Johana 12 - UVORO GHWALOLI KWA WANDU WOSE

Jesu kuvilo mavuta alye Bethania

¹ Nao majua matandatu hambiri ya Pasaka, Jesu kaghenda Bethania, kwana Lazaro uyu azusilo ni Jesu kufuma kwa wafwa.

² Nawo wakamdeila chakulya cha hafukeni; naye Martha kawatumikila, na Lazaro oluo mumoju wa walye weluo mezeni ngila mojori na Jesu.

³ Nao Mariamu kaleta nusu lita ya marashi gha zoghori mbwaa ghadeilo na nardi yaloli. Kamvila Jesu maghulu na kuwaghila maghulu ghake na sisiri zake; nayo nyumba yose ikanuka iruke lya ghalye marashi.

⁴ Nao Juda Iskariote, mumoju wa wairimi ikumi na waili (uyu eluo umufunyagha), kaghamba,

⁵ “Kudani marashi agha sighetaghilo kwa pesa ziito dinari maghana matatu, na kuhawo wakiwa?”

⁶ Oghorire hung'u, si kwa kukala oluo kewafwila waya wakiwa, ela ni kwa kukala oluo kiting'a, na kwa kukala oluo ketwala mfuko ghwa pesa, oluo keusa icho chengizilo alye mweni.

⁷ Jesu kamuza, “Msigheni, kwani waghaika muli ghwangu kirani kwa ijua lya kuziko kwangu.

⁸ Wakiwa mwanakezanye nawo majua ghose, ela imi simukala nemi majua ghose.”

Njama yemulagha Lazaro

⁹ Nao Wayahudi wengi waghenda wamanya kamba Jesu uwo alye, wakaghenda alye, si kumwona Jesu tu kungi, ela na kumwona Lazaro naese uyu azusilo kufuma kwa wafwa.

¹⁰ Kwa hung'u wakohani wabwaa wakadea njama kumuulagha Lazaro naese.

¹¹ Kwani kwa undu ghwake Lazaro Wayahudi weluo wekewasigha wo, na kumudumusa Jesu.

Jesu kungila Jerusalemu na izumo

¹² Nao ilyo ikesho ikoghano ibwaa lya wandu wejile kele karamu wakasikila kamba Jesu wendeja Jerusalemu.

¹³ Nao wakatema manyasi gha mitende wakamumarira wekeimba, “Hosana! Wabarikio uyu ekujagha kwa izina lya Bwana, Mzuri wa Waisraeli!”

¹⁴ Nao Jesu kadoka mwana wa punda kamjoka; selyi kwenyi iwandiko,

¹⁵ “Simwaoghe wandu wa Zioni! Loleni mzuri wenyu ondemujila, wajoka ighulu ya mwana wa punda.”

¹⁶ Ilya ngelo wairimi wake siwamanyile agha, ela Jesu aghenda aliko kwa kuzuka wakakumbuka kamba ilyi lyewandiko ighulu yake na lyamalila kukatila.

¹⁷ Ikoghano lyilya lyeluo ngelo empang'ile Lazaro kufuma mbireni na kumuzusa kufuma kwa wafwa, nilyo lyierese uvoro.

¹⁸ Na ni kwa undu ughu ikoghano lyikamumarira, kwa kukala wesikile gha mwakilimbita amudeile.

¹⁹ Wafarisayo wakauzana wenyi, “Mwaona? Selyi simodimagha kudea kindu chingi! Loleni, urumengu ghose ghwamwirima.”

Wagiriki kushaya kumwona Jesu

²⁰ Nao wamoju wa walye weghendile kutasa ngelo ya karamu weluo Wagiriki.

²¹ Nawo wakamughendela Filipo wa Bethsaida ya Galilaya, wakamuza, “Bwana Tanashaile kumwona Jesu.”

²² Nao Filipo kaghenda kamughorera Andrea, naye Andrea ngila mojori na Filipo wakaghenda wakamughorera Jesu.

²³ Na Jesu katumbulila, “Ngelo yafika ya Mwana wa Mdamu kuliko.

²⁴ Fulo kwenyi, namuza, ndembe ya ngano ikakala siyewandilo msangeni ikafwa, yendetula ndembe; ela ilyi yafwa, yavala ndembe nyingi.

²⁵ Uwo wose ashaile umana ghwake ujeghulaghaza, na uwo wose emenyagha umana ghwake aha urumenguni ujekala nagho hata umana ghwa kale na kale.

