Johana 17 - UVORO GHWALOLI KWA WANDU WOSE

Jesu kulombela wairimi wake

¹ Nao Jesu aghenda kughora hung'u, kalola mlunguni, kaghamba, “Aba ngelo yafika, umulike Mwana wako eri Mwana naese akulike,

² kwani wanamuhawile ndighi ighulu ya wandu wose, eri awahawe umana ghwa kale na kale wose umuhawile.

³ Nagho ughu nigho umana ghwa kale na kale, kamba wakumanye uwe Mlungu mumojori wa Fulo na Jesu Kristo uyu umutumile.

⁴ Nakulika aha msangeni, kwa kuimalila kazi unihawile kudea.

⁵ Na ndamu, Aba, unilike imi andu uwo, kwa ubwaa ghulya ghwenyi neluo nagho nawe hambiri ya kuumbo urumengu.

⁶ “Imi nakudea umanyo ni wandu unihawile kufuma urumenguni; weluo wako na kwanihawa imi, nawo wawata ghore yako.

⁷ Na ndamu wamanya kamba kila kindu unihawile chanafumile kwako.

⁸ Kwani imi nanawahawile ghore unihawile, nawo wakaihokera na kumanya fulo kwenyi kamba nanafumile kwako; wakadumusa kamba nuwe unitumile.

⁹ “Nawalombela awo; sighulombelagha urumengu kungi, sala awo unihawile, kwani niwo wako.

¹⁰ Wose nio nawo ni wako, na wose uwo nawo ni wangu. Nemi naliko kwa undu ghwawe.

¹¹ Na ndamu sio urumenguni, ela wo nawasigha urumenguni, nemi nendeja kwako. Aba wa Kuela, uwalinde kwa ndighi za izina lyako ilyi unihawile, eri wakale na umojori selyi tio na umojori.

¹² Ilyi neluo nawo; newalindile kwa ndighi za izina lyako ilyi unihawile. Nanawalindile hata ungi salaghaye sala ulya mundu wa kulaghaya, eri Mawandiko gha Kuela ghakatile.

¹³ Ela ndamu nendeja kwako; na naghora malagho agha urumenguni, eri wakale na maboelo ghangu ghaketi ngoloni kwawe.

¹⁴ Nanawahawile ghore yako, nao urumengu ghukawamenya kwa kukala wo si wa urumengu ghungi, selyi imi niseo wa urumengu.

¹⁵ Sikulombagha uwafunye urumenguni, ela uwalinde na ulya Mlaghelaghe.

¹⁶ Wo si wa urumengu wengi, selyi imi niseo wa urumengu.

¹⁷ Waelese kwa fulo yako, ghore yako niyo fulo.

¹⁸ Selyi kwenyi unitumile urumenguni, namose nawatuma urumenguni.

¹⁹ Na kwa undu ghwawe, imi nakuelesa, kamba nawose wapate kueleso kele fulo.

²⁰ “Siwalombelagha awa keng'ori, ela na awo wose wenidumusagha kwa undu ghwa ghore zawe.

²¹ Kamba wose wakale na umojori, selyi uwe Aba, uwo amweni kwangu, nemi amweni kwako, kamba nawose wakale amweni kwetu, eri urumengu ghudumuse kamba nuwe unitumile.

²² Nawahawa ubwaa ughu unihawile, eri wakale na umojori, selyi uwe nemi tio na umojori.

²³ Imi amweni kwawe, Newe amweni kwangu, eri wakale na umojori kamare, eri urumengu ghumanye kamba nuwe unitumile na kamba wanawashaile selyi unishaile imi.

²⁴ “Aba! Nanashaile kamba awa nawose unihawile wakale nemi andu nikalagha, kamba waone ubwaa ghwangu ughu unihawile; kwani onishaile hambiri ya kuumbo urumengu.

²⁵ Aba wa Hachi, urumengu sighukuweni, ela imi nanakuweni, na awa wanaweni kamba wananitumile.

²⁶ Nanadeile izina lyako lyimanyikane kwawe na nijelyidea lyimanyike, eri mashayo unishaile nagho ghakale amweni kwawe, nemi nikale amweni kwawe.”