Johana 15 - UVORO GHWALOLI KWA WANDU WOSE

Jesu ni mzabibu ghwa fulo

¹ “Imi ni mzabibu ghwa Fulo, na Aba ni mlimi.

² Iye wapasa kila mbashe amweni kwangu siyevalagha mavalo, na waboesela kila mbashe ivalagha mavalo, eri ivale mavalo mengi.

³ Inyo mwaela kwa ghore namughorera.

⁴ Kaleni amweni kwangu, nemi amweni kwenyu. Selyi mbashe siyedimagha kuvala mavalo siyewo kele mzabibu, niko kwenyi nenyo simudimagha kuvala mavalo simweo amweni kwangu.

⁵ “Imi nimi mzabibu, nenyo ninyo mbashe. Uyu ekalagha amweni kwangu, nemi amweni kwake, uvalagha mavalo mengi, kwani sikweo nemi simudimagha kudea kindu chingi.

⁶ Ngera mundu seo amweni kwangu, watagho noko sa mbashe na waoma. Wandu wazishowa mbashe na kuzikumba motoni ziiye.

⁷ Ilyi mwakala amweni kwangu, na ghore zangu zakala amweni kwenyu, lombeni icho chose mwashaya, nenyo mjehawo.

⁸ Kwa hung'u Aba ulikogho, mkavala mavalo mengi, na kukala wairimi wangu.

⁹ Nanamushaile selyi kwenyi Aba anishaile imi. Kaleni kele mashayo ghangu.

¹⁰ Mkawata milomu yangu, mjekala kele mashayo ghangu, selyi imi nawata milomu ya Aba na kukala kele mashayo ghake.

¹¹ Namughorera ghore izi, eri kuboelo kwangu kukale amweni kwenyu na kuboelo kwenyu kujule.

¹² Ughu nigho mlomu ghwangu, mushayane selyi kwenyi imi nemushaile inyo.

¹³ Sikwesi mashayo ghengi gheisagha agha, gha mundu kufunya umana ghwake kwa undu ghwa wagheni wake.

¹⁴ Nenyo ninyo wagheni wangu, ilyi mwadea selyi namuza.

¹⁵ Simwitagha watumishi kungi sena, kwani mtumishi samanyagha selyi bwana wake edeagha. Ela namwita wagheni wangu, kwa kukala namughorera kila kindu nisikile kwa Aba.

¹⁶ Inyo simunisaghule imi kungi, ela nimi nimusaghule inyo na kumwika eri mughende muvale mavalo mengi, na mavalo ghenyu ghatule; eri icho chose mlombagha kwa Aba kwa izina lyangu, amuhawe.

¹⁷ Kwa hung'u mlomu ghwangu kwenyu ni ughu, shayaneni.

Kumenyo ni urumengu

¹⁸ “Ngera urumengu ghwamumenya inyo, manyeni kamba ghwananimenyile imi hambiri ya inyo.

¹⁹ Ngera moluo wa urumengu, macho urumengu ghomushaile inyo wandu wake. Ela kwa kukala sinyo wa urumengu wengi, ela nanamusaghule kufuma urumenguni, kwa hung'u urumengu ghwamumenya.

²⁰ Kumbukeni selyi nimughorere, ‘Mtumishi si mubwaa ungi kumwisa bwana wake.’ Ngera wanisirimise imi, wemusirimisagha nanyose. Ngera wewatile ghore zangu, wewatagha zenyu na zose.

²¹ Ela wedeagha agha ghose kwa undu ghwangu, kwa kukala siwamweni uyu anitumile.

²² Ngera sejile na kughoranya nawo, macho siwewesi kaung'a; ela ndamu siwedimagha kughora siwawesi kaung'a.

²³ Uyu enimenyagha imi wamumenya Aba naese.

²⁴ Ngera sedeile kazi izi mundungi sedimile kuzidea kwawe lyingi, macho siwewesi kaung'a; ela ndamu wanaonile na wakatimenya itose imi na Aba.

²⁵ Ela agha gheluo eri ghore iwandiko kele sheria yawe ikatile, ‘Wananimenyile bule.’

²⁶ “Ela ilyi Mwaruri eja, uyu nimtumagha kufuma kwa Aba, uyo Roho wa Fulo efumagha kwa Aba, iye ujenishuhudia imi.

²⁷ Nenyo nanyose mujenishuhudia kwa kukala tanakalanye kufuma kudyowa.