Johana 10 - UVORO GHWALOLI KWA WANDU WOSE

Ikataniso lya mlisa

¹ “Fulo namuza, uwo wose sengilagha na mjango ghwa ng'onzi chagheni, ela wajokela andu kuzima, ni kiting'a na muvekuri.

² Ela uyu engilagha na mjango ni mlisa wa ng'onzi.

³ Mrindiri mjango umurughuriragha; na ng'onzi zisikilagha lwaka lwake, naye wazipang'a kwa mazina ghawe na kuzilongoza shighati.

⁴ Naye ilyi azifunya shighati zose, wakayaya, na ng'onzi zamwirima, kwa kukala zanaweni lwaka lwake.

⁵ Sizidimagha kumwirima mugheni kungi, ela zijemukimbila, kwa kukala siziweni lwaka lwa mugheni.”

⁶ Jesu owaghorere ikataniso ilyi, ela siwatambukilo agha eluo keghora.

Jesu mlisa waloli

⁷ Nao Jesu kawauza sena, “Fulo namuza, Imi nigho mjango ghwa ng'onzi.

⁸ Wazima wose wajile hambiri yangu weluo ni viting'a na wavekuri; ela ng'onzi siziwasikile.

⁹ Imi nigho mjango, uwo wose engilagha kwa imi ukilagha, naye ujengila na kufuma na apate maliso.

¹⁰ Kiting'a wanakujagha eri aiwe na aulaghe na ahakile. Imi nanajile eri mupate umana na mpate ghwaenga.

¹¹ “Imi nimi mlisa waloli, mlisa waloli wanafunyagha umana ghwake kwa undu ghwa ng'onzi.

¹² Mundu wa mafungu na seo mlisa, na hata ng'onzi sizeo zake, kaona turugha ikeja, wasigha ng'onzi na kukimbila, nayo turugha yaziwata ng'onzi na kuzisaghisa.

¹³ Wakimbila kwa kukala ni mundu wa mafungu na setalagha ng'onzi.

¹⁴ Imi nimi mlisa waloli. Nanaweni ng'onzi zangu, nazo zananiweni.

¹⁵ Selyi Aba aniweni imi, nemi nimweni Aba; nemi nafunya umana ghwangu kwa ng'onzi

¹⁶ Na nio na ng'onzi nzima sizeo kele uranu ughu; nazose ni suti nizilete na zisikile lwaka lwangu. Eri zikale uranu ghumojori na mlisa mumojori.

¹⁷ “Kwa undu ughu Aba wananishaile, kwa kukala nafunya umana ghwangu eri nighupate sena.

¹⁸ Sikwesi mundungi eghuusagha kufuma kwangu, ela naghufunya kwa kushaya kwangu imi mwenyi. Nio na ndighi yeghufunya na nio na ndighi yeghuusa. Agha nigho Aba ashaile nidee.”

¹⁹ Nao kukakala na kusarikana kwa Wayahudi kwa undu ghwa malagho agha.

²⁰ Wengi wawe wakaghora, “Uwo na pepo, na wana mutu! Mumusikizila wani?”

²¹ Wamoju wakaghora, “Agha si maghori ghengi gha mundu ewo na pepo. Mundu wa pepo wadima kufungula meso gha kifondo?”

Kulegho Jesu

²² Nao ngelo ya ishika ilyi koluo na karamu ya ukumbuso ghwa kuiika Hekalu kwa Mlungu alye Jerusalemu;

²³ Jesu oluo keselasela Hekaluni kele baraza ya Solomoni.

²⁴ Nao Wayahudi wakamtindirira na kumuza, “Utiika sitemanyagha hata nini? Ngera nuwe Masihi tighorere mwazi.”

²⁵ Jesu kawatumbulila, “Nanamughorerere, na simudumuse; kazi nideagha kwa izina lya Aba, zanishuhudia;

²⁶ ela simudumuse kwa kukala sinyo ng'onzi zangu zingi.

²⁷ Ng'onzi zangu zanasikilagha lwaka lwangu; Nemi nanaziweni, nazo zananiirimagha.

²⁸ Nemi nanawahawagha umana ghwa kale na kale, hata lyingi siwefwigha na sikwesi mundungi edimagha kunisoka mikonuni kwangu.

²⁹ Aba uyu anihawile ni mubwaa kuisa vose. Na sikwesi mundungi edimagha kuzifunya kufuma kele mkonu ghwa Aba.

³⁰ Imi na Aba te mumojori.”

³¹ Nao Wayahudi wakashowa mawe sena eri wamlase.

³² Jesu kawauza, “Namwonyeza kazi nyingi zaloli kufuma kwa Aba; Ndamu ni kwa iyo imudeagha munilase?”

³³ Wayahudi wakamtumbulila, “Sitishaile kukulasa kwa undu ghwa kazi zaloli, ela kwa kukala waghora laghelaghe ighulu ya Mlungu. Uwe nuwe mdamu, nawe wakudea uwe mwenyi kukala Mlungu!”

³⁴ Jesu kawatumbulila, “Ado siiwandiko kele Sheria zenyu, ‘Neghorire ninyo milungu?’

³⁵ Ikakala awaitile milungu walye waletile ilagho lya Mlungu, (nagho Mawandiko gha Kuela sighavunjogho,)

³⁶ Ndamu kudani mwaghora kwa uyu aikilo na kutumo ni Aba urumenguni, kamba waghora ‘Laghelaghe ighulu ya Mlungu’ kwa kukala nanaghorire, ‘Nimi Mwana wa Mlungu?’

³⁷ Ngera sedeagha kazi za Aba, simwanidumuse;

³⁸ ela ngera nazidea, hata sani ngera Simonidumusagha, zidumuseni kazi zenyi, eri mumanye kamba Aba uwo amweni kwangu, nemi amweni kwa Aba.”

³⁹ Nao wakatima kumwata sena, ela kafusuka kele mikonu yawe.

⁴⁰ Jesu kaghenda sena chambuko cha Jordani andu Johana eluo kebatiza, kakala alye.

⁴¹ Nao wandu wengi wakamughendela, nawo wakaghamba wenyi, “Johana sadeile wana mwakilimbita wengi, ela malagho ghose aghorire Johana ighulu ya uyu mundu ni fulo.”

⁴² Nao wengi wakamdumusa andu alye.