Johana 11 - UVORO GHWALOLI KWA WANDU WOSE

Kifwa cha Lazaro

¹ Nao mundu mumoju aitogho Lazaro wa Bethania oluo mkongo, Bethania gholuo ni muzi weluo wekekala Mariamu na Martha wakwawe.

² Uyu ni Mariamu ulya amvilile Bwana mavuta na kumwaghila na sisiri zake; niye Lazaro wakwawe eluo mkongo.

³ Wana wakwawe wakatumana uvoro kwa Jesu wekeghamba, “Bwana uyu umushaile ni mkongo.”

⁴ Nao Jesu aghenda asikila kaghora, “Ukongo ughu si ghwa kifwa kungi; ela ni kwa ubwaa ghwa Mlungu ghuoneke, eri Mwana wa Mlungu aliko kwa ilyi.”

⁵ Jesu owashaile Martha na wakwawe wa wake na Lazaro.

⁶ Naye aghenda asikila kamba, Lazaro ni mkongo, kakala alye andu eluo majua maili ghamoju.

⁷ Nao kawauza wairimi wake, “Ndokoni tighende Judea sena.”

⁸ Wairimi wakamuza, “Mwalimu, kafwani ng'weri Wayahudi weluo wekeshaya kukulasa na mawe, nawe sena ughende awenyi?”

⁹ Jesu kawatumbulila, “Ado msenya si ghuo na saa ikumi na mbili? Kwa hung'u mundu uwo wose kasela na msenya, sedimagha kukwalo, kwa kukala uonagha mlangazi ghwa urumengu.

¹⁰ Ela mundungi kasela na kiro, ukwalogho, kwa kukala sikwesi mlangazi.”

¹¹ Nao aghenda kughora hung'u kawauza, “Mugheni wetu Lazaro wamalila kutungura, ela nendeghenda nimunule haring'eni.”

¹² Wairimi wakamuza, “Bwana, ngera atungura ubowagha.”

¹³ Naye Jesu oghorire ighulu ya kifwa chake, ela wo wakaririkanya ondetungura haring'a.

¹⁴ Nao Jesu kawaghorera mwazi, “Lazaro wafwa,

¹⁵ Ela kwa undu ghwenyu naboelo andu niseluo alye, eri mpate kudumusa. Ndokoni tighende kwake.”

¹⁶ Thoma (aitogho Ihega) kawauza wairimi wambawe, “Ndokoni tighende tifwe ngila mojori naye.”

Jesu ni uzusi na Umana

¹⁷ Nao Jesu aghenda afika, kamdoka Lazaro wakala mbireni majua mane.

¹⁸ Bethania yeluo avui na Jerusalemu, sa kilomita ndatu,

¹⁹ nawo Wayahudi wengi wejile kuwasarusa ngolo Martha na Mariamu kwa undu ghwa kifwa cha wakwawe.

²⁰ Nao Martha aghenda asikila kamba Jesu ondeja, kafuma kumumarira, ela Mariamu kasigho nyumba.

²¹ Martha kamuza Jesu, “Bwana, ngera oluo anyaha, wakwetu sefwighagha!

²² Ela hata indakwenyi namanya kamba icho chose umulombagha Mlungu, ujekuhawa.”

²³ Jesu kamuza, “Wakwenyu uzuka sena.”

²⁴ Martha kaghamba, “Namanya uzuka sena kele uzusi ghwa ijua lya kudua mbali.”

²⁵ Jesu kamuza, “Imi ni uzusi na Umana; uwo wose anidumusa imi, hata kanakala wafwa, ujekala moyo;

²⁶ na uwo wose ewo moyo na kunidumusa imi na lyingi sefwighagha. Wadumusa agha?”

²⁷ Naye kamtumbulila, “Ee, Bwana; nadumusa kamba uwe nuwe Masihi, Mwana wa Mlungu uyu ekujagha urumenguni”.

Jesu kulila

²⁸ Nao aghenda aghora hung'u, kaghenda kumpang'a Mariamu wakwawe, keghora mbole, “Mwalimu uwo anyaha wakupang'a.”

²⁹ Naye Mariamu aghenda asikila, kauka shashowa kamughendela.

³⁰ Naye Jesu okaile kungila kele muzi, ela oluo anyalye andu ekoghane na Martha.

³¹ Nao Wayahudi awa wekezanye na Mariamu nyumba, wekemsarusa, waghenda kumwona kefuma shashowa wakamwirima. Kwani weririkanye wendeghenda mbireni kulila.

