Johana 14 - UVORO GHWALOLI KWA WANDU WOSE

Jesu ni ngila yeghenda kwa Aba

¹ Jesu kawauza, “Simwahariso ni ngolo. Mudumuseni. Mlungu, nidumuseni namose.

² Kele nyumba ya Aba kuo na makalo mengi. Ngera sikoluo hung'o, mango nimughorere kamba nendeghenda kumuboesela ulalo ghwenyu.

³ Nemi nikaghenda na kuboesa ulalo ghwenyu, nikujagha sena, nimuse kwangu, eri andu nio nanyose mukale.

⁴ Nenyo mwanaweni ngila ya andu nighendagha.”

⁵ Thoma kamuza, “Bwana, sitiweni andu ughendagha, ndamu tiimanyagha ije ngila?”

⁶ Jesu kamtumbulila, “Imi nimi mwenyi ngila, na fulo na umana, mundungi sekujagha kwa Aba seitilile kwangu.

⁷ Ngera mwanimanya imi, mwamumanya Aba naese; kufuma indakwenyi mwamumanya na kumuona.”

⁸ Filipo kamuza, “Bwana, tionyeze Aba nesi tijekato.”

⁹ Jesu kamuza, “Luma nakala nenyo Filipo wanatulagha somweni? Uwo wose aniona imi wamwona Aba. Ndamu kudani ughoragha, ‘Tionyeze Aba.’

¹⁰ Ado sudumusagha kamba imi nio amweni kwa Aba na Aba uwo amweni kwangu? Ghore nimughoreragha imi, sizighoragha kwa udimo ghwangu ghwenyi, ela Aba ewo amweni kwangu niye adea kazi zake.

¹¹ Nidumuseni kwa kumuza kamba imi nio amweni kwa Aba na Aba uwo amweni kwangu; ango nidumuseni kwa kazi zenyi.

¹² Fulo kwenyi namuza, uwo wose anidumusa imi naese udeagha kazi nizideagha na hata kuisa izi ujedea, kwa kukala nendeghenda kwa Aba.

¹³ Na icho chose, mlombagha kwa izina lyangu nijedea, eri Aba aliko amweni kwa Mwana.

¹⁴ Ilyi mwalomba kindu chingi kwa izina lyangu, nijedea.

Jesu kulaga gha kuja kwa Roho wa Kuela

¹⁵ “Mkanishaya, mjewata milomu yangu.

¹⁶ Nemi nijemlomba Aba, naye ujemletela Mwaruri Mzima, ejekala nenyo kwa kale na kale.

¹⁷ Iye ni Roho yeonyeza Fulo, sedimagha kuhokero ni urumengu, kwani urumengu sighudimagha kumwona ango kumumanya, ela inyo mwanamweni kwa kukala wanakalagha amweni kwenyu, na ujekala nenyo.

¹⁸ “Simusighagha wakiwa kungi; Nimujilagha sena.

¹⁹ Kumukamuka kachache, urumengu sighunionagha, ela inyo mjeniona; kwa kukala nio moyo, na nanyose mjekala moyo.

²⁰ Na ijua ilyo mujemanya kamba imi nio amweni kwa Aba, nenyo muo amweni kwangu, na imi nio amweni kwenyu.

²¹ Uyo wose ewatagha milomu yangu na kuidea, uyu niye anishaile, naye anishaile imi ushayogho ni Aba, nemi nijemshaya na kukumanyisa kwake.”

²² Juda (si Juda Iskariote) kamuza, “Bwana, kudani ukumanyisagha kwetu na si kwa urumengu?”

²³ Jesu kamtumbulila, “Uwo wose anishaya imi ujewata ghore zangu, naye ujeshayo ni Aba, nesi tijeja kwake na kukala naye.

²⁴ Uwo wose senishaile sawatagha ghore zangu; na ghore mwaisikila si yangu ingi, ela ni ya Aba uyu anitumile.

²⁵ “Namughorera ghore izi ngelo nitulagha tikezanye.

²⁶ Ela Mwaruri, Roho wa Kuela, uyu etumogho ni Aba kwa izina lyangu, ujemufundisa ghore zose na kumukumbusa ghose nemughorerere.

²⁷ “Namusighila sere, sere yangu namhawa, si selyi urumengu ghufunyagha kungi, namuhawa imi. Simwahariso ni ngolo na hata simwadee wogha.

²⁸ Mwanasikile selyi nimuzile, ‘Nendeghenda, ela nimujilagha sena.’ Ngera mwonishaile, macho mwaboelo, kwa kukala nendeghenda kwa Aba; andu iye ni mubwaa kuniisa imi.

²⁹ Ndamu namughorera agho ghose kihambiri, eri ngelo ghakala, mudumuse.

³⁰ Siheleagha nenyo luma kungi, kwa kukala mubwaa wa urumengu ughu ondeja. Naye sawesi ndighi ighulu yangu.

³¹ Ela urumengu ni suti ghumanye kamba nanamushaile Aba, nemi nadea kila kindu anuza nidee Ukeni tighende noko.