke, nini ulililagha?” Kawatumbulila, “Ni kwa kukala wamusa Bwana wangu, nemi simanyile andu wamuzika.”

¹⁴ Naye aghenda aghora hung'u kaghaluka nanyuma, kamwona Jesu kimusi, ela samumanyile kamba ni Jesu kungi.

¹⁵ Jesu kamuza, “Mundu muke, nini ulililagha? Nani umuhadagha?” Naye keghelela kamba ni mlimi, kamuza, “Bwana ngera wamusa, nighorere andu wamuzika, eri nighende nimuse.”

¹⁶ Jesu kamuza, “Mariamu!” Nao kaghaluka kamuza, kwa Kihebrania, “Raboni” (kutambula kwake, Mwalimu.)

¹⁷ Jesu kamuza, “Swaniwate; kwani nanakaile kujoka kwa Aba; ela ghenda kwa wana wakwetu uwauze kamba imi nendejoka kwa Aba na Tatio, kwa Mlungu wangu na Mlungu wenyu.”

¹⁸ Kwa hung'u Mariamu Magdalene kaghenda kwa wairimi kawauza, “Namwona Bwana naye kanighorera agha.”

Jesu kuwafumila wairimi wake

¹⁹ Nao nahafukeni ijua lyilya lya Jumwa, wairimi weluo andu kumojori nyumba, warughare mjango kwa undu ghwa kuwaogha Wayahudi. Jesu keja kakala kimusi ghati yawe, kawauza, “Sere ikale kwenyu.”

²⁰ Naye aghenda kughora hung'u, kawaonyeza mikonu yake na lwaro lwake. Nao wairimi waghenda wamwona Bwana wakaboelo na ndighi.

²¹ Jesu kawauza sena, “Sere ikale kwenyu. Selyi kwenyu Aba anitumile Imi, nemi namtuma inyo.”

²² Naye aghenda kughora hung'u, kawakulila mruke kawauza, “Useni Roho wa Kuela.”

²³ Ilyi mwafwila waya kaung'a za mundungi, zafwilo waya; na ilyi mwalegha kuzifwila waya zatula.

Jesu na Thoma

²⁴ Thoma mumoju wa walye wairimi ikumi na waili aitogho Ihega seluwanyo nawo ilya ngelo Jesu ejile.

²⁵ Kwa hung'u wairimi wambawe wakamuza, “Tamwona Bwana.” Thoma kawauza, “Ikakala sionagha alama za misumari kele mikonu yake na kungiza chala changu kele alama za misumari na kungiza mkonu ghwangu kele lwaro lwake, sidumusagha.”

²⁶ Nao nyuma ya majua manane, wairimi wake weluo nyumba sena ngila mojori na Thoma. Mijango yerugharo, ela Jesu keja kakala kimusi ghati yawe, kaghora, “Sere ikale kwenyu.”

²⁷ Nao kamuza Thoma, “Ngiza chala chako aha na uone mikonu yangu, na ungize mkonu ghwako lwaroni kwangu eri swaleghe kudumusa, ela udumuse.”

²⁸ Thoma katumbulila, “Bwana wangu na Mlungu wangu!”

²⁹ Jesu kamuza, “Wadumusa kwa kukala wanionaba? Wabarikio awa siweonagha, ela wadumusa.”

Chausa cha ichi chuo

³⁰ Naye Jesu wanadeile wana mwakilimbita wengi wazima hambiri ya wairimi wake sizewandiko kele chuo ichi.

³¹ Ela awa wanawandiko eri mpate kudumusa kamba Jesu ni Masihi, Mwana wa Mlungu; na kwa kudumusa mpate umana kwa ndighi za izina lyake.