³² Nao Mariamu, aghenda afika alye andu Jesu eluo, amwona, kagwa maghuluni kwake, keghamba, “Bwana, ngera oluo anyaha wakwetu sefwighagha.”

³³ Nao Jesu aghenda amwona kelila, na walye Wayahudi wekezanye naye wekelila, kahariso ni ngolo.

³⁴ Naye kawauza, “Mwanamzikile hiyo?” Nawo wakamuza, “Bwana, njuu uwone.”

³⁵ Jesu kalila mbori.

³⁶ Nao Wayahudi wakaghora, “Loleni selyi emushaile.”

³⁷ Ela wamoju wakaghamba, “Ado iye adimile kufungula meso gha kifondo, sadimile kumdea uyu mundu safwe?”

Lazaro kuzuka

³⁸ Jesu kafurusa na ndighi, kafika mbireni; nayo yeluo kele mbanga, na yebulilo na iwe.

³⁹ Jesu kawauza, “Nuleni iwe.” Naye Martha wakwawe ulya mundu efwile kamuza, “Bwana, hung'u indakwenyi siikosagha unukagha, kwani wakala afwile majua mane.”

⁴⁰ Jesu kamuza, “Ado sikuuzile kwadumusa uonagha ubwaa ghwa Mlungu?”

⁴¹ Nao wakanula iwe. Naye Jesu kanula meso ghake noko ighulu, kaghora “Aba, nakulika kwa kukala wananisikilagha.

⁴² Nemi namanya wananisikilagha ngelo zose, ela naghora hung'u kwa undu ghwa wandu weo aha kimusi, eri wapate kudumusa kamba nuwe unitumile.”

⁴³ Naye aghenda kughora hung'u, kapang'a na lwaka lubwaa, “Lazaro fuma shighati.”

⁴⁴ Nao ulya mundu efwile kafuma, naye ofungilo nguo zezika mikonu na maghulu na ushu ghwake ghofungilo kitambaa. Jesu kawauza, “Mfunguleni mumsighe aghende.”

Njama yemulagha Jesu

⁴⁵ Nao Wayahudi wengi wejile kwa Mariamu waghenda waona selyi Jesu adeile, wakamdumusa.

⁴⁶ Ela wamoju wakaghenda wakawaghorera Wafarisayo selyi Jesu adeile.

⁴⁷ Kwa hung'u Wakohani wabwaa na Wafarisayo wakakoghana njameni, wakaghamba, “Tideagha ije? Kwani uyu mundu wadea wana mwakilimbita wengi.

⁴⁸ Ilyi tamsigha ukwenyi, kila mundu ujemdumusa na Waroma wekujagha wahakile andu kwetu kwa kuela na mbari yetu!”

⁴⁹ Ela mumoju wawe aitogho Kayafa eluo Mkohani Mubwaa mwaka ghulya, kawauza, “Ado inyo simumanya kindu chingi.

⁵⁰ Simumanyagha kamba ni bora mundu mumojori afwe kwa undu ghwa wandu kuchumba mbari yose kuhaita?”

⁵¹ Naye saghorire agha iye mwenyi, ela kwa kukala oluo Mkohani Mubwaa ghulya mwaka na otondole kamba ni suti Jesu afwe kwa undu ghwa ilya mbari;

⁵² na si kwa ilya mbari yawe yenyi, ela kutumbanya andu kumojori wana wa Mlungu wasaghiso kila andu.

⁵³ Kwa hung'u kufuma lyilya ijua vilongozi va Wayahudi wakahada ngila lyemulagha Jesu.

⁵⁴ Kwa hung'u Jesu seluo keghenda mwazi mwazi kwa Wayahudi, ela kafuma alye kaghenda avui na kireti, kele muzi ghuito Efraimu; naye kakala alye na wairimi wake.

⁵⁵ Nao Pasaka ya Wayahudi yeluo avui, na wandu wengi wakaghenda Jerusalemu hambiri ya Pasaka, eri wakuombochole.

⁵⁶ Nawo weluo wekemhada Jesu na kuuzana wenyi ilyi weluo kimusi Hekaluni, “Mririkanyagha ije? Fulo sedimagha kuja karamuni.”

⁵⁷ Nawo Wakohani wabwaa, na Wafarisayo wefunyile mlomu wekeghamba, ngera mundungi amanya andu ewo Jesu, awaghorere, eri waghende wamwate.