Johana 13 - UVORO GHWALOLI KWA WANDU WOSE

Jesu kuoghesha wairimi wake maghulu

¹ Nao hambiri ya karamu ya Pasaka, Jesu kemanya kamba saa yake yefuma urumenguni aghende kwa Aba yafika. Naye owashaile wandu wake weo urumenguni, kawashaya hata kudua.

² Nao ngelo ya chakulya cha hafukeni, Shetani oluo angila kele ngolo ya Juda mwana wa Simoni Iskariote kamba amfunye.

³ Naye Jesu oluo kemanya kamba wanahawilo vindu vose ni Aba, na kamba wanajile kufuma kwa Mlungu, na ughendagha kwa Mlungu.

⁴ Nao kauka alye mezeni kafunya nguo za ighulu na kakurighirira taulo chunu.

⁵ Nao kangiza meji kele bakuli, kadyowa kuwaoghesha wairimi wake maghulu, na kuwaomesa na ilya taulo yeluo chunu.

⁶ Aghenda amfikila Simoni Petro; Petro kamuza, “Bwana ondenioghesha maghulu?”

⁷ Jesu kamtumbulila, “Selyi nideagha sumanyagha indakwenyi, ela ujemanya ko nyuma.”

⁸ Petro kamuza, “Sudimagha kunioghesha maghulu ghangu lyingi.” Jesu kamutumbulila, “Ngera sekuogheshagha, suwesi ifungu lyingi kwangu.”

⁹ Simoni Petro kamuza, “Bwana, suniogheshagha maghulu ghenyi anduangi, ela uniogheshe mikonu na chongo navose!”

¹⁰ Jesu kamuza, “Uyu amalila kuogha saoghagha sena, ela wanaoghesha maghulu ghenyi, naye waela wose. Nanyose mwaela, ela si inyose kungi.”

¹¹ (Kwani omumanyile uyu emufunyagha niko kaghora, “Simuelile inyose kungi.”)

¹² Naye amalila kuwaoghesha maghulu ghawe, kangiza nguo zake za ighulu, kawuya ulaloni kwake mezeni. Nao kawauza, “Ado mwamanya agha namdeila?

¹³ Inyo mwaniita Mwalimu na Bwana, na mwaghora fulo, kwani Nimi mwenyi.

¹⁴ Ndamu ikakala imi, nio Bwana na Mwalimu, namuoghesha maghulu, na inyo nanyose ni suti muogheshane maghulu.

¹⁵ Kwa kukala namhawa mfwano eri muirime selyi kwenyi nadea kwenyu.

¹⁶ Fulo kwenyi, namuza, Mtumishi si mubwaa ungi kumuisa bwana wake; hata uyu atumilo si mubwaa ungi kumwisa uyu amutumile.

¹⁷ Ngera mwamanya agha, mubarikio ilyi mwaghadea.

¹⁸ “Sighoragha ighulu yenyu inyose kungi. Nanaweni awa niwasaghule. Ela eri Mawandiko gha Kuela ghakatile, gheghambagha, ‘Uyu elyighagha chakulya changu wanighaluka kunidea laghelaghe.’

¹⁹ Namughorera agha hambiri sighedeike, eri ghakakala ghadeika, mudumuse kamba Imi Nimi.

²⁰ Fulo kwenyi, namuza uwo wose emuhokeragha uyu namtuma; wanihokera imi; na uwo wose anihokera imi, wamhokera uyu anitumile.”

Jesu kughora gha kufunyo kwake

²¹ Nao Jesu aghora hung'u, kahariso ni ngolo, kaghamba, “Fulo kwenyi namuza, mumoju wenyu unifunyagha.”

²² Nawo wairimi wakalolana wekeshinika, kwani siwemanyile nani wawe eluo kemughora.

²³ Naye mwirimi mumoju eshailo ni Jesu okalile kavui na Jesu.

²⁴ Simoni Petro kamkunyira kamuza, “Mkotele nani emughoragha.”

²⁵ Nao ulya mwirimi kamsughutila Jesu kavui kamuza, “Bwana nani?”

²⁶ Jesu kamtumbulila, “Ni uyu nimvililagha kibelele cha mkate na kumhawa.” Kwa hung'u kausa kibelele cha mkate kavilila na kumhawa Juda mwana wa Simoni Iskariote.

²⁷ Nao Juda aghenda alya mkate, Shetani kamungila. Jesu kamuza, “Agha ushaile kudea, dea shoshowa.”

²⁸ Sikowesi mundungi wa walye weluo mezeni amanyile ichi amughorere.

²⁹ Wamoju wakaririkanya kamba kwa kukala Juda oluo na mfuko ghwa pesa, Jesu oluo kemuza aghende aghule vindu va karamu ango awahawe wakiwa kindu.

³⁰ Naye Juda awata kibelele cha mkate kafuma shighati, nako koluo nakiro.

Mlomu mwishi

³¹ Naye Juda aghenda afuma, Jesu kaghora, “Ndamu Mwana wa Mdamu waliko, na amweni kwake Mlungu waliko.

³² Na ngera Mlungu aliko amweni kwake, Mlungu naese umlikagha iye amweni kwake naye umulikagha indakwenyi.

³³ “Wanake wangu, nio nenyo kwa ngelo njache. Na mjenihada; na selyi kwenyi niwauzile vilongozi wa Wayahudi niko kwenyi nimuuzagha inyo. ‘Andu nighendagha, inyo simudimagha kuja.’

³⁴ Ndamu ndemhawa mlomu mwishi, mushayane inyo wenyi kwa inyo wenyi; selyi imi nemushaile nanyose mushayane.

³⁵ Ilyi mwashayana inyo wenyi, wandu wose wejemanya kamba ninyo wairimi wangu.”

Jesu kutondola ighulu ya Petro kumkana

³⁶ Simoni Petro kamkotela, “Bwana ughendagha hiyo?” Jesu kamtumbulila, “Andu nighendagha sudimagha kuniirima indakwenyi, ela ujeniirima konyuma.”

³⁷ Petro kamuza, “Kudani sedimagha kukuirima indakwenyi? Imi nio tayari kufwa kwa undu ghwako.”

³⁸ Jesu kamtumbulila, “Wadima kufwa kwa undu ghwangu? Fulo kwenyi, nakuza, jongole siitetagha sonikanile mandu matatu.”