²⁶ Uwo wose ashaile kunitumikila, ni suti aniirime; eri andu nio, na mtumishi wangu naese akale awenyi; naye uwo wose enitumikilagha, uhawogho ishima ni Aba.

Jesu kughora ighulu ya kifwa chake

²⁷ “Ndamu ngolo yangu yasirima. Nighoragha ije? ‘Aba nikize kele iyi saa?’ Hata, kwa undu ghwa saa iyi nanajile.

²⁸ Aba, izina lyako lyilike.” Nao lwaka lukeja lukaghora kufuma mlunguni, “Nalyilika, na sena nilyilikagha.”

²⁹ Nao ikoghano lyeluo kimusi alye wakasikila wakaghora, “Ni mururumo ghwa king'alang'ala.” Ela wamoju wakaghora, “Ni malaika aghora naye”

³⁰ Jesu kawatumbulila, “Lwaka ulu lwaghora kwa undu ghwenyu, si kwa undu ghwangu kungi.

³¹ Ndamu niko kutaghanyo kwa urumengu ughu, ndamu mubwaa wa urumengu ughu wakumbo noko shighati.

³² Nemi ilyi nanulo kufuma msangeni, nijewaruta wandu wose kwangu.”

³³ Naye oghorire agha kuonyeza ni kifwa muni ejefwa.

³⁴ Nao makoghano wakamtumbulila, “Sheria yetu ighambagha kamba Masihi ukalagha kwa kale na kale. Ndamu kudani ughambagha kamba ni suti Mwana wa Mdamu anulo? Nani Mwana Mdamu?”

³⁵ Jesu katumbulila, “Muo na mlangazi kwa ngelo njache, kwa hung'u seleni ngelo muo na mlangazi, eri simwadoko ni kiza; kwani uyu eselagha na kiza seonagha andu eghendagha.

³⁶ Ngelo muo na mlangazi, dumuseni mlangazi, eri mukale wana wa mlangazi.” Nao Jesu aghenda aghora agha, kauka kaghenda kakuvisa.

Kulegha kudumusa kwa wandu

³⁷ Hata ikanakale wanadeile wana mwakilimbita awa wose hambiri yawe, siwamdumuse,

³⁸ eri ilagho lyighoriro ni tondolo Isaya lyikatile: “Bwana, nani adumusa ghore taghora, Ni kwa wana ani Bwana amanyisa ndighi zake?”

³⁹ Kwa hung'u siwadimile kudumusa. Kwani Isaya waghora sena,

⁴⁰ “Mlungu waghadea meso ghawe kukala kifondo na kukulisa ngolo zawe, eri siwaone na meso ghawe na ngolo zawe sizamanye, na kunighalukila niwaboese.”

⁴¹ Isaya oghorire agha kwa kukala owonile ubwaa ghwake Jesu niko kamghora.

⁴² Hata sani wengi wa wabwaa wa Wayahudi wemdumuse Jesu; ela kwa kuwaogha Wafarisayo wakaogha kughora mwazi mwazi, eri siwaguso kele sinagogi.

⁴³ Kwani weshaile kuliko ni wandu, kuchumba kuliko ni Mlungu.

Kutaghanyo kwa ghore za Jesu

⁴⁴ Nao Jesu kaghora na lwaka lubwaa, “Uwo wose anidumusa imi, senidumusagha imi ekeng'weri, ela na uyu anitumile.

⁴⁵ Uwo wose aniona imi wamwona na uyu anitumile naese.

⁴⁶ Nanajile sa mlangazi urumenguni, eri uwo wose anidumusa imi sakale kizeni.

⁴⁷ Ngera mundungi asikila ghore zangu na kalegha kuziwata, Imi simutaghanyagha kungi; kwani sijile kutaghanya urumengu, ela kughukiza.

⁴⁸ Uwo wose enileghagha imi na sewatagha ghore zangu uwo na mtaghanyi. Ghore naghora nizo zenyi zimutaghanya ijua lya kudua mbali.

⁴⁹ Kwani sighoragha ghwa udimo ghwangu imi mwenyi; Aba uyu anitumile niye mwenyi anilaghiza ilyi lyio lyeghora.

⁵⁰ Nemi namanya kamba mlomu ghwake ghwaleta umana ghwa kale na kale. Kwa hung'u selyi naghora, naghora selyi Aba aniuza nighore.”