Johana 16 - UVORO GHWALOLI KWA WANDU WOSE

¹ “Namughorera agha ghose eri simwasighe idumusi lyenyu.

² Nawo wejemfunya kele sinagogi, hata ngelo ikujagha kila mundu emuulaghagha inyo uririkanya kamba ondemtumikila Mlungu.

³ Nawo wedeagha agha kwa kukala siwamweni Aba hata imi.

⁴ Ela namughorera agha, eri ngelo yake ikafika mukumbuke kamba nemughorerere. “Simughorere malagho agha kungi kufuma kudyowa, kwa kukala teluwanyo.

Kazi ya Roho wa Kuela

⁵ Ela ndamu nendeghenda kwa uyu anitumile. Hata sikwesi ungi wenyu enikotelagha, ‘Ughendagha hiyo?’

⁶ Ela kwa kukala namughorera malagho agha, mwajula furuse ngoloni kwenyu.

⁷ Hata sani namughorera fulo: ni kirani kwenyu nighende, kwani nikalegha kughenda, Mwaruri sekujagha kwenyu; ela ilyi naghenda nimtumagha kwenyu.

⁸ Naye ilyi eja, ujewaonyeza wa urumengu kamba wakosa ighulu ya kaung'a na hachi na kutaghanyo.

⁹ Wakosa ighulu ya kaung'a, kwa kukala siwanidumuse.

¹⁰ Wakosa ighulu ya hachi, kwa kukala nendeghenda kwa Aba na simunionagha sena;

¹¹ na wakosa ighulu ya kutaghanyo, kwa kukala mubwaa wa urumengu ughu wamalila kutaghanyo.

¹² “Nio na mengi ghemughorera, ela indakwenyi simudimagha kughawata.

¹³ Nao ilyi eja uyo Roho woonyeza fulo, ujemlongoza kele fulo yose; kwani seghoragha kwa udimo ghwake ghwenyi kungi, ela ujeghora agho esikilagha, na ujemughorera agha ghekujagha.

¹⁴ Naye ujenilika, kwani ujeusa agha naghora na amughorere.

¹⁵ Vose vio na Aba ni vangu, na kwa hung'u niko nemuzile kamba Roho ujeusa icho chio changu eri amughorere.

Furuse na mabwelo

¹⁶ “Kumukamuka kachache simunionagha; na kumukamuka kachache sena munionagha.”

¹⁷ Wairimi wamoju wakakotelana wenyi, “Ado nini ichi eghoragha, ‘Kumukamuka kachache simuniona; na sena kumukamuka kachache munionagha?’ Na sena eghoragha, ‘Ni kwa kukala nendeghenda kwa Aba?’”

¹⁸ Kwa hung'u wakauzana, “Kutambula kwake nini, ‘kumukamuka kachache?’ Sitimanyagha selyi eghoragha.”

¹⁹ Jesu kamanya kamba wanashaile kumkotela; kwa hung'u kawauza, “Ado mondekotelana selyi naghora kutambula kwake, ‘kumukamuka kachache simunionagha na sena kumukamuka kachache munionagha?’

²⁰ Fulo namuza, mjelila na kushighira, ela urumengu ghujeboelo; mujefurusa, ela furuse zenyu zijeghaluka mabwelo.

²¹ Muke kevala walumo na kuhariso kwa kukala ngelo yake yelumo yafika, ela ilyi avala waluwala usungu ghwake kwa kuboelo, kwani mwana wavalo urumenguni.

²² Niko kwenyi nenyo. Indakwenyi muo na furuse ngoloni, ela nijemwona sena, nao aho ngolo zenyu zijeboelo na kuboelo kwenyu mundungi semusokagha.

²³ Ijua ilyo simunilombagha kindu chingi. Fulo namuza, Ilyi mwalomba kindu chingi kwa Aba kwa izina lyangu, ujemhawa.

²⁴ Hata hung'u simulombile kindu chingi kwa izina lyangu. Lombeni, nenyo mjepata, eri kuboelo kwenyu kukatile.

Kusima urumengu

²⁵ “Namughorera malagho agha kwa makataniso. Ela ngelo ikujagha seghoranya nenyo kwa makataniso, ela nijemughorera mwazi mwazi ighulu ya Aba.

²⁶ Nao ijua ilyo mjelomba kwa izina lyangu, nemi simuzagha kamba nimlombagha Aba kwa undu ghwenyu anduangi,

²⁷ kwani Aba mwenyi wanamushaile inyo, kwa kukala monishaile na mwanadumuse kamba nanafumile kwa Aba.

²⁸ Nanafumile kwa Aba nikeja urumenguni, na ndamu sena, nendesigha urumengu nighende kwa Aba.”

²⁹ Nao wairimi wake wakamuza, “Ola ndamu waghora mwazi mwazi na si kwa makataniso kungi.

³⁰ Tamanya ndamu kamba wanaweni kila kindu, hata sushaile makotelo gha mundungi, kwa hung'u tadumusa kamba wanafumile kwa Mlungu.”

³¹ Jesu kawatumbulila, “Ndamu niko mwadumusaba?

³² Ngelo ikujagha, hata indakwenyi yeja, ngelo inyose msaghisogho, kila mumoju kaya kwake na munisighagha keng'weri. Ela sikalagha keng'weri anduangi; kwani nio na Aba.

³³ Namughorera agha eri mukale na sere kwa kuwatana na imi. Urumenguni mpatagha wasi, ela kaleni na ngolo! Imi naghusima urumengu.”