Johana 2 - UVORO GHWALOLI KWA WANDU WOSE

Harusi Kana ya Galilaya

¹ Nao ijua lya katatu koluo na harusi Kana ya Galilaya, na mee Jesu oluo awoenyi,

² na Jesu na wairimi wake wewaliko kele harusi.

³ Nao divei ighenda idua, Mee Jesu kamuza, “Siwawesi divei.”

⁴ Nao Jesu kamtumbulila, “Mawe, Uwo na undu muni nemi? Saa yangu yanakaile.”

⁵ Nao mee kawauza watumishi “Icho chose amuza mdee, deeni.”

⁶ Nao koluo na mbuta za mawe ndandatu za meji ziikilo kwa undu ghwa ada ya Wayahudi ya kuogha, kila moju ingiza lita ighana.

⁷ Jesu kawauza watumishi, “Juzeni mbuta meji.” Nao wakazijuza mbuta ndii.

⁸ Naye kawauza, “Tekeni agho meji na mumghenzele mubwaa wa harusi.” Nawo wakamghenzela.

⁹ Naye mubwaa wa harusi aghenda atoa meji ghaghaluka divei, naye samanyile andu ghafumile, (ela watumishi waghatekile meji wemanyile), kamwita bwana harusi,

¹⁰ na kamuza, “Kila mundu wanadyowagha afunye divei yaloli jako, hata ilyi wandu wanwa iketi, waleta divei iwase. Ela uwe waika divei yaloli hata hung'u!”

¹¹ Uyu niyo mwakilimbita wa hambiri, Jesu adeile Kana ya Galilaya, kaonyeza ubwaa ghwake, nawo wairimi wake wakamudumusa.

¹² Agha ghaghenda ghadua, Jesu kaghenda noko isi Kapernaumu, ngila mojori na mee, wana wakwawe na wairimi wake; na alye wakakala kwa majua machache.

Jesu kughenda Hekaluni

¹³ Nao Pasaka ya Wayahudi ighenda ifika avui, Jesu kajoka Jerusalemu.

¹⁴ Naye aghenda angila Hekaluni kadoka wandu weketagha ng'ombe na ng'onzi na maringo, na wamoju weindana pesa wakala kele meza zawe.

¹⁵ Nao kadea changu cha mirinzi, na kawagusa shighati ya Hekalu ngila mojori na ng'onzi na ng'ombe zawe; kabingilisha meza za waindani pesa na pesa zikatika putu.

¹⁶ Na walye weluo weketagha maringo kawauza, “Ghafunyeni aha, Simwadee nyumba ya Aba kukala soko.”

¹⁷ Wairimi wakakumbuka mawandiko gheghambagha, “Ushayo ghwa nyumba yako ghwanilya.”

¹⁸ Nao vilongozi va Wayahudi wakamuza, “Ni mwakilimbita muni utionyezagha uwo na hachi kudea hung'u?”

¹⁹ Jesu kawatumbulila, “Fuchuleni iyi Hekalu, nemi nijeiwaghala kwa majua matatu.”

²⁰ Nao vilongozi va Wayahudi wakamuza, “Hekalu iyi yanawaghalo kwa miaka mirongo mine na mitandatu, nawe waghamba uiwaghalagha kwa majua matatu?”

²¹ Ela Jesu oluo keghora ighulu ya hekalu iyi iwo muli ghwake.

²² Naye aghenda azuka kufuma kwa wafwa, wairimi wake wakakumbuka selyi aghorire; nawo wakadumusa mawandiko na selyi Jesu eghorire.

Jesu kumanya ngolo za wandu

²³ Nao ilyi Jesu eluo Jerusalemu kele karamu ya Pasaka, wandu wengi wakamdumusa, kwa kukala weonile wana mwakilimbita awadeile;

²⁴ ela Jesu sawadumusile kungi, kwa kukala owamanyile wose,

²⁵ hata seshaile mundungi amughorere ighulu yawe, kwani oweni ngolo za wandu.